๑๑. เสกฺขตฺติกํ

๑. ปฏิจฺจวาโร

๑. ปจฺจยานุโลมํ

๑. วิภงฺควาโร

เหตุปจฺจโย

๑. เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ เหตุปจฺจยา – เสกฺขํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ…เป…. (๑)

เสกฺขํ ธมฺมํ ปฏิจฺจ เนวเสกฺขนาเสกฺโข [เนวเสขานาเสโข (สี.), เนวเสกฺขานาเสกฺโข (สฺยา. ก.)] ธมฺโม อุปฺปชฺชติ เหตุปจฺจยา – เสกฺเข ขนฺเธ ปฏิจฺจ จิตฺตสมุฏฺฐานํ รูปํ. (๒)

เสกฺขํ ธมฺมํ ปฏิจฺจ เสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ เหตุปจฺจยา – เสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป…. (๓)

๒. อเสกฺขํ ธมฺมํ ปฏิจฺจ อเสกฺโข ธมฺโม อุปฺปชฺชติ เหตุปจฺจยา – อเสกฺขํ เอกํ ขนฺธํ ปฏิจฺจ ตโย ขนฺธา…เป…. (๑)

อเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ เหตุปจฺจยา – อเสกฺเข ขนฺเธ ปฏิจฺจ จิตฺตสมุฏฺฐานํ รูปํ. (๒)

อเสกฺขํ ธมฺมํ ปฏิจฺจ อเสกฺโข จ เนวเสกฺขนาเสกฺโข จ ธมฺมา…เป… อเสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป…. (๓)

๓. เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ เหตุปจฺจยา – เนวเสกฺขนาเสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… ปฏิสนฺธิกฺขเณ …เป… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ ปฏิจฺจ ตโย มหาภูตา…เป… เทฺว มหาภูเต ปฏิจฺจ เทฺว มหาภูตา, มหาภูเต ปฏิจฺจ จิตฺตสมุฏฺฐานํ รูปํ กฏตฺตารูปํ อุปาทารูปํ. (๑)

เสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ เหตุปจฺจยา – เสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

อเสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ เหตุปจฺจยา – อเสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

อารมฺมณปจฺจยาทิ

๔. เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ อารมฺมณปจฺจยา… อธิปติปจฺจยา (ปฏิสนฺธิ นตฺถิ)… อนนฺตรปจฺจยา… สมนนฺตรปจฺจยา… สหชาตปจฺจยา (สพฺเพ มหาภูตา กาตพฺพา)… อญฺญมญฺญปจฺจยา… นิสฺสยปจฺจยา… อุปนิสฺสยปจฺจยา… ปุเรชาตปจฺจยา… อาเสวนปจฺจยา – เสกฺขํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ…เป….

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ อาเสวนปจฺจยา – เนวเสกฺขนาเสกฺขํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ …เป… กมฺมปจฺจยา, วิปากปจฺจยา – วิปากํ เสกฺขํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ…เป… (ตีณิ, ปริปุณฺณํ).

อเสกฺขํ ธมฺมํ ปฏิจฺจ อเสกฺโข ธมฺโม อุปฺปชฺชติ วิปากปจฺจยา – อเสกฺขํ เอกํ ขนฺธํ ปฏิจฺจ… ตีณิ.

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ วิปากปจฺจยา – วิปากํ เนวเสกฺขนาเสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… ปฏิสนฺธิกฺขเณ…เป… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ…เป…. (๑)

เสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ วิปากปจฺจยา – วิปาเก เสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

อเสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ วิปากปจฺจยา – อเสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

อาหารปจฺจยาทิ

๕. เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ อาหารปจฺจยา… อินฺทฺริยปจฺจยา… ฌานปจฺจยา… มคฺคปจฺจย… สมฺปยุตฺตปจฺจยา… วิปฺปยุตฺตปจฺจยา… อตฺถิปจฺจยา… นตฺถิปจฺจยา… วิคตปจฺจยา… อวิคตปจฺจยา.

๑. ปจฺจยานุโลมํ

๒. สงฺขฺยาวาโร

สุทฺธํ

๖. เหตุยา นว, อารมฺมเณ ตีณิ, อธิปติยา นว, อนนฺตเร ตีณิ, สมนนฺตเร ตีณิ, สหชาเต นว, อญฺญมญฺเญ ตีณิ, นิสฺสเย นว, อุปนิสฺสเย ตีณิ, ปุเรชาเต ตีณิ, อาเสวเน เทฺว, กมฺเม นว, วิปาเก อาหาเร อินฺทฺริเย ฌาเน มคฺเค นว, สมฺปยุตฺเต ตีณิ, วิปฺปยุตฺเต นว, อตฺถิยา นว, นตฺถิยา ตีณิ, วิคเต ตีณิ, อวิคเต นว (เอวํ คเณตพฺพํ).

อนุโลมํ.

๒. ปจฺจยปจฺจนียํ

๑. วิภงฺควาโร

นเหตุปจฺจโย

๗. เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นเหตุปจฺจยา – อเหตุกํ เนวเสกฺขนาเสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป… อเหตุกปฏิสนฺธิกฺขเณ…เป… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธา, เอกํ มหาภูตํ…เป… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ เอกํ มหาภูตํ…เป… วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต อุทฺธจฺจสหคโต โมโห. (๑)

นอารมฺมณปจฺจโย

๘. เสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา – เสกฺเข ขนฺเธ ปฏิจฺจ จิตฺตสมุฏฺฐานํ รูปํ. (๑)

อเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา – อเสกฺเข ขนฺเธ ปฏิจฺจ จิตฺตสมุฏฺฐานํ รูปํ. (๑)

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา – เนวเสกฺขนาเสกฺเข ขนฺเธ ปฏิจฺจ จิตฺตสมุฏฺฐานํ รูปํ…เป… ปฏิสนฺธิกฺขเณ…เป… ขนฺเธ ปฏิจฺจ วตฺถุ…เป… เอกํ มหาภูตํ…เป… อสญฺญสตฺตานํ…เป…. (๑)

เสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา – เสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

อเสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา – อเสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

นอธิปติปจฺจยาทิ

๙. เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ นอธิปติปจฺจยา – เสกฺเข ขนฺเธ ปฏิจฺจ เสกฺโข อธิปติ. (๑)

อเสกฺขํ ธมฺมํ ปฏิจฺจ อเสกฺโข ธมฺโม อุปฺปชฺชติ นอธิปติปจฺจยา – อเสกฺเข ขนฺเธ ปฏิจฺจ อเสกฺโข อธิปติ. (๑)

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอธิปติปจฺจยา… (ปริปุณฺณํ, ปฏิสนฺธิปิ มหาภูตาปิ สพฺเพ) นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยา… นปุเรชาตปจฺจยา… สตฺต (กุสลตฺติกสทิสา)… นปจฺฉาชาตปจฺจยา…เป… นอาเสวนปจฺจยา. วิปากํ เสกฺขํ เอกํ ขนฺธํ ปฏิจฺจ ตโย ขนฺธา…เป… เทฺว ขนฺเธ…เป…. (๑)

๑๐. เสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอาเสวนปจฺจยา – เสกฺเข ขนฺเธ ปฏิจฺจ จิตฺตสมุฏฺฐานํ รูปํ. (๒)

เสกฺขํ ธมฺมํ ปฏิจฺจ เสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ นอาเสวนปจฺจยา – วิปากํ เสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺเธ…เป…. (๓)

อเสกฺขํ ธมฺมํ ปฏิจฺจ อเสกฺโข ธมฺโม… ตีณิ.

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอาเสวนปจฺจยา… เนวเสกฺขนาเสกฺขํ (เอกํ, ปริปุณฺณํ, เสกฺขญฺจ, เนวเสกฺขนาเสกฺขญฺจ, ฆฏนา ปริปุณฺณา, เทฺวปิ กาตพฺพา. นว) นกมฺมปจฺจยา – เสกฺเข ขนฺเธ ปฏิจฺจ เสกฺขา เจตนา.

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นกมฺมปจฺจยา – เนวเสกฺขนาเสกฺเข ขนฺเธ ปฏิจฺจ เนวเสกฺขนาเสกฺขา เจตนา; พาหิรํ… อาหารสมุฏฺฐานํ… อุตุสมุฏฺฐานํ… เอกํ มหาภูตํ…เป….

นวิปากปจฺจโย

๑๑. เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ นวิปากปจฺจยา – เสกฺขํ เอกํ ขนฺธํ ปฏิจฺจ ตโย ขนฺธา…เป…. (๑)

เสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นวิปากปจฺจยา – เสกฺเข ขนฺเธ ปฏิจฺจ จิตฺตสมุฏฺฐานํ รูปํ.(๒)

เสกฺขํ ธมฺมํ ปฏิจฺจ เสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ นวิปากปจฺจยา – เสกฺขํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป…. (๓)

๑๒. เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นวิปากปจฺจยา (ปริปุณฺณํ, ปฏิสนฺธิ นตฺถิ ).

เสกฺขญฺจ เนวเสกฺขนาเสกฺขญฺจ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นวิปากปจฺจยา – เสกฺเข ขนฺเธ จ มหาภูเต จ ปฏิจฺจ จิตฺตสมุฏฺฐานํ รูปํ. (๑)

นอาหารปจฺจยาทิ

๑๓. เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นอาหารปจฺจยา… นอินฺทฺริยปจฺจยา… นฌานปจฺจยา… นมคฺคปจฺจยา.

นสมฺปยุตฺตปจฺจโย

๑๔. เสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นสมฺปยุตฺตปจฺจยา…เป… (นอารมฺมณปจฺจยสทิสํ).

นวิปฺปยุตฺตปจฺจยาทิ

เสกฺขํ ธมฺมํ ปฏิจฺจ เสกฺโข ธมฺโม อุปฺปชฺชติ นวิปฺปยุตฺตปจฺจยา. อรูเป เสกฺขํ เอกํ ขนฺธํ ปฏิจฺจ ตโย ขนฺธา…เป…. (๑)

อเสกฺขํ ธมฺมํ ปฏิจฺจ อเสกฺโข ธมฺโม อุปฺปชฺชติ นวิปฺปยุตฺตปจฺจยา – อรูเป อเสกฺขํ เอกํ ขนฺธํ ปฏิจฺจ ตโย ขนฺธา…เป…. (๑)

เนวเสกฺขนาเสกฺขํ ธมฺมํ ปฏิจฺจ เนวเสกฺขนาเสกฺโข ธมฺโม อุปฺปชฺชติ นวิปฺปยุตฺตปจฺจยา – อรูเป เนวเสกฺขนาเสกฺขํ เอกํ ขนฺธํ ปฏิจฺจ ตโย ขนฺธา…เป… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป… โนนตฺถิปจฺจยา… โนวิคตปจฺจยา.

๒. ปจฺจยปจฺจนียํ

๒. สงฺขฺยาวาโร

สุทฺธํ

๑๕. นเหตุยา เอกํ, นอารมฺมเณ ปญฺจ, นอธิปติยา ตีณิ, นอนนฺตเร นสมนนฺตเร นอญฺญมญฺเญ นอุปนิสฺสเย ปญฺจ, นปุเรชาเต สตฺต, นปจฺฉาชาเต นว, นอาเสวเน นว, นกมฺเม เทฺว, นวิปาเก ปญฺจ, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ).

ปจฺจนียํ.

๓. ปจฺจยานุโลมปจฺจนียํ

เหตุทุกํ

๑๖. เหตุปจฺจยา นอารมฺมเณ ปญฺจ, นอธิปติยา ตีณิ, นอนนฺตเร นสมนนฺตเร นอญฺญมญฺเญ นอุปนิสฺสเย ปญฺจ, นปุเรชาเต สตฺต, นปจฺฉาชาเต นอาเสวเน นว, นกมฺเม เทฺว, นวิปาเก ปญฺจ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ).

อนุโลมปจฺจนียํ.

๔. ปจฺจยปจฺจนียานุโลมํ

นเหตุทุกํ

๑๗. นเหตุปจฺจยา อารมฺมเณ เอกํ, อนนฺตเร สมนนฺตเร สหชาเต อญฺญมญฺเญ นิสฺสเย อุปนิสฺสเย ปุเรชาเต อาเสวเน กมฺเม วิปาเก อาหาเร อินฺทฺริเย ฌาเน มคฺเค สมฺปยุตฺเต วิปฺปยุตฺเต อตฺถิยา นตฺถิยา วิคเต อวิคเต เอกํ (เอวํ คเณตพฺพํ).

ปจฺจนียานุโลมํ.

ปฏิจฺจวาโร.

๒. สหชาตวาโร

(สหชาตวาโร ปฏิจฺจวารสทิโส.)

๓. ปจฺจยวาโร

๑. ปจฺจยานุโลมํ

๑. วิภงฺควาโร

เหตุปจฺจโย

๑๘. เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ เหตุปจฺจยา… ตีณิ (ปฏิจฺจวารสทิสํ).

อเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ เหตุปจฺจยา… ตีณิ (ปฏิจฺจวารสทิสํ).

๑๙. เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ เหตุปจฺจยา (ปริปุณฺณํ), มหาภูเต ปจฺจยา จิตฺตสมุฏฺฐานํ รูปํ กฏตฺตารูปํ อุปาทารูปํ, วตฺถุํ ปจฺจยา เนวเสกฺขนาเสกฺขา ขนฺธา. (๑)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ เหตุปจฺจยา – วตฺถุํ ปจฺจยา เสกฺขา ขนฺธา. (๒)

เนวเสกฺขนาเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ เหตุปจฺจยา – วตฺถุํ ปจฺจยา อเสกฺขา ขนฺธา. (๓)

เนวเสกฺขนาเสกฺขํ ธมฺมํ ปจฺจยา เสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา เสกฺขา ขนฺธา, มหาภูเต ปจฺจยา จิตฺตสมุฏฺฐานํ รูปํ. (๔)

เนวเสกฺขนาเสกฺขํ ธมฺมํ ปจฺจยา อเสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา อเสกฺขา ขนฺธา, มหาภูเต ปจฺจยา จิตฺตสมุฏฺฐานํ รูปํ. (๕)

๒๐. เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ เหตุปจฺจยา – เสกฺขํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺธา. (๑)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ เหตุปจฺจยา – เสกฺเข ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๒)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข จ เนวเสกฺขนาเสกฺโข จ ธมฺมา อุปฺปชฺชนฺติ เหตุปจฺจยา – เสกฺขํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺธา. เสกฺเข ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ. (๓)

อเสกฺขญฺจ เนวเสกฺขนาเสกฺขญฺจ ธมฺมํ ปจฺจยา… ตีณิ (เสกฺขสทิสา).

อารมฺมณปจฺจโย

๒๑. เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ อารมฺมณปจฺจยา… เอกํ.

อเสกฺขํ ธมฺมํ ปจฺจยา อเสกฺโข ธมฺโม… เอกํ.

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ อารมฺมณปจฺจยา… เอกํ, วตฺถุํ ปจฺจยา เนวเสกฺขนาเสกฺขา ขนฺธา, จกฺขายตนํ ปจฺจยา จกฺขุวิญฺญาณํ…เป… กายายตนํ ปจฺจยา กายวิญฺญาณํ, วตฺถุํ ปจฺจยา เนวเสกฺขนาเสกฺขา ขนฺธา. (๑)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ อารมฺมณปจฺจยา – วตฺถุํ ปจฺจยา เสกฺขา ขนฺธา. (๒)

เนวเสกฺขนาเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ อารมฺมณปจฺจยา – วตฺถุํ ปจฺจยา อเสกฺขา ขนฺธา. (๓)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ อารมฺมณปจฺจยา – เสกฺขํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺธา. (๑)

อเสกฺขญฺจ เนวเสกฺขนาเสกฺขญฺจ ธมฺมํ ปจฺจยา อเสกฺโข ธมฺโม อุปฺปชฺชติ อารมฺมณปจฺจยา – อเสกฺขํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺธา. (๑)

อธิปติปจฺจยาทิ

๒๒. เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ อธิปติปจฺจยา… อนนฺตรปจฺจยา… สมนนฺตรปจฺจยา… สหชาตปจฺจยา… อญฺญมญฺญปจฺจย… นิสฺสยปจฺจยา … อุปนิสฺสยปจฺจยา… ปุเรชาตปจฺจยา… อาเสวนปจฺจยา – เสกฺขํ เอกํ ขนฺธํ ปจฺจยา ตโย ขนฺธา…เป…

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ อาเสวนปจฺจยา – เนวเสกฺขนาเสกฺขํ เอกํ ขนฺธํ ปจฺจยา…เป… วตฺถุํ ปจฺจยา เนวเสกฺขนาเสกฺขา ขนฺธา. (๑)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ อาเสวนปจฺจยา – วตฺถุํ ปจฺจยา เสกฺขา ขนฺธา. (๒)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ อาเสวนปจฺจยา – เสกฺขํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป… เทฺว ขนฺธา. (๑)

กมฺมปจฺจยาทิ

๒๓. เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ กมฺมปจฺจยา… วิปากปจฺจยา – วิปากํ เสกฺขํ เอกํ ขนฺธํ…เป… อาหารปจฺจยา… อินฺทฺริยปจฺจยา… ฌานปจฺจยา… มคฺคปจฺจยา… สมฺปยุตฺตปจฺจยา… วิปฺปยุตฺตปจฺจยา… อตฺถิปจฺจยา… นตฺถิปจฺจยา… วิคตปจฺจยา… อวิคตปจฺจยา.

๑. ปจฺจยานุโลมํ

๒. สงฺขฺยาวาโร

สุทฺธํ

๒๔. เหตุยา สตฺตรส, อารมฺมเณ สตฺต, อธิปติยา สตฺตรส, อนนฺตเร สตฺต, สมนนฺตเร สตฺต, สหชาเต สตฺตรส, อญฺญมญฺเญ สตฺต, นิสฺสเย สตฺตรส, อุปนิสฺสเย สตฺต, ปุเรชาเต สตฺต, อาเสวเน จตฺตาริ, กมฺเม สตฺตรส, วิปาเก สตฺตรส, อาหาเร สตฺตรส, อินฺทฺริเย ฌาเน มคฺเค สตฺตรส, สมฺปยุตฺเต สตฺต, วิปฺปยุตฺเต สตฺตรส, อตฺถิยา สตฺตรส, นตฺถิยา สตฺต, วิคเต สตฺต, อวิคเต สตฺตรส (เอวํ คเณตพฺพํ).

อนุโลมํ.

๒. ปจฺจยปจฺจนียํ

๑. วิภงฺควาโร

นเหตุปจฺจโย

๒๕. เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นเหตุปจฺจยา – อเหตุกํ เนวเสกฺขนาเสกฺขํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป… เทฺว ขนฺธา. อเหตุกปฏิสนฺธิกฺขเณ…เป… ขนฺเธ ปจฺจยา วตฺถุ, วตฺถุํ ปจฺจยา ขนฺธา, เอกํ มหาภูตํ ปจฺจยา…เป… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป… จกฺขายตนํ ปจฺจยา จกฺขุวิญฺญาณํ…เป… กายายตนํ ปจฺจยา กายวิญฺญาณํ, วตฺถุํ ปจฺจยา อเหตุกา เนวเสกฺขนาเสกฺขา ขนฺธา, วิจิกิจฺฉาสหคเต อุทฺธจฺจสหคเต ขนฺเธ จ วตฺถุญฺจ ปจฺจยา วิจิกิจฺฉาสหคโต อุทฺธจฺจสหคโต โมโห. (๑)

นอารมฺมณปจฺจยาทิ

๒๖. เสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอารมฺมณปจฺจยา…เป…. (๑)

เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – เสกฺเข ขนฺเธ ปจฺจยา เสกฺโข อธิปติ. (๑)

อเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – อเสกฺเข ขนฺเธ ปจฺจยา อเสกฺโข อธิปติ. (๑)

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอธิปติปจฺจยา (ปริปุณฺณํ) อสญฺญสตฺตานํ…เป… จกฺขายตนํ…เป… วตฺถุํ ปจฺจยา เนวเสกฺขนาเสกฺขา ขนฺธา. (๑)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – วตฺถุํ ปจฺจยา เสกฺโข อธิปติ. (๒)

เนวเสกฺขนาเสกฺขํ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – วตฺถุํ ปจฺจยา อเสกฺโข อธิปติ. (๓)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ นอธิปติปจฺจยา – เสกฺเข ขนฺเธ จ วตฺถุญฺจ ปจฺจยา เสกฺโข อธิปติ. (๑)

อเสกฺขญฺจ เนวเสกฺขนาเสกฺขญฺจ ธมฺมํ ปจฺจยา อเสกฺโข ธมฺโม อุปฺปชฺชติ นอธิปติปจฺจยา – อเสกฺเข ขนฺเธ จ วตฺถุญฺจ ปจฺจยา อเสกฺโข อธิปติ. (๑)

นอนนฺตรปจฺจยาทิ

๒๗. เสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยา… นปุเรชาตปจฺจยา… นปจฺฉาชาตปจฺจยา (สตฺต)… นอาเสวนปจฺจยา… นกมฺมปจฺจยา – เสกฺเข ขนฺเธ ปจฺจยา เสกฺขา เจตนา.

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นกมฺมปจฺจยา – เนวเสกฺขนาเสกฺเข ขนฺเธ ปจฺจยา เนวเสกฺขนาเสกฺขา เจตนา. พาหิรํ… อาหารสมุฏฺฐานํ… อุตุสมุฏฺฐานํ…เป… วตฺถุํ ปจฺจยา เนวเสกฺขนาเสกฺขา เจตนา. (๑)

เนวเสกฺขนาเสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นกมฺมปจฺจยา – วตฺถุํ ปจฺจยา เสกฺขา เจตนา. (๒)

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ นกมฺมปจฺจยา – เสกฺเข ขนฺเธ จ วตฺถุญฺจ ปจฺจยา เสกฺขา เจตนา. (๑)

นวิปากปจฺจโย

๒๘. เสกฺขํ ธมฺมํ ปจฺจยา เสกฺโข ธมฺโม อุปฺปชฺชติ นวิปากปจฺจยา (เสกฺขมูลเก ตีณิ).

เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นวิปากปจฺจยา (เนวเสกฺขนาเสกฺขมูลเก ตีณิ).

เสกฺขญฺจ เนวเสกฺขนาเสกฺขญฺจ ธมฺมํ ปจฺจยา เสกฺโข ธมฺโม อุปฺปชฺชติ นวิปากปจฺจยา (เสกฺขฆฏเนสุ ตีณิ).

นอาหารปจฺจยาทิ

๒๙. เนวเสกฺขนาเสกฺขํ ธมฺมํ ปจฺจยา เนวเสกฺขนาเสกฺโข ธมฺโม อุปฺปชฺชติ นอาหารปจฺจยา… นอินฺทฺริยปจฺจยา… นฌานปจฺจยา… นมคฺคปจฺจยา… นสมฺปยุตฺตปจฺจยา… นวิปฺปยุตฺตปจฺจยา… โนนตฺถิปจฺจยา… โนวิคตปจฺจยา…เป….

๒. ปจฺจยปจฺจนียํ

๒. สงฺขฺยาวาโร

สุทฺธํ

๓๐. นเหตุยา เอกํ, นอารมฺมเณ ปญฺจ, นอธิปติยา สตฺต, นอนนฺตเร ปญฺจ, นสมนนฺตเร ปญฺจ, นอญฺญมญฺเญ ปญฺจ, นอุปนิสฺสเย ปญฺจ, นปุเรชาเต สตฺต, นปจฺฉาชาเต สตฺตรส, นอาเสวเน สตฺตรส, นกมฺเม จตฺตาริ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ).

ปจฺจนียํ.

๓. ปจฺจยานุโลมปจฺจนียํ

เหตุทุกํ

๓๑. เหตุปจฺจยา นอารมฺมเณ ปญฺจ, นอธิปติยา สตฺต, นอนนฺตเร นสมนนฺตเร นอญฺญมญฺเญ นอุปนิสฺสเย ปญฺจ, นปุเรชาเต สตฺต, นปจฺฉาชาเต สตฺตรส, นอาเสวเน สตฺตรส, นกมฺเม จตฺตาริ, นวิปาเก นว, นสมฺปยุตฺเต ปญฺจ, นวิปฺปยุตฺเต ตีณิ, โนนตฺถิยา ปญฺจ, โนวิคเต ปญฺจ (เอวํ คเณตพฺพํ).

อนุโลมปจฺจนียํ.

๔. ปจฺจยปจฺจนียานุโลมํ

๓๒. นเหตุปจฺจยา อารมฺมเณ เอกํ, อนนฺตเร สมนนฺตเร สหชาเต อญฺญมญฺเญ เอกํ…เป… อวิคเต เอกํ (เอวํ คเณตพฺพํ).

ปจฺจนียานุโลมํ.

ปจฺจยวาโร.

๔. นิสฺสยวาโร