๔. สจฺจาทิ

๒๓๕. สมุทยสจฺจํ… มคฺคสจฺจํ ตีหิ ขนฺเธหิ เอเกนายตเนน เอกาย ธาตุยา สมฺปยุตฺตํ; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๓๖. นิโรธสจฺจํ… จกฺขุนฺทฺริยํ…เป… กายินฺทฺริยํ… อิตฺถินฺทฺริยํ… ปุริสินฺทฺริยํ…เป… สมฺปยุตฺตนฺติ? นตฺถิ. กติหิ วิปฺปยุตฺตํ? จตูหิ ขนฺเธหิ เอเกนายตเนน สตฺตหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๓๗. มนินฺทฺริยํ ตีหิ ขนฺเธหิ สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๓๘. สุขินฺทฺริยํ… ทุกฺขินฺทฺริยํ… โสมนสฺสินฺทฺริยํ… โทมนสฺสินฺทฺริยํ ตีหิ ขนฺเธหิ เอเกนายตเนน เอกาย ธาตุยา สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๓๙. อุเปกฺขินฺทฺริยํ ตีหิ ขนฺเธหิ เอเกนายตเนน ฉหิ ธาตูหิ สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ เอกาทสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๔๐. สทฺธินฺทฺริยํ… วีริยินฺทฺริยํ… สตินฺทฺริยํ… สมาธินฺทฺริยํ… ปญฺญินฺทฺริยํ… อนญฺญาตญฺญสฺสามีตินฺทฺริยํ… อญฺญินฺทฺริยํ… อญฺญาตาวินฺทฺริยํ… อวิชฺชา… อวิชฺชาปจฺจยา สงฺขารา ตีหิ ขนฺเธหิ เอเกนายตเนน เอกาย ธาตุยา สมฺปยุตฺตา; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺตา. กติหิ วิปฺปยุตฺตา? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตา; เอเกนายตเนน เอกาย ธาตุยา เกหิจิ วิปฺปยุตฺตา.

๒๔๑. สงฺขารปจฺจยา วิญฺญาณํ ตีหิ ขนฺเธหิ สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๔๒. สฬายตนปจฺจยา ผสฺโส ตีหิ ขนฺเธหิ เอเกนายตเนน สตฺตหิ ธาตูหิ สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๔๓. ผสฺสปจฺจยา เวทนา ตีหิ ขนฺเธหิ เอเกนายตเนน สตฺตหิ ธาตูหิ สมฺปยุตฺตา; เอเกนายตเนน เอกาย ธาตุยา เกหิจิ สมฺปยุตฺตา. กติหิ วิปฺปยุตฺตา? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺตา; เอเกนายตเนน เอกาย ธาตุยา เกหิจิ วิปฺปยุตฺตา.

๒๔๔. เวทนาปจฺจยา ตณฺหา… ตณฺหาปจฺจยา อุปาทานํ… กมฺมภโว ตีหิ ขนฺเธหิ เอเกนายตเนน เอกาย ธาตุยา สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๔๕. รูปภโว…เป… สมฺปยุตฺโตติ? นตฺถิ. กติหิ วิปฺปยุตฺโต? น เกหิจิ ขนฺเธหิ น เกหิจิ อายตเนหิ ตีหิ ธาตูหิ วิปฺปยุตฺโต.

๒๔๖. อรูปภโว… เนวสญฺญานาสญฺญาภโว… จตุโวการภโว…เป… สมฺปยุตฺโตติ? นตฺถิ. กติหิ วิปฺปยุตฺโต? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๔๗. อสญฺญาภโว… เอกโวการภโว… ปริเทโว…เป… สมฺปยุตฺโตติ? นตฺถิ. กติหิ วิปฺปยุตฺโต? จตูหิ ขนฺเธหิ เอเกนายตเนน สตฺตหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๔๘. โสโก… ทุกฺขํ… โทมนสฺสํ ตีหิ ขนฺเธหิ เอเกนายตเนน เอกาย ธาตุยา สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๔๙. อุปายาโส… สติปฏฺฐานํ… สมฺมปฺปธานํ ตีหิ ขนฺเธหิ เอเกนายตเนน เอกาย ธาตุยา สมฺปยุตฺตํ; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๕๐. อิทฺธิปาโท ทฺวีหิ ขนฺเธหิ สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๕๑. ฌานํ ทฺวีหิ ขนฺเธหิ เอเกนายตเนน เอกาย ธาตุยา สมฺปยุตฺตํ; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๕๒. อปฺปมญฺญา… ปญฺจินฺทฺริยานิ… ปญฺจ พลานิ… สตฺต โพชฺฌงฺคา… อริโย อฏฺฐงฺคิโก มคฺโค ตีหิ ขนฺเธหิ เอเกนายตเนน เอกาย ธาตุยา สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ โสฬสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๕๓. ผสฺโส … เจตนา… มนสิกาโร ตีหิ ขนฺเธหิ เอเกนายตเนน สตฺตหิ ธาตูหิ สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.

๒๕๔. เวทนา… สญฺญา ตีหิ ขนฺเธหิ เอเกนายตเนน สตฺตหิ ธาตูหิ สมฺปยุตฺตา; เอเกนายตเนน เอกาย ธาตุยา เกหิจิ สมฺปยุตฺตา. กติหิ วิปฺปยุตฺตา? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺตา; เอเกนายตเนน เอกาย ธาตุยา เกหิจิ วิปฺปยุตฺตา.

๒๕๕. จิตฺตํ ตีหิ ขนฺเธหิ สมฺปยุตฺตํ; เอเกนายตเนน เอกาย ธาตุยา เกหิจิ สมฺปยุตฺตํ. กติหิ วิปฺปยุตฺตํ? เอเกน ขนฺเธน ทสหายตเนหิ ทสหิ ธาตูหิ วิปฺปยุตฺตํ; เอเกนายตเนน เอกาย ธาตุยา เกหิจิ วิปฺปยุตฺตํ.

๒๕๖. อธิโมกฺโข ตีหิ ขนฺเธหิ เอเกนายตเนน ทฺวีหิ ธาตูหิ สมฺปยุตฺโต; เอเกน ขนฺเธน เอเกนายตเนน เอกาย ธาตุยา เกหิจิ สมฺปยุตฺโต. กติหิ วิปฺปยุตฺโต? เอเกน ขนฺเธน ทสหายตเนหิ ปนฺนรสหิ ธาตูหิ วิปฺปยุตฺโต; เอเกนายตเนน เอกาย ธาตุยา เกหิจิ วิปฺปยุตฺโต.