๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๙๒. โนอุปาทา กุสลํ ธมฺมํ ปฏิจฺจ โนอุปาทา กุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ).

(สหชาตวาเรปิ…เป… ปญฺหาวาเรปิ สพฺพตฺถ เอกํ.)

๙๓. โนอุปาทา อกุสลํ ธมฺมํ ปฏิจฺจ โนอุปาทา อกุสโล ธมฺโม อุปฺปชฺชติ เหตุปจฺจยา (สํขิตฺตํ).

เหตุยา เอกํ, อารมฺมเณ เอกํ…เป… อวิคเต เอกํ (สํขิตฺตํ).

(สหชาตวาเรปิ …เป… ปญฺหาวาเรปิ สพฺพตฺถ เอกํ.)

๙๔. อุปาทา อพฺยากตํ ธมฺมํ ปฏิจฺจ โนอุปาทา อพฺยากโต ธมฺโม อุปฺปชฺชติ เหตุปจฺจยา. (๑)

โนอุปาทา อพฺยากตํ ธมฺมํ ปฏิจฺจ โนอุปาทา อพฺยากโต ธมฺโม อุปฺปชฺชติ เหตุปจฺจยา. โนอุปาทา อพฺยากตํ ธมฺมํ ปฏิจฺจ อุปาทา อพฺยากโต ธมฺโม อุปฺปชฺชติ เหตุปจฺจยา. โนอุปาทา อพฺยากตํ ธมฺมํ ปฏิจฺจ อุปาทา อพฺยากโต จ โนอุปาทา อพฺยากโต จ ธมฺมา อุปฺปชฺชนฺติ เหตุปจฺจยา. (๓)

อุปาทา อพฺยากตญฺจ โนอุปาทา อพฺยากตญฺจ ธมฺมํ ปฏิจฺจ โนอุปาทา อพฺยากโต ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๙๕. เหตุยา ปญฺจ, อารมฺมเณ ตีณิ…เป… อญฺญมญฺเญ ปญฺจ…เป… ปุเรชาเต เอกํ, อาเสวเน เอกํ, กมฺเม ปญฺจ, วิปาเก ปญฺจ…เป… อวิคเต ปญฺจ (สํขิตฺตํ).

นเหตุยา ปญฺจ, นอารมฺมเณ ตีณิ, นอธิปติยา ปญฺจ…เป… นปุเรชาเต ปญฺจ…เป… นกมฺเม ตีณิ, นวิปาเก ตีณิ, นอาหาเร ตีณิ, นอินฺทฺริเย ตีณิ, นฌาเน ตีณิ, นมคฺเค ปญฺจ, นสมฺปยุตฺเต ตีณิ, นวิปฺปยุตฺเต ตีณิ, โนนตฺถิยา ตีณิ, โนวิคเต ตีณิ (สํขิตฺตํ. สหชาตวารมฺปิ…เป… สมฺปยุตฺตวารมฺปิ วิตฺถาเรตพฺพํ.)

เหตุอารมฺมณปจฺจยาทิ

๙๖. โนอุปาทา อพฺยากโต ธมฺโม โนอุปาทา อพฺยากตสฺส ธมฺมสฺส เหตุปจฺจเยน ปจฺจโย… ตีณิ.

อุปาทา อพฺยากโต ธมฺโม โนอุปาทา อพฺยากตสฺส ธมฺมสฺส อารมฺมณปจฺจเยน ปจฺจโย. (๑)

โนอุปาทา อพฺยากโต ธมฺโม โนอุปาทา อพฺยากตสฺส ธมฺมสฺส อารมฺมณปจฺจเยน ปจฺจโย. (๑)

โนอุปาทา อพฺยากโต ธมฺโม โนอุปาทา อพฺยากตสฺส ธมฺมสฺส อธิปติปจฺจเยน ปจฺจโย… ตีณิ (ปฐเม เทฺวปิ อธิปตี, ทฺวีสุ สหชาตาธิปติ).

อุปาทา อพฺยากโต ธมฺโม โนอุปาทา อพฺยากตสฺส ธมฺมสฺส อุปนิสฺสยปจฺจเยน ปจฺจโย. (๑)

โนอุปาทา อพฺยากโต ธมฺโม โนอุปาทา อพฺยากตสฺส ธมฺมสฺส อุปนิสฺสยปจฺจเยน ปจฺจโย. (๑) (สํขิตฺตํ.)

๙๗. อุปนิสฺสเย เทฺว, ปุเรชาเต ตีณิ, ปจฺฉาชาเต ตีณิ, อาเสวเน เอกํ, กมฺเม ตีณิ, วิปาเก ตีณิ, อาหาเร ฉ, อินฺทฺริเย สตฺต, ฌาเน ตีณิ, มคฺเค ตีณิ, สมฺปยุตฺเต เอกํ, วิปฺปยุตฺเต จตฺตาริ, อตฺถิยา นว…เป… อวิคเต นว (สํขิตฺตํ).