๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๙๘. อนุปาทินฺนํ กุสลํ ธมฺมํ ปฏิจฺจ อนุปาทินฺโน กุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ, อารมฺมเณ เอกํ…เป… อวิคเต เอกํ (สพฺพตฺถ เอกํ. สํขิตฺตํ. สหชาตวาเรปิ…เป… ปญฺหาวาเรปิ เอกํ สปฺปจฺจยกุสลสทิสํ).

๙๙. อนุปาทินฺนํ อกุสลํ ธมฺมํ ปฏิจฺจ อนุปาทินฺโน อกุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ…เป… อวิคเต เอกํ (สํขิตฺตํ. สหชาตวาเรปิ…เป… ปญฺหาวาเรปิ สพฺพตฺถ เอกํ).

๑๐๐. อุปาทินฺนํ อพฺยากตํ ธมฺมํ ปฏิจฺจ อุปาทินฺโน อพฺยากโต ธมฺโม อุปฺปชฺชติ เหตุปจฺจยา… ตีณิ.

อนุปาทินฺนํ อพฺยากตํ ธมฺมํ ปฏิจฺจ อนุปาทินฺโน อพฺยากโต ธมฺโม อุปฺปชฺชติ เหตุปจฺจยา. (๑)

อุปาทินฺนํ อพฺยากตญฺจ อนุปาทินฺนํ อพฺยากตญฺจ ธมฺมํ ปฏิจฺจ อนุปาทินฺโน อพฺยากโต ธมฺโม อุปฺปชฺชติ เหตุปจฺจยา – อุปาทินฺเน ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑) (สํขิตฺตํ.)

๑๐๑. เหตุยา ปญฺจ, อารมฺมเณ เทฺว, อธิปติยา เอกํ…เป… ปุเรชาเต เทฺว, อาเสวเน เอกํ, กมฺเม ปญฺจ, วิปาเก ปญฺจ…เป… อวิคเต ปญฺจ (สํขิตฺตํ).

นเหตุยา ปญฺจ, นอารมฺมเณ จตฺตาริ, นอธิปติยา ปญฺจ…เป… นปุเรชาเต จตฺตาริ, นปจฺฉาชาเต นอาเสวเน ปญฺจ, นกมฺเม เอกํ, นวิปาเก เทฺว, นอาหาเร เทฺว, นอินฺทฺริเย เทฺว, นฌาเน เทฺว, นมคฺเค ปญฺจ, นสมฺปยุตฺเต จตฺตาริ, นวิปฺปยุตฺเต เทฺว, โนนตฺถิยา จตฺตาริ, โนวิคเต จตฺตาริ (สํขิตฺตํ. สหชาตวาราทิ วิตฺถาเรตพฺโพ).

เหตุ-ปุเรชาตปจฺจยา

๑๐๒. อุปาทินฺโน อพฺยากโต ธมฺโม อุปาทินฺนสฺส อพฺยากตสฺส ธมฺมสฺส เหตุปจฺจเยน ปจฺจโย… ตีณิ.

อนุปาทินฺโน อพฺยากโต ธมฺโม อนุปาทินฺนสฺส อพฺยากตสฺส ธมฺมสฺส เหตุปจฺจเยน ปจฺจโย. (๑)

อนุปาทินฺโน อพฺยากโต ธมฺโม อนุปาทินฺนสฺส อพฺยากตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… เอกํ.

อุปาทินฺโน อพฺยากโต ธมฺโม อุปาทินฺนสฺส อพฺยากตสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํ (เทฺว ปญฺหา).

อนุปาทินฺโน อพฺยากโต ธมฺโม อนุปาทินฺนสฺส อพฺยากตสฺส ธมฺมสฺส ปุเรชาตปจฺจเยน ปจฺจโย… เทฺว (อารมฺมณปุเรชาตํเยว, ฆฏนา เทฺว, อารมฺมณปุเรชาตมฺปิ วตฺถุปุเรชาตมฺปิ).

๑๐๓. เหตุยา จตฺตาริ, อารมฺมเณ จตฺตาริ (อุปาทินฺนมูลเก เทฺว, อนุปาทินฺนมูลเก เทฺว), อธิปติยา เอกํ, อนนฺตเร สมนนฺตเร จตฺตาริ, สหชาเต ปญฺจ, อญฺญมญฺเญ เทฺว, นิสฺสเย ปญฺจ, อุปนิสฺสเย จตฺตาริ, ปุเรชาเต ฉ, ปจฺฉาชาเต ฉ, อาเสวเน เอกํ, กมฺเม จตฺตาริ, วิปาเก จตฺตาริ, อาหาเร นว, อินฺทฺริเย จตฺตาริ, ฌาเน จตฺตาริ, มคฺเค จตฺตาริ, สมฺปยุตฺเต เทฺว, วิปฺปยุตฺเต ฉ, อตฺถิยา นว, นตฺถิยา จตฺตาริ, วิคเต จตฺตาริ, อวิคเต นว (สํขิตฺตํ).

นเหตุยา นว, นอารมฺมเณ นว (สํขิตฺตํ).

เหตุปจฺจยา นอารมฺมเณ จตฺตาริ (สํขิตฺตํ).

นเหตุปจฺจยา อารมฺมเณ จตฺตาริ (สํขิตฺตํ).

มหนฺตรทุกกุสลตฺติกํ นิฏฺฐิตํ.