๑-๗. ปฏิจฺจวาราทิ

ปจฺจยจตุกฺกํ

๔๕. สปฺปีติกํ กุสลํ ธมฺมํ ปฏิจฺจ สปฺปีติโก กุสโล ธมฺโม อุปฺปชฺชติ เหตุปจฺจยา. สปฺปีติกํ กุสลํ ธมฺมํ ปฏิจฺจ อปฺปีติโก กุสโล ธมฺโม อุปฺปชฺชติ เหตุปจฺจยา. สปฺปีติกํ กุสลํ ธมฺมํ ปฏิจฺจ สปฺปีติโก กุสโล จ อปฺปีติโก กุสโล จ ธมฺมา อุปฺปชฺชนฺติ เหตุปจฺจยา. (๓)

อปฺปีติกํ กุสลํ ธมฺมํ ปฏิจฺจ อปฺปีติโก กุสโล ธมฺโม อุปฺปชฺชติ เหตุปจฺจยา. อปฺปีติกํ กุสลํ ธมฺมํ ปฏิจฺจ สปฺปีติโก กุสโล ธมฺโม อุปฺปชฺชติ เหตุปจฺจยา. (๒)

สปฺปีติกํ กุสลญฺจ อปฺปีติกํ กุสลญฺจ ธมฺมํ ปฏิจฺจ สปฺปีติโก กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๔๖. เหตุยา ฉ (สพฺพตฺถ ฉ)…เป… อวิคเต ฉ (สํขิตฺตํ).

นอธิปติยา ฉ, นปุเรชาเต ฉ…เป… นกมฺเม จตฺตาริ, นวิปฺปยุตฺเต ฉ (สํขิตฺตํ. สหชาตวารมฺปิ …เป… สมฺปยุตฺตวารมฺปิ วิตฺถาเรตพฺพํ).

๔๗. สปฺปีติโก กุสโล ธมฺโม สปฺปีติกสฺส กุสลสฺส ธมฺมสฺส เหตุปจฺจเยน ปจฺจโย… ตีณิ.

อปฺปีติโก กุสโล ธมฺโม อปฺปีติกสฺส กุสลสฺส ธมฺมสฺส เหตุปจฺจเยน ปจฺจโย. (๑)

สปฺปีติโก กุสโล ธมฺโม สปฺปีติกสฺส กุสลสฺส ธมฺมสฺส อารมฺมณปจฺจเยน ปจฺจโย (สํขิตฺตํ).

๔๘. เหตุยา จตฺตาริ, อารมฺมเณ นว, อธิปติยา นว (จตฺตาริ สหชาตาธิปติ), อนนฺตเร นว, สมนนฺตเร นว, สหชาเต ฉ…เป… อุปนิสฺสเย นว, อาเสวเน นว, กมฺเม จตฺตาริ, อาหาเร จตฺตาริ, อินฺทฺริเย จตฺตาริ, ฌาเน ฉ, มคฺเค จตฺตาริ, สมฺปยุตฺเต ฉ, อตฺถิยา ฉ, นตฺถิยา นว, วิคเต นว, อวิคเต ฉ (สํขิตฺตํ).

นเหตุยา นว, นอารมฺมเณ นว (สํขิตฺตํ).

เหตุปจฺจยา นอารมฺมเณ จตฺตาริ (สํขิตฺตํ).

นเหตุปจฺจยา อารมฺมเณ นว (สํขิตฺตํ).

(ยถา กุสลตฺติเก ปญฺหาวารํ, เอวํ วิตฺถาเรตพฺพํ.)

อกุสลปทํ

เหตุปจฺจโย

๔๙. สปฺปีติกํ อกุสลํ ธมฺมํ ปฏิจฺจ สปฺปีติโก อกุสโล ธมฺโม อุปฺปชฺชติ เหตุปจฺจยา… ตีณิ.

อปฺปีติกํ อกุสลํ ธมฺมํ ปฏิจฺจ อปฺปีติโก อกุสโล ธมฺโม อุปฺปชฺชติ เหตุปจฺจยา… เทฺว.

สปฺปีติกํ อกุสลญฺจ อปฺปีติกํ อกุสลญฺจ ธมฺมํ ปฏิจฺจ สปฺปีติโก อกุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๕๐. เหตุยา ฉ, อารมฺมเณ ฉ…เป… อวิคเต ฉ (สํขิตฺตํ. กุสลสทิสํ. สหชาตวาโรปิ…เป… ปญฺหาวาโรปิ วิตฺถาเรตพฺพา).

อพฺยากตปทํ

เหตุปจฺจโย

๕๑. สปฺปีติกํ อพฺยากตํ ธมฺมํ ปฏิจฺจ สปฺปีติโก อพฺยากโต ธมฺโม อุปฺปชฺชติ เหตุปจฺจยา… ตีณิ.

อปฺปีติกํ อพฺยากตํ ธมฺมํ ปฏิจฺจ อปฺปีติโก อพฺยากโต ธมฺโม อุปฺปชฺชติ เหตุปจฺจยา… ตีณิ.

สปฺปีติกํ อพฺยากตญฺจ อปฺปีติกํ อพฺยากตญฺจ ธมฺมํ ปฏิจฺจ สปฺปีติโก อพฺยากโต ธมฺโม อุปฺปชฺชติ เหตุปจฺจยา… ตีณิ (สํขิตฺตํ).

๕๒. เหตุยา นว, อารมฺมเณ นว…เป… ปุเรชาเต ฉ, อาเสวเน ฉ…เป… อวิคเต นว (สํขิตฺตํ).

นเหตุยา นว, นอารมฺมเณ ตีณิ, นอธิปติยา นว…เป… นกมฺเม จตฺตาริ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค นว, นสมฺปยุตฺเต ตีณิ, นวิปฺปยุตฺเต ฉ…เป… (สํขิตฺตํ. สหชาตวาราทิ วิตฺถาเรตพฺโพ).

๕๓. สปฺปีติโก อพฺยากโต ธมฺโม สปฺปีติกสฺส อพฺยากตสฺส ธมฺมสฺส เหตุปจฺจเยน ปจฺจโย (สํขิตฺตํ).

๕๔. เหตุยา จตฺตาริ, อารมฺมเณ นว, อธิปติยา นว, อนนฺตเร นว…เป… (สพฺพตฺถ นว), อุปนิสฺสเย นว, ปุเรชาเต ตีณิ, ปจฺฉาชาเต ตีณิ, อาเสวเน นว, กมฺเม จตฺตาริ, วิปาเก นว, อาหาเร จตฺตาริ, อินฺทฺริเย จตฺตาริ, ฌาเน นว, มคฺเค จตฺตาริ, สมฺปยุตฺเต ฉ, วิปฺปยุตฺเต ปญฺจ, อตฺถิยา นว…เป… อวิคเต นว (สํขิตฺตํ).