๑-๔. ปจฺจยานุโลมาทิ

๖๒. อุปาทานสมฺปยุตฺตํ ธมฺมํ สํสฏฺโฐ อุปาทานสมฺปยุตฺโต ธมฺโม อุปฺปชฺชติ เหตุปจฺจยา – อุปาทานสมฺปยุตฺตํ เอกํ ขนฺธํ สํสฏฺฐา… ตีณิ.

อุปาทานวิปฺปยุตฺตํ ธมฺมํ สํสฏฺโฐ อุปาทานวิปฺปยุตฺโต ธมฺโม อุปฺปชฺชติ เหตุปจฺจยา (ปฏิจฺจสทิสํ, อรูปํเยว กาตพฺพํ).

อุปาทานวิปฺปยุตฺตํ ธมฺมํ สํสฏฺโฐ อุปาทานสมฺปยุตฺโต ธมฺโม อุปฺปชฺชติ เหตุปจฺจยา (ปฏิจฺจสทิสํ, อรูปํเยว กาตพฺพํ).

อุปาทานสมฺปยุตฺตญฺจ อุปาทานวิปฺปยุตฺตญฺจ ธมฺมํ สํสฏฺโฐ อุปาทานสมฺปยุตฺโต ธมฺโม อุปฺปชฺชติ เหตุปจฺจยา (ปฏิจฺจสทิสํ, อรูปํเยว กาตพฺพํ).

เหตุยา ฉ, อารมฺมเณ ฉ, อธิปติยา ฉ (สพฺพตฺถ ฉ), วิปาเก เอกํ…เป… อวิคเต ฉ.

อนุโลมํ.

อุปาทานวิปฺปยุตฺตํ ธมฺมํ สํสฏฺโฐ อุปาทานวิปฺปยุตฺโต ธมฺโม อุปฺปชฺชติ นเหตุปจฺจยา (สํขิตฺตํ).

นเหตุยา เอกํ, นอธิปติยา ฉ, นปุเรชาเต ฉ, นปจฺฉาชาเต ฉ, นอาเสวเน ฉ, นกมฺเม จตฺตาริ, นวิปาเก ฉ, นฌาเน เอกํ, นมคฺเค เอกํ, นวิปฺปยุตฺเต ฉ.

ปจฺจนียํ.