๑๗. สตฺตรสมวคฺโค

(๑๗๕) ๑๐. น วตฺตพฺพํ พุทฺธสฺสทินฺนํ มหปฺผลนฺติกถา

๗๙๙. น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตา. นนุ ภควา ทฺวิปทานํ อคฺโค, ทฺวิปทานํ เสฏฺโฐ, ทฺวิปทานํ ปโมกฺโข, ทฺวิปทานํ อุตฺตโม, ทฺวิปทานํ ปวโร อสโม อสมสโม อปฺปฏิสโม อปฺปฏิภาโค อปฺปฏิปุคฺคโลติ? อามนฺตา. หญฺจิ ภควา ทฺวิปทานํ อคฺโค, ทฺวิปทานํ เสฏฺโฐ, ทฺวิปทานํ ปโมกฺโข, ทฺวิปทานํ อุตฺตโม, ทฺวิปทานํ ปวโร อสโม อสมสโม อปฺปฏิสโม อปฺปฏิภาโค อปฺปฏิปุคฺคโล, เตน วต เร วตฺตพฺเพ – ‘‘พุทฺธสฺส ทินฺนํ มหปฺผล’’นฺติ.

น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตา. อตฺถิ โกจิ พุทฺเธน สมสโม – สีเลน สมาธินา ปญฺญายาติ? นตฺถิ. หญฺจิ นตฺถิ โกจิ พุทฺเธน สมสโม – สีเลน สมาธินา ปญฺญาย, เตน วต เร วตฺตพฺเพ – ‘‘พุทฺธสฺส ทินฺนํ มหปฺผล’’นฺติ.

น วตฺตพฺพํ – ‘‘พุทฺธสฺส ทินฺนํ มหปฺผล’’นฺติ? อามนฺตา. นนุ วุตฺตํ ภควตา –

‘‘นยิมสฺมึ วา โลเก ปรสฺมึ วา ปน,

พุทฺเธน เสฏฺโฐ จ สโม จ วิชฺชติ;

ยมาหุเนยฺยานํ อคฺคตํ คโต,

ปุญฺญตฺถิกานํ วิปุลปฺผเลสิน’’นฺติ [วิ. ว. ๑๐๔๗].

อตฺเถว สุตฺตนฺโตติ? อามนฺตา. เตน หิ พุทฺธสฺส ทินฺนํ มหปฺผลนฺติ.

น วตฺตพฺพํ พุทฺธสฺส ทินฺนํ มหปฺผลนฺติกถา นิฏฺฐิตา.