๑. วิภงฺควาโร

นอธิปติปจฺจยาทิ

๑๓๑. เหตุญฺเจว สเหตุกญฺจ ธมฺมํ ปฏิจฺจ เหตุ เจว สเหตุโก จ ธมฺโม อุปฺปชฺชติ นอธิปติปจฺจยา – อโลภํ ปฏิจฺจ อโทโส อโมโห (จกฺกํ); ปฏิสนฺธิกฺขเณ…เป… (ปริปุณฺณํ นว), นปุเรชาเต นว, นปจฺฉาชาเต นว, นอาเสวเน นว.

นกมฺมปจฺจยาทิ

๑๓๒. เหตุญฺเจว สเหตุกญฺจ ธมฺมํ ปฏิจฺจ สเหตุโก เจว น จ เหตุ ธมฺโม อุปฺปชฺชติ นกมฺมปจฺจยา – เหตุํ ปฏิจฺจ สมฺปยุตฺตกา เจตนา. (๑)

สเหตุกญฺเจว น จ เหตุํ ธมฺมํ ปฏิจฺจ สเหตุโก เจว น จ เหตุ ธมฺโม อุปฺปชฺชติ นกมฺมปจฺจยา – สเหตุเก เจว น จ เหตู ขนฺเธ ปฏิจฺจ สมฺปยุตฺตกา เจตนา; ปฏิสนฺธิกฺขเณ…เป….

เหตุญฺเจว สเหตุกญฺจ สเหตุกญฺเจว น จ เหตุญฺจ ธมฺมํ ปฏิจฺจ สเหตุโก เจว น จ เหตุ ธมฺโม อุปฺปชฺชติ นกมฺมปจฺจยา – เหตุญฺจ สมฺปยุตฺตเก จ ขนฺเธ ปฏิจฺจ สมฺปยุตฺตกา เจตนา… นวิปากปจฺจยา… นวิปฺปยุตฺตปจฺจยา.