๑. วิภงฺควาโร

เหตุปจฺจโย

๓๓๘. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ เหตุปจฺจยา – กุสลํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา. (๑)

อกุสลํ ธมฺมํ สํสฏฺโฐ อกุสโล ธมฺโม อุปฺปชฺชติ เหตุปจฺจยา – อกุสลํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา. (๑)

อพฺยากตํ ธมฺมํ สํสฏฺโฐ อพฺยากโต ธมฺโม อุปฺปชฺชติ เหตุปจฺจยา – วิปากาพฺยากตํ กิริยาพฺยากตํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา; ปฏิสนฺธิกฺขเณ วิปากาพฺยากตํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา. (๑)

อารมฺมณาทิปจฺจยา

๓๓๙. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ อารมฺมณปจฺจยา… อธิปติปจฺจยา… (อธิปติ ปฏิสนฺธิกฺขเณ นตฺถิ.) อนนฺตรปจฺจยา… สมนนฺตรปจฺจยา… สหชาตปจฺจยา… อญฺญมญฺญปจฺจยา… นิสฺสยปจฺจยา… อุปนิสฺสยปจฺจยา. (สพฺพานิ ปทานิ เหตุมูลกสทิสานิ).

ปุเรชาตปจฺจโย

๓๔๐. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ ปุเรชาตปจฺจยา – กุสลํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา, วตฺถุํ ปุเรชาตปจฺจยา. (๑)

อกุสลํ ธมฺมํ สํสฏฺโฐ อกุสโล ธมฺโม อุปฺปชฺชติ ปุเรชาตปจฺจยา – อกุสลํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา; วตฺถุํ ปุเรชาตปจฺจยา. (๑)

อพฺยากตํ ธมฺมํ สํสฏฺโฐ อพฺยากโต ธมฺโม อุปฺปชฺชติ ปุเรชาตปจฺจยา – วิปากาพฺยากตํ กิริยาพฺยากตํ เอกํ ขนฺธํ สํสฏฺฐา ตโย ขนฺธา, ตโย ขนฺเธ สํสฏฺโฐ เอโก ขนฺโธ, เทฺว ขนฺเธ สํสฏฺฐา เทฺว ขนฺธา; วตฺถุํ ปุเรชาตปจฺจยา. (๑)

อาเสวนปจฺจโย

๓๔๑. กุสลํ ธมฺมํ สํสฏฺโฐ…เป… อกุสลํ ธมฺมํ…เป… อพฺยากตํ ธมฺมํ สํสฏฺโฐ อพฺยากโต ธมฺโม อุปฺปชฺชติ อาเสวนปจฺจยา – กิริยาพฺยากตํ เอกํ ขนฺธํ สํสฏฺฐา…เป….

กมฺมปจฺจโย

๓๔๒. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ กมฺมปจฺจยา…เป… อกุสลํ ธมฺมํ สํสฏฺโฐ…เป… อพฺยากตํ ธมฺมํ สํสฏฺโฐ…เป….

วิปากปจฺจโย

๓๔๓. อพฺยากตํ ธมฺมํ สํสฏฺโฐ อพฺยากโต ธมฺโม อุปฺปชฺชติ วิปากปจฺจยา – วิปากาพฺยากตํ…เป….

อาหาราทิปจฺจยา

๓๔๔. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ อาหารปจฺจยา… อินฺทฺริยปจฺจยา … ฌานปจฺจยา… มคฺคปจฺจยา… สมฺปยุตฺตปจฺจยา. (อิมานิ ปทานิ เหตุปจฺจยสทิสานิ.)

วิปฺปยุตฺตปจฺจโย

๓๔๕. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ วิปฺปยุตฺตปจฺจยา – กุสลํ เอกํ ขนฺธํ สํสฏฺฐา ตโย ขนฺธา…เป… เทฺว ขนฺเธ สํสฏฺฐา เทฺว ขนฺธา; วตฺถุํ วิปฺปยุตฺตปจฺจยา.

อกุสลํ ธมฺมํ…เป… วตฺถุํ วิปฺปยุตฺตปจฺจยา.

อพฺยากตํ ธมฺมํ…เป… วตฺถุํ วิปฺปยุตฺตปจฺจยา.

อตฺถิอาทิปจฺจยา

๓๔๖. กุสลํ ธมฺมํ สํสฏฺโฐ กุสโล ธมฺโม อุปฺปชฺชติ อตฺถิปจฺจยา… นตฺถิปจฺจยา… วิคตปจฺจยา… อวิคตปจฺจยา (เหตุปจฺจยสทิสํ).