สมนฺตกูฏวณฺณนา |โอ๐.๐๐๐๑|

นโม ตสฺส ภควโต อรหโต สมฺมาสมฺพุทฺธสฺส

๑. สตตวิตต กิตฺตึ ธสฺตกนฺทปฺปทปฺปํ

ติภวหิตวิธานํ สพฺพโลเกกเกตุํ,

อมิตมติมนคฺฆํ สนฺติทํ เมรุสารํ

สุคตมหมุทารํ รูปสารํ นมามิ;

๒. หตทุริตตุสารํ โมหปงฺโกปตาปํ

มนกมลวิกาสํ ชนฺตุนํ เสสกานํ,

กุมติกุมุทนาสํ พุทฺธปุพฺพาจลคฺคา

อุทิตมหมุทารํ ธมฺมภานุํ นมามิ;

๓. สกลวิมลสีลํ ธุตปาปาริชาลํ

สุรนรมหนียํ ปาหุเนยฺยาหุเนยฺยํ,

อุชุปถปฏิปนฺนํ ปุญฺญเขตฺตํ ชนานํ

คณมหมภิวนฺเท สารทํ สาทเรน;

๔. อิติ กฬิต ปณามา หนฺตฺว สพฺโพปสคฺเค

สุคตวิมล ปาทมฺโภชสมฺปาต ปูตํ,

สุมนสิขริราชํ วณฺณยิสฺสํ สุรานํ

วสติ มตุลเมตํ สาธุชนฺตุ สุณนฺตุ;

๕. สวณา ลปนา เจว สติยา จาปิ วนฺทนา,

ยสฺส สมฺมา สุขี โหตี นิพฺพาณญฺจาธิคจฺฉติ;

๖. |โอ๐.๐๐๐๒|

ตสฺมา สปฺปุริเสเห’ทํ ปตฺเถนฺเตหิ ติสมฺปทํ,

สวณียญฺหิ สาธูหิ อจิกฺขิตฺเตน เจตสา;

๗. โย โลกติลโก นาโถ ปูเรตฺวา ทส ปารมี,

ชาโตสิ ตุสิเต กาเย สนฺตุสิโต’ติ วิสฺสุโต;

๘. อาราธิโต สุราทีหิ กาโล มาริส เต อยํ,

ติณฺโณ ตารยิมํ โลกํ พหู อปฺปรชกฺขกา;

๙. เอตทตฺถาย เต วีร ปูริตา ทส ปารมี,

พาหุํ ปิตุสฺส ปุตฺโต’ว โลโก อาลมฺพเต ตุวํ;

๑๐. เตสํ ตํ วจนํ สุตฺวา มหาสตฺโต มหามตี,

วิโลกเน วิโลเกตฺวา ปญฺจามล วิโลจโน;

๑๑. ชมฺพุทีปคฺคกมเล กณฺณิกา’ว มโนรมา,

ปุรี กปิฬวตฺถู’สิ วิสาณา’ว สุธาสินํ;

๑๒. สิงฺคีนิกฺขมยาภาส ตุงฺคสิงฺคสมงฺคิตา,

มณิสีหปญฺชรากิณฺณ ปาสาทา ยตฺถ ภาสเร;

๑๓. สฆเน คคเน นิจฺจํ สเตรตสตานิ’ว,

อนิเลริตปชฺโชต โสณฺณเกตุ อหู ยหึ;

๑๔. ชนานํ นีลเนตฺเตหิ วทเนหิ ตุ ยา ปุรี,

มธุปาลิสโมนทฺธ กญฺชินี สิริมาวเห;

๑๕. รงฺคตุงฺคตุรงฺเคหิ คชฺชิเตหิ จ ยา ปุรี,

สโฆสุตฺตุงฺคกลฺโลล โลลสาครสนฺติภา;

๑๖. อวฺหมานา’ว เทวานํ ปุรลขฺยา ภุชา อิว,

มนฺทานิเลริตา ตุงฺค นานาราคทฺธชา ยหึ;

๑๗. นานาเวสธรา ยสฺมึ นานาภูสณ ภูสิตา,

นานาสมฺปตฺติสํยุตฺตา นานาวิชฺชาสุ ปารคา;

๑๘. |โอ๐.๐๐๐๓|

นวโยพฺพน อุทฺทามา รูเปน จ มโนหรา,

สจฺเจสุ นิรตา นิจฺจํ อนกฺกุฏฺฐกุลา สิยุํ;

๑๙. นิจฺจํ กีฬา วิททฺธาหิ นรนารีหิ เสวิตา,

ยา ปุรี สาธุรูปา’สิ มธุราลาปินีหิ จ;

๒๐. ตสฺมึ สทฺธาทโยเปต โอกฺกากกุลเกตุโก,

สุทฺโธทนวฺหโย อาสี วิสฺสุโต ภุวนตฺตเย;

๒๑. ยสฺสงฺฆิกมเล สพฺพ ภุภุชานํ มหีตเล,

กิรีฏมณิหิงฺคาลิ กีฬนฺตี’ว นิรนฺตรํ;

๒๒. ยสฺส ปตฺถฏเตเชน ปุรเนตาปิ ทิวากโร,

วหนีจ’มฺพเร ลีลํ โอสธีปติโน ทิวา;

๒๓. ยสฺส ทานปฺปวาโห ตุ นานายาจก ชนฺตุนํ,

มโนทธีสุ เวลนฺเตติกฺกมนฺโตว สตฺตตํ;

๒๔. มติยา สุรมนฺตีว ธเนน ธนโท วิย,

รูเปน กุสุเมสุ’ว โย ชุมฺหติ มหีตเล;

๒๕. ตสฺสาภิสิตฺตา รชฺเชน มหามายาติ วิสฺสุตา,

จนฺทิกา วิย จนฺทสฺส คิริราชา’ว กปาลิโต;

๒๖. ลกฺขี’ว วาสุเทวสฺส สีตา’ว รามราชิโน,

มเหสีสิ วราโรหา สุนฺทรี สุนฺทราธรา;

๒๗. ตสฺสา กุจฺฉิกรณฺฑมฺหิ อนคฺฆรตนํ วิย,

ขตฺตึสาหิ นิมิตฺเตหิ วิมฺหาเปนฺโต สเทวกํ;

๒๘. สิตมฺพุชกโร สนฺโต สิเตภจฺฉาปโก วิย,

กตฺวา ปทกฺขิณํ มาตุ ปฏิสนฺธิมคณฺหิ โส;

๒๙. ทเสกาทสมาเสน ตสฺเสวํ อาสิ เจตนา,

ปสฺสิตุํ สกญาตีนํ คนฺตฺวาน นครํ ตทา;

๓๐. |โอ๐.๐๐๐๔|

นิเวเทตฺวา ตมตฺถํ สา รญฺโญ เตน สุสชฺชิเต,

สปริจฺฉทา ตทา มคฺเค คจฺฉนฺติ อนฺตราปเถ;

๓๑. เทวตานํ มโนนนฺทกร นนฺทน สนฺนิภํ,

ทิสฺวาน ลุมฺพินึ นาม อุยฺยานํ มนนนฺทนํ;

๓๒. ตสฺมึ กีฬิตุมุสฺสาหา ปวิสิตฺวาน ตํ วนํ,

กีฬนฺติ อุปคนฺตฺวาน มงฺคลํ สาลปาทปํ;

๓๓. วิโลล ปลฺลวากิณฺณํ สุผุลฺลกุสุโมนตํ,

คเหตฺวา สาลสาขํ สา สุรตฺตกร ปลฺลวา;

๓๔. เทเวหิ คหิตา’รกฺขา มหมาเน สเทวเก,

ชเนสิ ตนยํ มายา ตตฺรฏฺฐา โลกโลจนํ;

๓๕. พฺรหฺมาโน โลกปาลา จ มนุสฺสา กมโต ตทา,

โสณฺณชาลาชินาทีหิ คณฺหึสุ ชนนนฺทนํ;

๓๖. มหึ ปติฏฺฐิโต ธีโร ปสฺสิตฺวาน ตโต ทิสา,

อุตฺตราภิมุโข สตฺตปทํ คณฺตฺวา’มฺพุเช ฐิโต;

๓๗. ทิสนฺตมวโลเกตฺวา สุผุลฺลมฺพุชโลจโน,

นิจฺฉาเรสาสภึ วาจํ อคฺโค เสฏฺโฐ’ติอาทินา;

๓๘. พฺรหฺมามรนราทีหิ ปูชิโต จ นมสฺสิโต,

กเมน อภิวฑฺฒนฺโต ชุณฺหปกฺเข สสี ยถา;

๓๙. พฺรหฺมูนํ ฉตฺตฉายาย มนฺทารกุสุมนฺตเร,

สานนฺทามนฺทเทเวหิ ธุตจามรมชฺฌโค;

๔๐. ทิพฺเพหิ รูปสทฺเทหิ คนฺเธหิ จ รเสหิ จ,

โผฏฺฐพฺเพหิ จ ทิพฺเพหิ โมทมาโน อเนกธา;

๔๑. ทิพฺเพหิ รมณีเยหิ นจฺเจหิ วาทิเตหิ จ,

ปทาเนกสหสฺเสหิ ถูยมานคุณากโร;

๔๒. |โอ๐.๐๐๐๕|

ปตฺวา โสฬสมํ วสฺสํ ญาติสงฺฆสฺส มชฺฌโค,

ทสฺเสตฺวา’เสสสิปฺปํ ตํ โลเก วิชฺชติ ยํ ตทา;

๔๓. ญาติสงฺฆํ ปโมเทนฺโต เทเว จ มนุเช’ปิ จ,

ลทฺธา ยโสธรํ เทวึ’นุกูลํ ชาติชาติยํ;

๔๔. โสณฺณทปฺปณสงฺกาส โสมฺมานน วิภุสิตํ,

นีลนีรชสงฺกาส วิสาลายต โลจนํ;

๔๕. สิงฺคารมนฺทิรทฺวาเร ธโชปมภมุทฺวยํ,

เหมกาหลสงฺกาส นาสิกํ รูปลกฺขิยา

๔๖. นีลเวลฺลิตธมฺมิลฺล ชิมุโตภย โกฏิยํ,

นิจฺจวิชฺชุลฺลตาจกฺก มนุญฺญกณฺณปาสกํ;

๔๗. สาตกุมฺภนิภาภาส ปโยธรฆฏทฺวํ,

สุวณฺณทฺทิตฏายาต นิชฺฌราการหารกํ

๔๘. เทหเทวทฺทุมาลมฺพ ปาโรหาภภุชทฺวยํ,

องฺคุลีปลฺลวนฺตมฺพุ พินฺทุจารุ นขาวลึ;

๔๙. เทหมาลาลิมาลาภ โรมราชิวิราชิตํ,

รูปณฺณวตรงฺคาห วลิตฺตย วิจิตฺตกํ;

๕๐. โสณฺณรมฺภาสมาวฏฺฏ ปิโณรุทฺวย สุนฺทรํ,

สนฺนิรกลิกาการ จารุชงฺฆา วิภูสิตํ;

๕๑. ปจฺจกฺขรูปลกฺขิญฺจ ลีลานิจย สนฺนิภํ,

คุณานมากรํ สาธุ เวลํว รติสาคเร;

๕๒. กนฺโต วสนฺตราชา’ว กนฺทปฺโป’ว สุรูปวา,

สสี’ว ทสฺสนีโย จ สูริโย วิย เตชวา;

๕๓. อจลตฺเตน เมรูว คมฺภีเรนณฺณโว วิย,

พฺรหฺมสฺสโร ปิยํวาที ปญฺคฺญาย จ อนูปโม;

๕๔. |โอ๐.๐๐๐๖|

วสนฺโต โส มหาวีโร ปุรสฺมึ กปิลวฺหเย,

ทิสฺวา นิมิตฺเต จตุโร อุยฺยาน คมนญฺชเส;

๕๕. ปพฺพชฺชาภิรโต นาโถ คนฺตฺวา อุยฺยานภูมิยํ,

สุผุลฺลจมฺปกาโสก นาคาทา’เคหิ มณฺฑิตํ;

๕๖. ผุลฺลปงฺกช กฬฺหาร ชลาชลย สตากุลํ,

มนฺทมนฺทานิลายาต นานาโมเทหิ วาสิตํ;

๕๗. สรา สรํ สมายาต มธุพฺพต นิเสวิตํ,

ผลปุปฺผรสุทฺทาม ทฺวิช สงฺฆ นิกูชิตํ;

๕๘. นจฺจนฺต มตฺตโมรานํ นิจฺจํ มณฺฑปสนฺติภํ,

ทิพฺพนฺต มิคสคฺฆานํ กีฬามณฺฑป สนฺนิภํ;

๕๙. สมีร สิสิโรทาร ธาราสีกร วาริหิ,

ธารามณฺฑป ปนฺตีหิ ชนานนฺทกรํ วรํ;

๖๐. อุยฺยานวนมาคมฺม เทวราชาว นนฺทนํ,

กีฬนฺโต นิชปุตฺตสฺส สุตฺวาน ชาตสาสนํ;

๖๑. นิวตฺโต วิสฺสกมฺเมน สหสฺสกฺโขว ภูสิโต,

ปุรํ ปวิสมาโนว กิสา โคตมิ ภาสิตํ;

๖๒. สุตฺวาน นิพฺพุตปทํ ตทา จิตฺตานุกูลกํ,

สนฺตุฏฺโฐ สานุราโค จ ลกฺขคฺฆํ ตารภาสุรํ;

๖๓. หารํ ติสฺสาย เปเสตฺวา คนฺตฺวาน สกมนฺทิรํ,

เทวราชวิลาเสน นิสีทิ ปวราสเน;

๖๔. อถาคมฺม ตทา เนกนาฏิกา ปริวารยุํ,

วชฺชนฺติ เภริโย ตาสุ ปคฺคยฺห กาจิ นาริโย;

๖๕. นานาลยสมากิณฺณํ คีตํ คายนฺติ กาจิ’ปิ,

ธมนฺติ สุสิรํ กาจิ กาจิ วาเทนฺติ ตนฺติโย;

๖๖. |โอ๐.๐๐๐๗|

จารุ พิมฺพาธรารมฺม ปโยธรภรา สุภา,

วิสาลายต นีลกฺขา โสมโสมฺมานนา ตทา;

๖๗. นจฺจนฺติ ปุรโต ตสฺส เภริมณฺฑล มชฺฌคา,

เทวกญฺญาว รงฺคมฺหี รสภาวนิรนฺตรํ;