๑. วิภงฺควาโร

นเหตุปจฺจโย

๔๐. อาจยคามึ ธมฺมํ สํสฏฺโฐ อาจยคามี ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ สํสฏฺโฐ วิจิกิจฺฉาสหคโต อุทฺธจฺจสหคโต โมโห. (๑)

เนวาจยคามินาปจยคามึ ธมฺมํ สํสฏฺโฐ เนวาจยคามินาปจยคามี ธมฺโม อุปฺปชฺชติ นเหตุปจฺจยา – อเหตุกํ เนวาจยคามินาปจยคามึ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ…เป… อเหตุกปฏิสนฺธิกฺขเณ…เป…. (๑)

นอธิปติปจฺจยาทิ

๔๑. อาจยคามึ ธมฺมํ สํสฏฺโฐ อาจยคามี ธมฺโม อุปฺปชฺชติ นอธิปติปจฺจยา… นปุเรชาตปจฺจยา… นปจฺฉาชาตปจฺจยา… นอาเสวนปจฺจยา… อาจยคามึ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ…เป….

เนวาจยคามินาปจยคามึ ธมฺมํ สํสฏฺโฐ เนวาจยคามินาปจยคามี ธมฺโม อุปฺปชฺชติ นอาเสวนปจฺจยา – เนวาจยคามินาปจยคามึ เอกํ ขนฺธํ สํสฏฺฐา…เป… ปฏิสนฺธิกฺขเณ…เป… นกมฺมปจฺจยา… นวิปากปจฺจยา… นฌานปจฺจยา… นมคฺคปจฺจยา… นวิปฺปยุตฺตปจฺจยา.