๑-๗. ปฏิจฺจวาราทิ

ปจฺจยจตุกฺกํ

เหตุปจฺจโย

๕๓. จิตฺตสหภุํ กุสลํ ธมฺมํ ปฏิจฺจ จิตฺตสหภู กุสโล ธมฺโม อุปฺปชฺชติ เหตุปจฺจยา. จิตฺตสหภุํ กุสลํ ธมฺมํ ปฏิจฺจ โนจิตฺตสหภู กุสโล ธมฺโม อุปฺปชฺชติ เหตุปจฺจยา. จิตฺตสหภุํ กุสลํ ธมฺมํ ปฏิจฺจ จิตฺตสหภู กุสโล จ โนจิตฺตสหภู กุสโล จ ธมฺมา อุปฺปชฺชนฺติ เหตุปจฺจยา. (๓)

โนจิตฺตสหภุํ กุสลํ ธมฺมํ ปฏิจฺจ จิตฺตสหภู กุสโล ธมฺโม อุปฺปชฺชติ เหตุปจฺจยา. (๑)

จิตฺตสหภุํ กุสลญฺจ โนจิตฺตสหภุํ กุสลญฺจ ธมฺมํ ปฏิจฺจ จิตฺตสหภู กุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๕๔. เหตุยา ปญฺจ, อารมฺมเณ ปญฺจ…เป… อวิคเต ปญฺจ (สํขิตฺตํ). (สหชาตวารมฺปิ…เป… ปญฺหาวารมฺปิ วิตฺถาเรตพฺพํ).

๕๕. จิตฺตสหภุํ อกุสลํ ธมฺมํ ปฏิจฺจ จิตฺตสหภู อกุสโล ธมฺโม อุปฺปชฺชติ เหตุปจฺจยา… ตีณิ.

โนจิตฺตสหภุํ อกุสลํ ธมฺมํ ปฏิจฺจ จิตฺตสหภู อกุสโล ธมฺโม อุปฺปชฺชติ เหตุปจฺจยา. (๑)

จิตฺตสหภุํ อกุสลญฺจ โนจิตฺตสหภุํ อกุสลญฺจ ธมฺมํ ปฏิจฺจ จิตฺตสหภู อกุสโล ธมฺโม อุปฺปชฺชติ เหตุปจฺจยา. (๑) (สํขิตฺตํ.)

๕๖. เหตุยา ปญฺจ, อารมฺมเณ ปญฺจ…เป… อวิคเต ปญฺจ (สํขิตฺตํ).

(สหชาตวารมฺปิ…เป… ปญฺหาวารมฺปิ วิตฺถาเรตพฺพํ.)

๕๗. จิตฺตสหภุํ อพฺยากตํ ธมฺมํ ปฏิจฺจ จิตฺตสหภู อพฺยากโต ธมฺโม อุปฺปชฺชติ เหตุปจฺจยา… ตีณิ.

โนจิตฺตสหภุํ อพฺยากตํ ธมฺมํ ปฏิจฺจ โนจิตฺตสหภู อพฺยากโต ธมฺโม อุปฺปชฺชติ เหตุปจฺจยา… ตีณิ.

จิตฺตสหภุํ อพฺยากตญฺจ โนจิตฺตสหภุํ อพฺยากตญฺจ ธมฺมํ ปฏิจฺจ จิตฺตสหภู อพฺยากโต ธมฺโม อุปฺปชฺชติ เหตุปจฺจยา… ตีณิ (สํขิตฺตํ).

๕๘. เหตุยา นว, อารมฺมเณ นว…เป… อวิคเต นว. (สํขิตฺตํ. ยถา เจตสิกทุกมูลา ตีณิ คมนา, เอวํ อิเมปิ ตีณิ คมนา กาตพฺพา. สหชาตวารมฺปิ…เป… ปญฺหาวารมฺปิ วิตฺถาเรตพฺพํ.)