นโม ตสฺส ภควโต อรหโต สมฺมาสมฺพุทฺธสฺส

สุตฺตวนฺทนา

๑. ธมฺมตฺถ เทสนา เวธ,

จตุคมฺภีร ทุทฺทสํ;

ธมฺมํ โลกสฺส เทเสนฺตํ,

ธมฺมราชํ นมามหํ;

๒. พุทฺโธ ปจฺเจกพุทฺโธ จ,

อรหา จกฺกวตฺตีติ;

ถูปาถูปารหํ วนฺเท,

จตุถูปารเหสุ ตํ;

๓. เปตเสยฺโย กามโภคี,

สีหเสยฺโย ตถาคโต;

สยนฺตํ จตุเสยฺเยสุ,

จตุตฺเถน นเม ชินํ;

๔. อณฺฑชา ชลาพุชา จ;

สํเสทโช ปปาติกา;

จตุโยนิ ปริจฺเฉท,

ญาณวนฺตํ นเม ชินํ;

๕. สุตพุทฺโธนุพุทฺโธ จ,

ปจฺเจโก ชินพุทฺโธติ;

จตุตฺถํ จตุพุทฺเธสุ,

วนฺทามิ โลกนายกํ;

๖. ราหุคฺคํ อตฺตภาคีนํ,

มนฺธาตา กามโภคีนํ;

มาโร อธิปเตยฺยานํ,

พุทฺโธ โลเก สเทวเก;

จตุอคฺค ปญฺญตฺตีนํ,

อคฺคปตฺตํ นเม ชินํ.

๗. ทานํ ปิยกถา อตฺถ,

จริยา สทิสตฺตตา;

จตุสงฺคห วตฺถูหิ,

อสงฺขิเยสุ ชาติสุ;

โลกสฺส สงฺคเหตารํ,

วนฺทามิ โลกนายกํ;

๘. โลโภ โทโส จ โมโหติ,

อนฺโต ปจฺจตฺถิเก ตโย;

ทุชฺชเย สพฺพเวรีหิ,

สญฺชิตํปิ สุธึ นเม;

๙. ชาติ ปุญฺญ มหตฺตานิ,

คุณมหตฺตมุตฺตมํ;

ติมหตฺเถหิ สมฺปนฺนํ,

วนฺทามิ โลกนายกํ;

๑๐. เหตุ ผล สมฺปทาโย,

สตฺตุปการสมฺปทา;

ติสมฺปทาหิ สมฺปนฺนํ,

วนฺทามิ โลกนายกํ.

๑๑. ญาณปฺปหานานุภาว,

สุรูปการสมฺปทา;

จตุผล สมฺปทาหิ,

ตํ สมฺปนฺนํ นเม ชินํ.

๑๒. อาสโย จ ปโยโคติ,

สตฺตุปการ สมฺปทา;

ทุวิธา ยสฺส สมฺปนฺนา,

สมฺมา มํ ปาตุ โส ชิโน.

๑๓. มโหสเธ เวสฺสนฺตเร,

ปจฺฉิมภวิเก ตถา;

ติชาตีสุ นเม วาจํ,

ภาเสนฺตํ ชายนกฺขเณ.

๑๔. เนมิมฺหิ สาธิเน เจว,

มนฺธาตริ จ คุตฺติเล;

จตูสุ มนุชตฺเตน,

เทวโลกํ คตํ นเม.

๑๕. สงฺขาโร รูปวิกาโร,

ลกฺขณํ วานนิสฺสฏํ;

นิพฺพานํ ปญฺญตฺติเจติ,

ปญฺจ เญยฺยนฺตคุํ นเม.

๑๖. ปุตฺต ทาร ปริจฺจาคา,

รชฺชงฺคํ ชีว จาคีติ;

ปญฺจ มหาปริจฺจาเค,

กรํ สุทุกฺกเร นเม.

๑๗. รูปญฺจ เวทนา สญฺญา,

สงฺขารา วิญฺญาณนฺติเม;

ปญฺจกฺขนฺเธ ปริชานํ,

ติปริญฺญาหิ ตํ นเม.

๑๘. มนุสฺส เทว คติโย,

เปโต จ นิรโย ตถา;

ติรจฺฉาโนติ ปญฺเจตา,

ฉินฺทนฺตํ คติโย นเม;

๑๙. เทวปุตฺโต กิเลโส จ,

อภิสงฺขาร มารโก;

ขนฺโธ มจฺจูติ ปญฺเจเต,

มาเร วิชิตวํ นเม.

๒๐. ปุเรภตฺตํ ปจฺฉาภตฺตํ,

ปุริมญฺเจว มชฺฌิมํ;

ปจฺฉิมนฺติ สทา ปญฺจ,

พุทฺธกิจฺจํ กรํ นเม.

๒๑. รูปา สทฺทา คนฺธา รสา,

โผฏฺฐพฺพา จ มโนรมา;

ปญฺจ กามคุเณ หิตฺวา,

เขฬํว นิคฺคตํ นเม.

๒๒. ราคสลฺลํ โทสสลฺลํ,

โมหา มาโน จ ทิฏฺฐีติ;

วนฺเท วชฺชาติวชฺชนฺตํ,

ปญฺจสลฺลปนูทนํ.

๒๓. ทีโฆ มชฺฌิม สํยุตฺตา,

องฺคุตฺตโร จ ขุทฺทโก;

อิติ ปญฺจ นิกาเยหิ,

สุวิเนนฺตํ ปชํ นเม.

๒๔. อิสฺสริยํ ยโส ธมฺโม,

กาโม สิรี ปยตฺตีติ;

ภเคฺยหิ ฉหิ สมฺปนฺนํ,

วนฺทามิ โลกนายกํ.

๒๕. ปิยาปิยํ ภูตาภูตํ,

อตฺถานตฺถํ ยถารหํ;

มิสฺสา ฉสุ สุวาจํว,

ภาสนฺตํ อตฺถกํ นเม.

๒๖. อลโส จ ปมาโท จ,

อนุฏฺฐานํ อสํยโม;

นิทฺทา ตนฺตีติ ฉิทฺเทหิ,

ฉหิ มุตฺตํ สทา นเม.

๒๗. มหากรุณาสมาปตฺติ,

ยมกปฺปาฏิหาริยํ;

อาสยานุสเย ญาณํ,

อินฺทฺริยาน ปโรปเร;

สพฺพญฺญุตา นาวรณํ,

ฉา สาธารณิกํ นเม.

๒๘. กามจฺฉนฺโท จ พฺยาปาโท,

ถินมิทฺธญฺจ สํสโย;

อวิชฺชุทฺธจฺจ กุกฺกุจฺจํ,

ฉวินีวรณํ นเม.

๒๙. อิทฺธิวิธํ ทิพฺพโสตํ,

ปรจิตฺต วิชานนา;

ปุพฺเพนิวาสานุสฺสติ,

ทิพฺพจกฺขาสวกฺขโย;

ฉฬภิญฺญาหิ สมฺปนฺนํ,

วนฺทามิ ปุริสุตฺตมํ.

๓๐. นีล ปีตา จ โอทาตา,

มญฺชิฏฺฐา จ ปภสฺสรา;

โลหิตาติ ฉ รํสีหี,

วิชฺโชตนฺตํ สทา นเม.

๓๑. อสฺสาทาทีนโว เจว,

นิสฺสรณผลํ ตถา;

อุปายาณตฺตีติ ฉธา,

สทฺธมฺมเทสกํ นเม.

๓๒. ราโค โทโส จ โมโห จ,

วิตกฺกจริยา ตถา;

สทฺธา พุทฺธีติ ภาเชนฺตํ,

ตา ฉเฬจริยา นเม.

๓๓. รชตํ กนกํ มุตฺตา,

มณิ เวฬุริยานิ จ;

วชิรญฺจ ปวาฬนฺติ,

เสฏฺฐิ สตฺตธโน วิย.

๓๔. สทฺธาสีลํ สุตํจาโค,

หิรี โอตฺตปฺปิยํ ธนํ,

ปญฺญาธนนฺติ สมฺพุทฺธํ,

วนฺเท สตฺตมหาธนํ.

๓๕. จกฺกํ หตฺถิ อสฺโส มณิ,

คหปติตฺถิโย ตถา;

สุปริณายโกจาติ,

สตฺตรตโน จกฺกวตฺตีว.