๑-๔. ปจฺจยานุโลมาทิ

๑๖๙. นเหตุํ สเหตุกํ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา… ตีณิ.

นเหตุํ อเหตุกํ ธมฺมํ ปจฺจยา นเหตุ อเหตุโก ธมฺโม อุปฺปชฺชติ เหตุปจฺจยา – เอกํ มหาภูตํ ปจฺจยา ตโย มหาภูตา, มหาภูเต ปจฺจยา จิตฺตสมุฏฺฐานํ รูปํ, กฏตฺตารูปํ, อุปาทารูปํ. (๑)

นเหตุํ อเหตุกํ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา – วตฺถุํ ปจฺจยา นเหตู สเหตุกา ขนฺธา; ปฏิสนฺธิกฺขเณ…เป… (๒)

นเหตุํ อเหตุกํ ธมฺมํ ปจฺจยา นเหตุ สเหตุโก จ นเหตุ อเหตุโก จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา นเหตู สเหตุกา ขนฺธา, มหาภูเต ปจฺจยา จิตฺตสมุฏฺฐานํ รูปํ; ปฏิสนฺธิกฺขเณ…เป…(๓)

นเหตุํ สเหตุกญฺจ นเหตุํ อเหตุกญฺจ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา (ฆฏนา ตีณิ, ปวตฺติปฏิสนฺธิ ปริปุณฺณํ. สํขิตฺตํ).

๑๗๐. เหตุยา นว, อารมฺมเณ จตฺตาริ…เป… อญฺญมญฺเญ ฉ…เป… ปุเรชาเต อาเสวเน จตฺตาริ…เป… อวิคเต นว (เอวํ คเณตพฺพํ).

อนุโลมํ.

๑๗๑. นเหตุยา เอกํ, นอารมฺมเณ ตีณิ…เป… โนวิคเต ตีณิ.

ปจฺจนียํ.