๑-๗. ปฏิจฺจวาราทิ

๙. สํกิเลสิกํ กุสลํ ธมฺมํ ปฏิจฺจ สํกิเลสิโก กุสโล ธมฺโม อุปฺปชฺชติ เหตุปจฺจยา. (๑)

อสํกิเลสิกํ กุสลํ ธมฺมํ ปฏิจฺจ อสํกิเลสิโก กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๑๐. เหตุยา เทฺว, อารมฺมเณ เทฺว…เป… อวิคเต เทฺว (สํขิตฺตํ. โลกิยทุกกุสลสทิสํ. สหชาตวารมฺปิ…เป… ปญฺหาวารมฺปิ วิตฺถาเรตพฺพํ).

๑๑. สํกิเลสิกํ อกุสลํ ธมฺมํ ปฏิจฺจ สํกิเลสิโก อกุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ).

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๑๒. สํกิเลสิกํ อพฺยากตํ ธมฺมํ ปฏิจฺจ สํกิเลสิโก อพฺยากโต ธมฺโม อุปฺปชฺชติ เหตุปจฺจยา. (๑)

อสํกิเลสิกํ อพฺยากตํ ธมฺมํ ปฏิจฺจ อสํกิเลสิโก อพฺยากโต ธมฺโม อุปฺปชฺชติ เหตุปจฺจยา… ตีณิ.

สํกิเลสิกํ อพฺยากตญฺจ อสํกิเลสิกํ อพฺยากตญฺจ ธมฺมํ ปฏิจฺจ สํกิเลสิโก อพฺยากโต ธมฺโม อุปฺปชฺชติ เหตุปจฺจยา (สํขิตฺตํ).

๑๓. เหตุยา ปญฺจ, อารมฺมเณ เทฺว…เป… อวิคเต ปญฺจ (สํขิตฺตํ. โลกิยทุกอพฺยากตสทิสํ. สหชาตวาเรปิ…เป… ปญฺหาวาเรปิ สพฺพตฺถ วิตฺถาเรตพฺพํ).