๕. สํสฏฺฐวาโร

๑-๔. ปจฺจยานุโลมาทิ

๒๕๕. จิตฺตสหภุํ ธมฺมํ สํสฏฺโฐ จิตฺตสหภู ธมฺโม อุปฺปชฺชติ เหตุปจฺจยา – จิตฺตสหภุํ เอกํ ขนฺธํ สํสฏฺฐา เทฺว ขนฺธา, เทฺว ขนฺเธ…เป… ปฏิสนฺธิกฺขเณ…เป…. (๑)

จิตฺตสหภุํ ธมฺมํ สํสฏฺโฐ โนจิตฺตสหภู ธมฺโม อุปฺปชฺชติ เหตุปจฺจยา – จิตฺตสหภู ขนฺเธ สํสฏฺฐํ จิตฺตํ; ปฏิสนฺธิกฺขเณ…เป…. (๒)

จิตฺตสหภุํ ธมฺมํ สํสฏฺโฐ จิตฺตสหภู จ โนจิตฺตสหภู จ ธมฺมา อุปฺปชฺชนฺติ เหตุปจฺจยา – จิตฺตสหภุํ เอกํ ขนฺธํ สํสฏฺฐา เทฺว ขนฺธา จิตฺตญฺจ, เทฺว ขนฺเธ…เป… ปฏิสนฺธิกฺขเณ…เป…. (๓)

๒๕๖. โนจิตฺตสหภุํ ธมฺมํ สํสฏฺโฐ จิตฺตสหภู ธมฺโม อุปฺปชฺชติ เหตุปจฺจยา – จิตฺตํ สํสฏฺฐา สมฺปยุตฺตกา ขนฺธา; ปฏิสนฺธิกฺขเณ…เป…. (๑)

จิตฺตสหภุญฺจ โนจิตฺตสหภุญฺจ ธมฺมํ สํสฏฺโฐ จิตฺตสหภู ธมฺโม อุปฺปชฺชติ เหตุปจฺจยา – จิตฺตสหภุํ เอกํ ขนฺธญฺจ จิตฺตญฺจ สํสฏฺฐา เทฺว ขนฺธา, เทฺว ขนฺเธ จ…เป… ปฏิสนฺธิกฺขเณ…เป… (สํขิตฺตํ). (๒)

เหตุยา ปญฺจ, อารมฺมเณ ปญฺจ (สพฺพตฺถ ปญฺจ), อวิคเต ปญฺจ.

อนุโลมํ.

นเหตุยา ปญฺจ (ตีณิ, โมโห), นอธิปติยา ปญฺจ, นปุเรชาเต ปญฺจ, นปจฺฉาชาเต ปญฺจ, นอาเสวเน ปญฺจ, นกมฺเม ตีณิ, นวิปาเก ปญฺจ, นฌาเน ปญฺจ, นมคฺเค ปญฺจ, นวิปฺปยุตฺเต ปญฺจ.