๑. วิภงฺควาโร

นเหตุปจฺจโย

๖๓. ทสฺสเนน ปหาตพฺพํ ธมฺมํ สํสฏฺโฐ ทสฺสเนน ปหาตพฺโพ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต ขนฺเธ สํสฏฺโฐ วิจิกิจฺฉาสหคโต โมโห. (๑)

ภาวนาย ปหาตพฺพํ ธมฺมํ สํสฏฺโฐ ภาวนาย ปหาตพฺโพ ธมฺโม อุปฺปชฺชติ นเหตุปจฺจยา – อุทฺธจฺจสหคเต ขนฺเธ สํสฏฺโฐ อุทฺธจฺจสหคโต โมโห. (๑)

เนวทสฺสเนน นภาวนาย ปหาตพฺพํ ธมฺมํ สํสฏฺโฐ เนวทสฺสเนน นภาวนาย ปหาตพฺโพ ธมฺโม อุปฺปชฺชติ นเหตุปจฺจยา – อเหตุกํ เนวทสฺสเนน นภาวนาย ปหาตพฺพํ เอกํ ขนฺธํ สํสฏฺฐา ตโย ขนฺธา…เป… อเหตุกปฏิสนฺธิกฺขเณ…เป…. (๑)

นอธิปติปจฺจยาทิ

๖๔. ทสฺสเนน ปหาตพฺพํ ธมฺมํ สํสฏฺโฐ ทสฺสเนน ปหาตพฺโพ ธมฺโม อุปฺปชฺชติ นอธิปติปจฺจยา… นปุเรชาตปจฺจยา… นปจฺฉาชาตปจฺจยา… นอาเสวนปจฺจยา… นกมฺมปจฺจยา… นวิปากปจฺจยา… – เนวทสฺสเนน นภาวนาย…เป… นฌานปจฺจยา – ปญฺจวิญฺญาณํ…เป… นมคฺคปจฺจยา – อเหตุกํ…เป… เนวทสฺสเนน นภาวนาย ปหาตพฺโพ…เป… นวิปฺปยุตฺตปจฺจยา… ตีณิ.