๑. วิภงฺควาโร

เหตุปจฺจโย

๓๖. ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา… ตีณิ.

ภาวนาย ปหาตพฺพํ ธมฺมํ ปจฺจยา ภาวนาย… ตีณิ.

๓๗. เนวทสฺสเนน นภาวนาย ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ เหตุปจฺจยา – เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… ปฏิสนฺธิกฺขเณ เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา กฏตฺตา จ รูปํ…เป… เทฺว ขนฺเธ ปจฺจยา เทฺว ขนฺธา…เป… ขนฺเธ ปจฺจยา วตฺถุ, วตฺถุํ ปจฺจยา ขนฺธา. เอกํ มหาภูตํ ปจฺจยา ตโย มหาภูตา…เป… มหาภูเต ปจฺจยา จิตฺตสมุฏฺฐานํ รูปํ กฏตฺตารูปํ อุปาทารูปํ. วตฺถุํ ปจฺจยา เนวทสฺสเนน นภาวนาย ปหาตพฺพา ขนฺธา. (๑)

เนวทสฺสเนน นภาวนาย ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – วตฺถุํ ปจฺจยา ทสฺสเนน ปหาตพฺพา ขนฺธา. (๒)

เนวทสฺสเนน นภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ เหตุปจฺจยา – วตฺถุํ ปจฺจยา ภาวนาย ปหาตพฺพา ขนฺธา. (๓)

เนวทสฺสเนน นภาวนาย ปหาตพฺพํ ธมฺมํ ปจฺจยา ทสฺสเนน ปหาตพฺโพ จ เนวทสฺสเนน นภาวนาย ปหาตพฺโพ จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา ทสฺสเนน ปหาตพฺพา ขนฺธา; มหาภูเต ปจฺจยา จิตฺตสมุฏฺฐานํ รูปํ. (๔)

เนวทสฺสเนน นภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ จ เนวทสฺสเนน นภาวนาย ปหาตพฺโพ จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา ภาวนาย ปหาตพฺพา ขนฺธา; มหาภูเต ปจฺจยา จิตฺตสมุฏฺฐานํ รูปํ. (๕)

๓๘. ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ เหตุปจฺจยา – ทสฺสเนน ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ ปจฺจยา เทฺว ขนฺธา. (๑)

ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ เหตุปจฺจยา – ทสฺสเนน ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๒)

ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ จ เนวทสฺสเนน นภาวนาย ปหาตพฺโพ จ ธมฺมา อุปฺปชฺชนฺติ เหตุปจฺจยา – ทสฺสเนน ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ ปจฺจยา เทฺว ขนฺธา, ทสฺสเนน ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๓)

๓๙. ภาวนาย ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ เหตุปจฺจยา – ภาวนาย ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ…เป…. (๑)

ภาวนาย ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ เหตุปจฺจยา – ภาวนาย ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๒)

ภาวนาย ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ภาวนาย ปหาตพฺโพ จ เนวทสฺสเนน นภาวนาย ปหาตพฺโพ จ ธมฺมา อุปฺปชฺชนฺติ เหตุปจฺจยา – ภาวนาย ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ…เป… ภาวนาย ปหาตพฺเพ ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๓)

อารมฺมณปจฺจโย

๔๐. ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ อารมฺมณปจฺจยา – ทสฺสเนน ปหาตพฺพํ เอกํ ขนฺธํ ปจฺจยา ตโย ขนฺธา…เป… เทฺว ขนฺเธ…เป…. (๑)

ภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ อารมฺมณปจฺจยา – ภาวนาย ปหาตพฺพํ เอกํ ขนฺธํ ปจฺจยา ตโย ขนฺธา…เป…. (๑)

เนวทสฺสเนน นภาวนาย ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ อารมฺมณปจฺจยา – เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา…เป… เทฺว ขนฺเธ…เป…. ปฏิสนฺธิกฺขเณ เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา…เป… เทฺว ขนฺเธ…เป… วตฺถุํ ปจฺจยา ขนฺธา, จกฺขายตนํ ปจฺจยา จกฺขุวิญฺญาณํ…เป… กายายตนํ ปจฺจยา กายวิญฺญาณํ, วตฺถุํ ปจฺจยา เนวทสฺสเนน นภาวนาย ปหาตพฺพา ขนฺธา. (๑)

เนวทสฺสเนน นภาวนาย ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ อารมฺมณปจฺจยา – วตฺถุํ ปจฺจยา ทสฺสเนน ปหาตพฺพา ขนฺธา. (๒)

เนวทสฺสเนน นภาวนาย ปหาตพฺพํ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ อารมฺมณปจฺจยา – วตฺถุํ ปจฺจยา ภาวนาย ปหาตพฺพา ขนฺธา. (๓)

๔๑. ทสฺสเนน ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ อารมฺมณปจฺจยา – ทสฺสเนน ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ ปจฺจยา…เป…. (๑)

ภาวนาย ปหาตพฺพญฺจ เนวทสฺสเนน นภาวนาย ปหาตพฺพญฺจ ธมฺมํ ปจฺจยา ภาวนาย ปหาตพฺโพ ธมฺโม อุปฺปชฺชติ อารมฺมณปจฺจยา – ภาวนาย ปหาตพฺพํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺเธ จ วตฺถุญฺจ ปจฺจยา เทฺว ขนฺธา. (๑)

อธิปติปจฺจยาทิ

๔๒. ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ อธิปติปจฺจยา… (ปริปุณฺณํ, ปฏิสนฺธิ นตฺถิ) อนนฺตรปจฺจยา… สมนนฺตรปจฺจยา (อารมฺมณสทิสํ).

สหชาตปจฺจโย

ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ สหชาตปจฺจยา – ทสฺสเนน ปหาตพฺพํ เอกํ ขนฺธํ… ตีณิ.

ภาวนาย ปหาตพฺพํ ธมฺมํ ปจฺจยา… ตีณิ.

๔๓. เนวทสฺสเนน นภาวนาย ปหาตพฺพํ ธมฺมํ ปจฺจยา เนวทสฺสเนน นภาวนาย ปหาตพฺโพ ธมฺโม อุปฺปชฺชติ สหชาตปจฺจยา – เนวทสฺสเนน นภาวนาย ปหาตพฺพํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ ปจฺจยา เทฺว ขนฺธา…เป… ปฏิสนฺธิกฺขเณ…เป… ขนฺเธ ปจฺจยา วตฺถุ, วตฺถุํ ปจฺจยา ขนฺธา; เอกํ มหาภูตํ ปจฺจยา ตโย มหาภูตา…เป… มหาภูเต ปจฺจยา…เป… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ เอกํ…เป… จกฺขายตนํ ปจฺจยา จกฺขุวิญฺญาณํ…เป… กายายตนํ ปจฺจยา กายวิญฺญาณํ, วตฺถุํ ปจฺจยา เนวทสฺสเนน นภาวนาย ปหาตพฺพา ขนฺธา.

เนวทสฺสเนน นภาวนาย ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ สหชาตปจฺจยา (อวเสสา เหตุปจฺจยสทิสา).

อญฺญมญฺญปจฺจยาทิ

๔๔. ทสฺสเนน ปหาตพฺพํ ธมฺมํ ปจฺจยา ทสฺสเนน ปหาตพฺโพ ธมฺโม อุปฺปชฺชติ อญฺญมญฺญปจฺจยา… นิสฺสยปจฺจยา… อุปนิสฺสยปจฺจยา… ปุเรชาตปจฺจยา (ปฏิสนฺธิ นตฺถิ)… อาเสวนปจฺจยา… (ปฏิสนฺธิ นตฺถิ, วิปากญฺจ) กมฺมปจฺจยา… วิปากปจฺจยา… อาหารปจฺจยา… อินฺทฺริยปจฺจยา… ฌานปจฺจยา… มคฺคปจฺจยา… สมฺปยุตฺตปจฺจยา… วิปฺปยุตฺตปจฺจยา… อตฺถิปจฺจยา… นตฺถิปจฺจยา… วิคตปจฺจยา… อวิคตปจฺจยา.