๑๙. เอกูนวีสติมวคฺโค

(๑๙๐) ๕. ตถตากถา

๘๔๑. สพฺพธมฺมานํ ตถตา อสงฺขตาติ? อามนฺตา. นิพฺพานํ…เป… อมตนฺติ? น เหวํ วตฺตพฺเพ…เป… สพฺพธมฺมานํ ตถตา อสงฺขตา, นิพฺพานํ อสงฺขตนฺติ? อามนฺตา. เทฺว อสงฺขตานีติ? น เหวํ วตฺตพฺเพ…เป… เทฺว อสงฺขตานีติ? อามนฺตา. เทฺว ตาณานิ…เป… อนฺตริกา วาติ? น เหวํ วตฺตพฺเพ…เป….

๘๔๒. รูปสฺส รูปตา, นนุ รูปตา อสงฺขตาติ? อามนฺตา. นิพฺพานํ…เป… อมตนฺติ? น เหวํ วตฺตพฺเพ…เป… รูปสฺส รูปตา, นนุ รูปตา อสงฺขตา, นิพฺพานํ อสงฺขตนฺติ? อามนฺตา. เทฺว อสงฺขตานีติ? น เหวํ วตฺตพฺเพ…เป… เทฺว อสงฺขตานีติ? อามนฺตา. เทฺว ตาณานิ…เป… อนฺตริกา วาติ? น เหวํ วตฺตพฺเพ…เป….

เวทนาย เวทนตา, นนุ เวทนตา…เป… สญฺญาย สญฺญตา, นนุ สญฺญตา…เป… สงฺขารานํ สงฺขารตา, นนุ สงฺขารตา…เป… วิญฺญาณสฺส วิญฺญาณตา, นนุ วิญฺญาณตา อสงฺขตาติ? อามนฺตา. นิพฺพานํ…เป… อมตนฺติ? น เหวํ วตฺตพฺเพ …เป….

รูปสฺส รูปตา, นนุ รูปตา…เป… วิญฺญาณสฺส วิญฺญาณตา, นนุ วิญฺญาณตา อสงฺขตา, นิพฺพานํ อสงฺขตนฺติ? อามนฺตา. ฉ อสงฺขตานีติ? น เหวํ วตฺตพฺเพ…เป… ฉ อสงฺขตานีติ? อามนฺตา. ฉ ตาณานิ…เป… อนฺตริกา วาติ? น เหวํ วตฺตพฺเพ…เป….

๘๔๓. น วตฺตพฺพํ – ‘‘สพฺพธมฺมานํ ตถตา อสงฺขตา’’ติ? อามนฺตา. สพฺพธมฺมานํ ตถตา รูปํ… เวทนา… สญฺญา… สงฺขารา… วิญฺญาณนฺติ? น เหวํ วตฺตพฺเพ. เตน หิ สพฺพธมฺมานํ ตถตา อสงฺขตาติ.

ตถตากถา นิฏฺฐิตา.