๑๖. โสฬสมวคฺโค

(๑๕๘) ๓. สุขานุปฺปทานกถา

๗๔๗. ปโร ปรสฺส สุขํ อนุปฺปเทตีติ? อามนฺตา. ปโร ปรสฺส ทุกฺขํ อนุปฺปเทตีติ? น เหวํ วตฺตพฺเพ…เป… ปโร ปรสฺส ทุกฺขํ น อนุปฺปเทตีติ? อามนฺตา. ปโร ปรสฺส สุขํ น อนุปฺปเทตีติ? น เหวํ วตฺตพฺเพ…เป… ปโร ปรสฺส สุขํ อนุปฺปเทตีติ? อามนฺตา. ปโร ปรสฺส อตฺตโน สุขํ อนุปฺปเทติ, อญฺเญสํ สุขํ อนุปฺปเทติ, ตสฺส สุขํ อนุปฺปเทตีติ? น เหวํ วตฺตพฺเพ…เป… ปโร ปรสฺส เนวตฺตโน, น อญฺเญสํ, น ตสฺส สุขํ อนุปฺปเทตีติ? อามนฺตา. หญฺจิ ปโร ปรสฺส เนวตฺตโน, น อญฺเญสํ, น ตสฺส สุขํ อนุปฺปเทติ, โน จ วต เร วตฺตพฺเพ – ‘‘ปโร ปรสฺส สุขํ อนุปฺปเทตี’’ติ.

ปโร ปรสฺส สุขํ อนุปฺปเทตีติ? อามนฺตา. อญฺโญ อญฺญสฺส การโก, ปรงฺกตํ สุขํ ทุกฺขํ อญฺโญ กโรติ อญฺโญ ปฏิสํเวเทตีติ? น เหวํ วตฺตพฺเพ…เป….

๗๔๘. น วตฺตพฺพํ – ‘‘ปโร ปรสฺส สุขํ อนุปฺปเทตี’’ติ? อามนฺตา. นนุ อายสฺมา อุทายี เอตทโวจ – ‘‘พหูนํ วต โน ภควา ทุกฺขธมฺมานํ อปหตฺตา, พหูนํ วต โน ภควา สุขธมฺมานํ อุปหตฺตา, พหูนํ วต โน ภควา อกุสลานํ ธมฺมานํ อปหตฺตา, พหูนํ วต โน ภควา กุสลานํ ธมฺมานํ อุปหตฺตา’’ติ [ม. นิ. ๒.๑๔๘ ลฏุกิโกปเม]! อตฺเถว สุตฺตนฺโตติ? อามนฺตา. เตน หิ ปโร ปรสฺส สุขํ อนุปฺปเทตีติ.

สุขานุปฺปทานกถา นิฏฺฐิตา.