๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๒๙. จิตฺตสมฺปยุตฺตํ กุสลํ ธมฺมํ ปฏิจฺจ จิตฺตสมฺปยุตฺโต กุสโล ธมฺโม อุปฺปชฺชติ เหตุปจฺจยา (สํขิตฺตํ).

๓๐. เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ).

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๓๑. จิตฺตสมฺปยุตฺตํ อกุสลํ ธมฺมํ ปฏิจฺจ จิตฺตสมฺปยุตฺโต อกุสโล ธมฺโม อุปฺปชฺชติ เหตุปจฺจยา (สํขิตฺตํ).

๓๒. เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ). (สหชาตวาเรปิ…เป… ปญฺหาวาเรปิ สพฺพตฺถ เอกํ.)

อพฺยากตปทํ – เหตุปจฺจโย

๓๓. จิตฺตสมฺปยุตฺตํ อพฺยากตํ ธมฺมํ ปฏิจฺจ จิตฺตสมฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตสมฺปยุตฺตํ อพฺยากตํ ธมฺมํ ปฏิจฺจ จิตฺตวิปฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตสมฺปยุตฺตํ อพฺยากตํ ธมฺมํ ปฏิจฺจ จิตฺตสมฺปยุตฺโต อพฺยากโต จ จิตฺตวิปฺปยุตฺโต อพฺยากโต จ ธมฺมา อุปฺปชฺชนฺติ เหตุปจฺจยา. (๓)

จิตฺตวิปฺปยุตฺตํ อพฺยากตํ ธมฺมํ ปฏิจฺจ จิตฺตวิปฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตวิปฺปยุตฺตํ อพฺยากตํ ธมฺมํ ปฏิจฺจ จิตฺตสมฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตวิปฺปยุตฺตํ อพฺยากตํ ธมฺมํ ปฏิจฺจ จิตฺตสมฺปยุตฺโต อพฺยากโต จ จิตฺตวิปฺปยุตฺโต อพฺยากโต จ ธมฺมา อุปฺปชฺชนฺติ เหตุปจฺจยา. (๓)

จิตฺตสมฺปยุตฺตํ อพฺยากตญฺจ จิตฺตวิปฺปยุตฺตํ อพฺยากตญฺจ ธมฺมํ ปฏิจฺจ จิตฺตสมฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตสมฺปยุตฺตํ อพฺยากตญฺจ จิตฺตวิปฺปยุตฺตํ อพฺยากตญฺจ ธมฺมํ ปฏิจฺจ จิตฺตวิปฺปยุตฺโต อพฺยากโต ธมฺโม อุปฺปชฺชติ เหตุปจฺจยา. จิตฺตสมฺปยุตฺตํ อพฺยากตญฺจ จิตฺตวิปฺปยุตฺตํ อพฺยากตญฺจ ธมฺมํ ปฏิจฺจ จิตฺตสมฺปยุตฺโต อพฺยากโต จ จิตฺตวิปฺปยุตฺโต อพฺยากโต จ ธมฺมา อุปฺปชฺชนฺติ เหตุปจฺจยา. (๓) (สํขิตฺตํ.)

๓๔. เหตุยา นว, อารมฺมเณ ตีณิ, อธิปติยา ปญฺจ…เป… อญฺญมญฺเญ ฉ…เป… ปุเรชาเต เอกํ, อาเสวเน เอกํ, กมฺเม นว, วิปาเก นว…เป… อวิคเต นว (สํขิตฺตํ).

นเหตุยา นว, นอารมฺมเณ ตีณิ, นอธิปติยา นว…เป… นปุเรชาเต นว…เป… นกมฺเม เทฺว, นวิปาเก ปญฺจ, นอาหาเร เอกํ, นอินฺทฺริเย เอกํ, นฌาเน เทฺว, นมคฺเค นว, นสมฺปยุตฺเต ตีณิ, นวิปฺปยุตฺเต เทฺว (สํขิตฺตํ, สหชาตวาราทิ วิตฺถาเรตพฺโพ).

เหตุ-อารมฺมณปจฺจยา

๓๕. จิตฺตสมฺปยุตฺโต อพฺยากโต ธมฺโม จิตฺตสมฺปยุตฺตสฺส อพฺยากตสฺส ธมฺมสฺส เหตุปจฺจเยน ปจฺจโย… ตีณิ.

จิตฺตสมฺปยุตฺโต อพฺยากโต ธมฺโม จิตฺตสมฺปยุตฺตสฺส อพฺยากตสฺส ธมฺมสฺส อารมฺมณปจฺจเยน ปจฺจโย. (๑)

จิตฺตวิปฺปยุตฺโต อพฺยากโต ธมฺโม จิตฺตสมฺปยุตฺตสฺส อพฺยากตสฺส ธมฺมสฺส อารมฺมณปจฺจเยน ปจฺจโย. (๑) (สํขิตฺตํ.)

๓๖. เหตุยา ตีณิ, อารมฺมเณ เทฺว, อธิปติยา จตฺตาริ, อนนฺตเร เอกํ…เป… สหชาเต สตฺต, อญฺญมญฺเญ ฉ, นิสฺสเย สตฺต, อุปนิสฺสเย เทฺว, ปุเรชาเต เอกํ, ปจฺฉาชาเต เอกํ, อาเสวเน เอกํ, กมฺเม ตีณิ, วิปาเก ตีณิ, อาหาเร จตฺตาริ, อินฺทฺริเย ฉ, ฌาเน ตีณิ, มคฺเค ตีณิ, สมฺปยุตฺเต เอกํ, วิปฺปยุตฺเต เทฺว (สํขิตฺตํ).