๙. นวมวคฺโค

(๘๖) ๓. รูปํ สารมฺมณนฺติกถา

๕๕๒. รูปํ สารมฺมณนฺติ? อามนฺตา. อตฺถิ ตสฺส อาวฏฺฏนา อาโภโค สมนฺนาหาโร มนสิกาโร เจตนา ปตฺถนา ปณิธีติ? น เหวํ วตฺตพฺเพ…เป… นนุ นตฺถิ ตสฺส อาวฏฺฏนา อาโภโค…เป… ปณิธีติ? อามนฺตา. หญฺจิ นตฺถิ ตสฺส อาวฏฺฏนา อาโภโค…เป… ปณิธิ, โน จ วต เร วตฺตพฺเพ – ‘‘รูปํ สารมฺมณ’’นฺติ.

ผสฺโส สารมฺมโณ, อตฺถิ ตสฺส อาวฏฺฏนา อาโภโค…เป… ปณิธีติ? อามนฺตา. รูปํ สารมฺมณํ, อตฺถิ ตสฺส อาวฏฺฏนา อาโภโค…เป… ปณิธีติ? น เหวํ วตฺตพฺเพ…เป….

เวทนา…เป… สญฺญา เจตนา จิตฺตํ สทฺธา วีริยํ สติ สมาธิ ปญฺญา ราโค โทโส โมโห มาโน ทิฏฺฐิ วิจิกิจฺฉา ถินํ อุทฺธจฺจํ อหิริกํ…เป… อโนตฺตปฺปํ สารมฺมณํ, อตฺถิ ตสฺส อาวฏฺฏนา อาโภโค…เป… ปณิธีติ? อามนฺตา. รูปํ สารมฺมณํ, อตฺถิ ตสฺส อาวฏฺฏนา อาโภโค…เป… ปณิธีติ? น เหวํ วตฺตพฺเพ…เป….

รูปํ สารมฺมณํ, นตฺถิ ตสฺส อาวฏฺฏนา อาโภโค…เป… ปณิธีติ? อามนฺตา. ผสฺโส สารมฺมโณ, นตฺถิ ตสฺส อาวฏฺฏนา อาโภโค…เป… ปณิธีติ? น เหวํ วตฺตพฺเพ…เป….

รูปํ สารมฺมณํ, นตฺถิ ตสฺส อาวฏฺฏนา อาโภโค…เป… ปณิธีติ? อามนฺตา. เวทนา…เป… อโนตฺตปฺปํ สารมฺมณํ, นตฺถิ ตสฺส อาวฏฺฏนา อาโภโค…เป… ปณิธีติ? น เหวํ วตฺตพฺเพ…เป….

๕๕๓. น วตฺตพฺพํ – ‘‘รูปํ สารมฺมณ’’นฺติ? อามนฺตา. นนุ รูปํ สปฺปจฺจยนฺติ? อามนฺตา. หญฺจิ รูปํ สปฺปจฺจยํ, เตน วต เร วตฺตพฺเพ – ‘‘รูปํ สารมฺมณ’’นฺติ.

รูปํ สารมฺมณนฺติกถา นิฏฺฐิตา.