๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๑๐. อุปาทานิยํ กุสลํ ธมฺมํ ปฏิจฺจ อุปาทานิโย กุสโล ธมฺโม อุปฺปชฺชติ เหตุปจฺจยา. (๑)

อนุปาทานิยํ กุสลํ ธมฺมํ ปฏิจฺจ อนุปาทานิโย กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๑๑. เหตุยา เทฺว, อารมฺมเณ เทฺว…เป… อวิคเต เทฺว (สํขิตฺตํ. โลกิยโลกุตฺตรทุกกุสลสทิสํ. สหชาตวารมฺปิ…เป… ปญฺหาวารมฺปิ วิตฺถาเรตพฺพํ.)

๑๒. อุปาทานิยํ อกุสลํ ธมฺมํ ปฏิจฺจ อุปาทานิโย อกุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ).

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๑๓. อุปาทานิยํ อพฺยากตํ ธมฺมํ ปฏิจฺจ อุปาทานิโย อพฺยากโต ธมฺโม อุปฺปชฺชติ เหตุปจฺจยา. (๑)

อนุปาทานิยํ อพฺยากตํ ธมฺมํ ปฏิจฺจ อนุปาทานิโย อพฺยากโต ธมฺโม อุปฺปชฺชติ เหตุปจฺจยา. อนุปาทานิยํ อพฺยากตํ ธมฺมํ ปฏิจฺจ อุปาทานิโย อพฺยากโต ธมฺโม อุปฺปชฺชติ เหตุปจฺจยา. อนุปาทานิยํ อพฺยากตํ ธมฺมํ ปฏิจฺจ อุปาทานิโย อพฺยากโต จ อนุปาทานิโย อพฺยากโต จ ธมฺมา อุปฺปชฺชนฺติ เหตุปจฺจยา. (๓)

อุปาทานิยํ อพฺยากตญฺจ อนุปาทานิยํ อพฺยากตญฺจ ธมฺมํ ปฏิจฺจ อุปาทานิโย อพฺยากโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๑๔. เหตุยา ปญฺจ, อารมฺมเณ เทฺว…เป… อาเสวเน เอกํ…เป… อวิคเต ปญฺจ (สํขิตฺตํ. โลกิยทุกอพฺยากตสทิสํ. สหชาตวารมฺปิ…เป… ปญฺหาวารมฺปิ วิตฺถาเรตพฺพํ).