๑. วิภงฺควาโร

เหตุปจฺจโย

๑. อาสวํ ธมฺมํ ปฏิจฺจ อาสโว ธมฺโม อุปฺปชฺชติ เหตุปจฺจยา – กามาสวํ ปฏิจฺจ ทิฏฺฐาสโว อวิชฺชาสโว, ทิฏฺฐาสวํ ปฏิจฺจ กามาสโว อวิชฺชาสโว, อวิชฺชาสวํ ปฏิจฺจ กามาสโว ทิฏฺฐาสโว, ภวาสวํ ปฏิจฺจ อวิชฺชาสโว, ทิฏฺฐาสวํ ปฏิจฺจ อวิชฺชาสโว (เอเกกมฺปิ จกฺกํ กาตพฺพํ). (๑)

อาสวํ ธมฺมํ ปฏิจฺจ โนอาสโว ธมฺโม อุปฺปชฺชติ เหตุปจฺจยา – อาสวํ ปฏิจฺจ อาสวสมฺปยุตฺตกา ขนฺธา จิตฺตสมุฏฺฐานญฺจ รูปํ. (๒)

อาสวํ ธมฺมํ ปฏิจฺจ อาสโว จ โนอาสโว จ ธมฺมา อุปฺปชฺชนฺติ เหตุปจฺจยา – กามาสวํ ปฏิจฺจ ทิฏฺฐาสโว อวิชฺชาสโว สมฺปยุตฺตกา จ ขนฺธา จิตฺตสมุฏฺฐานญฺจ รูปํ (จกฺกํ). (๓)

๒. โนอาสวํ ธมฺมํ ปฏิจฺจ โนอาสโว ธมฺโม อุปฺปชฺชติ เหตุปจฺจยา – โนอาสวํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานํ รูปํ…เป… เทฺว ขนฺเธ…เป… ปฏิสนฺธิกฺขเณ…เป… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ…เป… มหาภูเต ปฏิจฺจ จิตฺตสมุฏฺฐานํ รูปํ กฏตฺตารูปํ อุปาทารูปํ. (๑)

โนอาสวํ ธมฺมํ ปฏิจฺจ อาสโว ธมฺโม อุปฺปชฺชติ เหตุปจฺจยา – โนอาสเว ขนฺเธ ปฏิจฺจ อาสวา. (๒)

โนอาสวํ ธมฺมํ ปฏิจฺจ อาสโว จ โนอาสโว จ ธมฺมา อุปฺปชฺชนฺติ เหตุปจฺจยา – โนอาสวํ เอกํ ขนฺธํ ปฏิจฺจ ตโย ขนฺธา อาสวา จ จิตฺตสมุฏฺฐานญฺจ รูปํ…เป… เทฺว ขนฺเธ…เป…. (๓)

๓. อาสวญฺจ โนอาสวญฺจ ธมฺมํ ปฏิจฺจ อาสโว ธมฺโม อุปฺปชฺชติ เหตุปจฺจยา – กามาสวญฺจ สมฺปยุตฺตเก จ ขนฺเธ ปฏิจฺจ ทิฏฺฐาสโว อวิชฺชาสโว (จกฺกํ พนฺธิตพฺพํ). (๑)

อาสวญฺจ โนอาสวญฺจ ธมฺมํ ปฏิจฺจ โนอาสโว ธมฺโม อุปฺปชฺชติ เหตุปจฺจยา – โนอาสวํ เอกํ ขนฺธญฺจ อาสเว จ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป…. (๒)

อาสวญฺจ โนอาสวญฺจ ธมฺมํ ปฏิจฺจ อาสโว จ โนอาสโว จ ธมฺมา อุปฺปชฺชนฺติ เหตุปจฺจยา – โนอาสวํ เอกํ ขนฺธญฺจ กามาสวญฺจ ปฏิจฺจ ตโย ขนฺธา ทิฏฺฐาสโว อวิชฺชาสโว จิตฺตสมุฏฺฐานญฺจ รูปํ…เป… เทฺว ขนฺเธ จ…เป… (จกฺกํ. สํขิตฺตํ). (๓)