ติคุมฺพเจติย โถมนา

นโม ตสฺส ภควโต อรหโต สมฺมาสมฺพุทฺธสฺส

๑. โย ทีปงฺกรมูลมฺหิ, ปทํ หตฺตคตํ จชิ;

สมฺมาสมฺโพธิ มากงฺขํ, วนฺเท ตสฺส สิโรรุหํ.

(ปถฺยาวตฺตคาถา).

๒. ปูเรตฺวา โพธิสมฺภาร-มเหสํ โย อนุตฺตรํ;

อลตฺถ พุทฺธตฺตํ ตสฺส, เกสธาตุวรํ นเม.

(ปถฺยาวตฺตคาถา).

๓. ลทฺธา พุทฺธตฺตํ ฉฐาน-มติกฺกมฺม ปเวทยิ;

วิมุตฺตึ ราชายตเน, ตสฺส เกสวรํ นเม.

(รการ ภการวิปุลา ปถฺยาวตฺตคาถา).

๔. ตตฺถ สกฺกทตฺติยมฺปิ, นาคลตํ หรีตกํ;

อโนตตฺโตทกํ ภุญฺชิ, วนฺเท ตสฺส สิโรรุหํ.

(รการวิปุลา ปถฺยาวตฺตคาถา).

๕. ตทา มุคฺคเสลปตฺตํ, มหาราชูหิ ทินฺนกํ;

ตถาคโต ปฏิคฺคณฺหิ, วนฺทามิ ตสฺส สีสชํ.

(รการวิปุลา ปถฺยาวตฺตคาถา).

๖. ตทา ทฺวินฺนํ เทฺวภาติก-ชเนหิ มธุปิณฺฑิกํ;

ปริภุญฺเชสิ มนฺถมฺปิ, ตสฺส สีสสิรึ นเม.

(ตการวิปุลา ปถฺยาวตฺตคาถา).

๗. โย ตปุสฺสภลฺลิกานํ, ตทา ทฺวิสรณํ อทา;

โลกมฺหิ สพฺพปฐมํ, ตสฺส สีริวหํ นเม.

(รการ นการ วิปุลาปถฺยาวตฺตคาถา).

๘. ตทา ตตฺถุปฏฺฐกานํ, เตสํ เกเส อทา อฐ;

โลกหิต มเปกฺขนฺโต, นาโถ โย ตสฺส เต นเม.

(รการวิปุลา ปถฺยาวตฺตคาถา).

๙. เตปิ ตํ อาหาริตฺวาน, โปกฺขรพฺพติยํ กรุํ;

สชีวเกส เจติยํ, นเมตํ สพฺพปุพฺพกํ.

(มการวิปุลา ปถฺยาวตฺตคาถา).

๑๐. อุโปสถุโปสถมฺหิ, มุญฺจนฺตํ นีลรสฺมิโย;

ภควาว โลกอตฺถํ, กโรนฺตํ ตํ สทา นเม.

(รการวิปุลา ปถฺยาวตฺตคาถา).

๑๑. จูฬามณิทุสฺสเจตฺยํ, กาลมฺหิ โพธิสตฺตเก;

พุทฺธกาเล อิทํ สพฺพ-ปฐมํ ตํ นมามหํ.

(รการวิปุลา ปถฺยาวตฺตคาถา).

๑๒. นมามหํ วนฺทามหํ, ปูเชมหํ สิโรรุหํ;

ปุญฺญมิทํ ภวตุ เม, ปจฺจโย อาสวกฺขเย.

(ตการ นการวิปุลา ปถฺยาวตฺตคาถา).

ติคุมฺพเจติยโถมนา นิฏฺฐิตา.