๑๗. สตฺตรสมวคฺโค

(๑๗๓) ๘. น วตฺตพฺพํ สงฺโฆ ภุญฺชตีติกถา

๗๙๕. น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตา. นนุ อตฺถิ เกจิ สงฺฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺตีติ? อามนฺตา. หญฺจิ อตฺถิ เกจิ สงฺฆภตฺตานิ กโรนฺติ, อุทฺเทสภตฺตานิ กโรนฺติ, ยาคุปานานิ กโรนฺติ, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติ.

น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตา. นนุ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชน’’นฺติ? อามนฺตา. หญฺจิ วุตฺตํ ภควตา – ‘‘คณโภชนํ ปรมฺปรโภชนํ อติริตฺตโภชนํ อนติริตฺตโภชนํ’’, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติ.

น วตฺตพฺพํ – ‘‘สงฺโฆ ภุญฺชติ ปิวติ ขาทติ สายตี’’ติ? อามนฺตา. นนุ อฏฺฐ ปานานิ วุตฺตานิ ภควตา – อมฺพปานํ, ชมฺพุปานํ, โจจปานํ, โมจปานํ, มธุกปานํ, [มธุปานํ (สี. สฺยา. กํ. ปี.) มหาว. ๓๐๐ ปน ปสฺสิตพฺพํ] มุทฺทิกปานํ, สาลุกปานํ, ผารุสกปานนฺติ? อามนฺตา. หญฺจิ อฏฺฐ ปานานิ วุตฺตานิ ภควตา – อมฺพปานํ, ชมฺพุปานํ, โจจปานํ, โมจปานํ, มธุกปานํ, มุทฺทิกปานํ, สาลุกปานํ, ผารุสกปานํ, เตน วต เร วตฺตพฺเพ – ‘‘สงฺโฆ ภุญฺชติ ปิวติ ขาทติ สายตี’’ติ.

๗๙๖. สงฺโฆ ภุญฺชติ ปิวติ ขาทติ สายตีติ? อามนฺตา. มคฺโค ภุญฺชติ ปิวติ ขาทติ สายติ, ผลํ ภุญฺชติ ปิวติ ขาทติ สายตีติ? น เหวํ วตฺตพฺเพ…เป….

น วตฺตพฺพํ สงฺโฆ ภุญฺชตีติกถา นิฏฺฐิตา.