๗. ปญฺหาวาโร

ปจฺจยจตุกฺกํ

๕๓. อุปาทินฺนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส เหตุปจฺจเยน ปจฺจโย. (๑)

อนุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส เหตุปจฺจเยน ปจฺจโย. (๑)

อนุปาทินฺนอนุปาทานิโย เหตุ ธมฺโม อนุปาทินฺนอนุปาทานิยสฺส เหตุสฺส ธมฺมสฺส เหตุปจฺจเยน ปจฺจโย. (๑)

๕๔. อุปาทินฺนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส อารมฺมณปจฺจเยน ปจฺจโย. อุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อารมฺมณปจฺจเยน ปจฺจโย. (๒)

อนุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อารมฺมณปจฺจเยน ปจฺจโย. อนุปาทินฺนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส อารมฺมณปจฺจเยน ปจฺจโย. (๒)

อนุปาทินฺนอนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อารมฺมณปจฺจเยน ปจฺจโย. (๑)

๕๕. อุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อธิปติปจฺจเยน ปจฺจโย. (๑)

อนุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อธิปติปจฺจเยน ปจฺจโย. (๑)

อนุปาทินฺนอนุปาทานิโย เหตุ ธมฺโม อนุปาทินฺนอนุปาทานิยสฺส เหตุสฺส ธมฺมสฺส อธิปติปจฺจเยน ปจฺจโย. อนุปาทินฺนอนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อธิปติปจฺจเยน ปจฺจโย. (๑)

อนนฺตร-อุปนิสฺสยปจฺจยา

๕๖. อุปาทินฺนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส อนนฺตรปจฺจเยน ปจฺจโย. (๑)

อนุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อนนฺตรปจฺจเยน ปจฺจโย… ตีณิ.

อนุปาทินฺนอนุปาทานิโย เหตุ ธมฺโม อนุปาทินฺนอนุปาทานิยสฺส เหตุสฺส ธมฺมสฺส อนนฺตรปจฺจเยน ปจฺจโย. อนุปาทินฺนอนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส อนนฺตรปจฺจเยน ปจฺจโย…เป…. (๒)

๕๗. อุปาทินฺนุปาทานิโย เหตุ ธมฺโม อุปาทินฺนุปาทานิยสฺส เหตุสฺส ธมฺมสฺส อุปนิสฺสยปจฺจเยน ปจฺจโย. อุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อุปนิสฺสยปจฺจเยน ปจฺจโย. อุปาทินฺนุปาทานิโย เหตุ ธมฺโม อนุปาทินฺนอนุปาทานิยสฺส เหตุสฺส ธมฺมสฺส อุปนิสฺสยปจฺจเยน ปจฺจโย. (๓)

อนุปาทินฺนุปาทานิโย เหตุ ธมฺโม อนุปาทินฺนุปาทานิยสฺส เหตุสฺส ธมฺมสฺส อุปนิสฺสยปจฺจเยน ปจฺจโย… ตีณิ.

อนุปาทินฺนอนุปาทานิโย เหตุ ธมฺโม อนุปาทินฺนอนุปาทานิยสฺส เหตุสฺส ธมฺมสฺส อุปนิสฺสยปจฺจเยน ปจฺจโย… ตีณิ (สํขิตฺตํ).

๕๘. เหตุยา ตีณิ, อารมฺมเณ ปญฺจ, อธิปติยา จตฺตาริ, อนนฺตเร ฉ, สมนนฺตเร ฉ, สหชาเต ตีณิ, อญฺญมญฺเญ ตีณิ, นิสฺสเย ตีณิ, อุปนิสฺสเย นว, อาเสวเน เทฺว, วิปาเก เทฺว…เป… อวิคเต ตีณิ (สํขิตฺตํ).

นเหตุยา นว, นอารมฺมเณ นว (สํขิตฺตํ).

เหตุปจฺจยา นอารมฺมเณ ตีณิ (สํขิตฺตํ).

นเหตุปจฺจยา อารมฺมเณ ปญฺจ (สํขิตฺตํ).

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)

นเหตุปทปจฺจยจตุกฺกํ

๕๙. อุปาทินฺนุปาทานิยํ นเหตุํ ธมฺมํ ปฏิจฺจ อุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. อุปาทินฺนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. อุปาทินฺนุปาทานิยํ นเหตุํ ธมฺมํ ปฏิจฺจ อุปาทินฺนุปาทานิโย นเหตุ จ อนุปาทินฺนุปาทานิโย นเหตุ จ ธมฺมา อุปฺปชฺชนฺติ เหตุปจฺจยา. (๓)

อนุปาทินฺนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. (๑)

อนุปาทินฺนอนุปาทานิยํ นเหตุํ ธมฺมํ ปฏิจฺจ อนุปาทินฺนอนุปาทานิโย นเหตุ ธมฺโม อุปฺปชฺชติ เหตุปจฺจยา. อนุปาทินฺนอนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. อนุปาทินฺนอนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ จ อนุปาทินฺนอนุปาทานิโย นเหตุ จ ธมฺมา อุปฺปชฺชนฺติ เหตุปจฺจยา. (๓)

อุปาทินฺนุปาทานิยํ นเหตุญฺจ อนุปาทินฺนุปาทานิยํ นเหตุญฺจ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. (๑)

อนุปาทินฺนุปาทานิยํ นเหตุญฺจ อนุปาทินฺนอนุปาทานิยํ นเหตุญฺจ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ เหตุปจฺจยา. (๑)

๖๐. อุปาทินฺนุปาทานิยํ นเหตุํ ธมฺมํ ปฏิจฺจ อุปาทินฺนุปาทานิโย นเหตุ ธมฺโม อุปฺปชฺชติ อารมฺมณปจฺจยา. (๑)

อนุปาทินฺนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ อารมฺมณปจฺจยา. (๑)

อนุปาทินฺนอนุปาทานิยํ นเหตุํ ธมฺมํ ปฏิจฺจ อนุปาทินฺนอนุปาทานิโย นเหตุ ธมฺโม อุปฺปชฺชติ อารมฺมณปจฺจยา. (๑) (สํขิตฺตํ.)

๖๑. เหตุยา นว, อารมฺมเณ ตีณิ, อธิปติยา ปญฺจ, อนนฺตเร ตีณิ, สมนนฺตเร ตีณิ, สหชาเต นว, อญฺญมญฺเญ ตีณิ, นิสฺสเย นว, อุปนิสฺสเย ตีณิ, ปุเรชาเต ตีณิ, อาเสวเน เทฺว, กมฺเม นว, วิปาเก นว…เป… อวิคเต นว (สํขิตฺตํ).

ปจฺจนียํ – นเหตุปจฺจโย

๖๒. อุปาทินฺนุปาทานิยํ นเหตุํ ธมฺมํ ปฏิจฺจ อุปาทินฺนุปาทานิโย นเหตุ ธมฺโม อุปฺปชฺชติ นเหตุปจฺจยา… ตีณิ.

อนุปาทินฺนุปาทานิยํ นเหตุํ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ นเหตุปจฺจยา. (๑)

อุปาทินฺนุปาทานิยํ นเหตุญฺจ อนุปาทินฺนุปาทานิยํ นเหตุญฺจ ธมฺมํ ปฏิจฺจ อนุปาทินฺนุปาทานิโย นเหตุ ธมฺโม อุปฺปชฺชติ นเหตุปจฺจยา. (๑) (สํขิตฺตํ.)

๖๓. นเหตุยา ปญฺจ, นอารมฺมเณ ฉ (สํขิตฺตํ).

เหตุปจฺจยา นอารมฺมเณ ฉ (สํขิตฺตํ).

นเหตุปจฺจยา อารมฺมเณ เทฺว (สํขิตฺตํ).

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)