ทาฐาวํโส |โอ๐.๐๐๐๑|

นโม ตสฺส ภควโต อรหโต สมฺมาสมฺพุทฺธสฺส

๑. วิสารทํ วาทปถาติ วตฺตินํ,

ติโลกปชฺโชตมสยฺหสาหินํ;

อเสส เญยฺยาวรณปฺปหายินํ,

นมามิ สตฺถารมนนฺตโคจรํ.

๒. |โอ๐.๐๐๐๒|

ติโลก นาถปฺปภวํ ภยาปหํ,

วิสุทฺธวิชฺชาจรเณหิ เสวิตํ;

ปปญฺจ สํโยชนพนฺธนจฺฉิทํ,

นมามิ ธมฺมํ นิปุณํ สุทุทฺทสํ.

๓. ปสาทมตฺเตน’ปิ ยตฺถ ปาณิโน,

ผูสนฺติ ทุกฺขกฺขยมจฺจุตํ ปทํ;

ตมาหุเณยฺยํ สุสมาหิตินฺทฺริยํ,

นมามิ สงฺฆํ มุนิราชสาวกํ.

๔. วิภุสยํ กาฬกนาครนฺว ยํ,

ปรกฺกโม การุณิโก จมูปติ;

คเวสมาโน ชินสาสนสฺส โย,

วิรูฬฺหิมตฺถญฺจ ชนสฺส ปตฺถยํ.

๕. |โอ๐.๐๐๐๓|

สุธามยูขามล ปณฺฑุวํสชํ,

วิรูฬฺหสทฺธํ มุนิราชสาสเน;

ปิยํ วทํ นีติปถานุวตฺตินึ,

สทา ปชานํ ชนิกํ’ว มาตรํ.

๖. ปิยํ ปรกฺกนฺติภุชสฺส ราชิโน,

มเหสิ มจฺจุนฺนตขุทฺธิสมฺปทํ;

วิธาย ลีลาวติมิจฺฉิตตฺถทํ,

อเสส ลงฺกาตลรชฺชลกฺขิยํ.

๗. กุมารมาราธิตสาธุมนฺตินํ,

มหาทยํ ปณฺฑุนรินฺท วํสชํ;

วิธาย สทฺธํ มธุรินฺทนามกํ,

สุสิกฺขีตํ ปาวจเน กลาสุ จ.

๘. |โอ๐.๐๐๐๔|

นรินฺทสุญฺญํ สุจิรํ ติสีหฬํ,

อิติปฺปตีตํ อยสํ อปานุทิ;

จิรํ ปณีเตน จ จิวราทินา,

สุสญฺญเต สํยมิโน อตปฺปยิ.

๙. จิรฏฺฐิตึ ปาวจนสฺส อิจฺฉตา,

กตญฺญุนา วิกฺกม พุทฺทิสาลินา;

สตีมตา จนฺทิม พนฺธุกิตฺตินา,

สคารวํ เตน’ภียาจิโต อหํ.

๑๐. สเทส ภาสาย กวีหิ สีหเฬ,

กตมฺปิ วํสํ ชินทนฺตธาตุยา;

นิรุตฺติยา มาคธิกาย วุทฺธิยา,

กโรมิ ทีปนฺตรวาสินํ อปิ.

๑๑. |โอ๐.๐๐๐๕|

ชีโน’ยมิทฺเธ อมรวฺหเย ปุเร,

กทาจิ หุตฺวาน สุเมธนามโก;

สเวทเวทงฺควิภาคโกวิโท,

มหทฺธเน วิปฺปกุลมฺหิ มาณโว.

๑๒. อหญฺหิ ชาติพฺยสเนน ปีฬิโต,

ชราภิภุโต มรเณน โอตฺถโฏ;

สิวํ ปทํ ชาติชราทินิสฺสฏํ,

คเวสยิสฺสํ’ติ รโห วิจินฺติย.

๑๓. อเนกสงฺขํ ธนธญฺญสมฺปทํ,

ปติฏฺฐเปตฺวา กปเณสิ ทุจฺจชํ;

อนปฺปเก เปมภรานุพนฺธิโน,

วิหาย มิตฺเต จ สุเตจ พนฺธเว.

๑๔. |โอ๐.๐๐๐๖|

ปหาย กาเม นิขิเล มโนรเม,

ฆราภินิกฺขมฺม หิมาจลนฺติเก;

มหีธรํ ธมฺมิกนาม วิสฺสุตํ,

อุเปจฺจ นานาตรุราชิภุสิตํ.

๑๕. มโนนุกูเล สุรราชนิมฺมีเต,

อสมฺมิคานํ อคติมฺหิ อสฺสเม;

นิวตฺตจีโร อชินกฺขิปํ วหํ,

ชฏาธโร ตาปส เวสมคฺคหี.

๑๖. สุสญฺญตตฺโตปริวาริ ตินฺทฺริโย,

ผลาผลาทีหิ ปวตฺตยํ ตนุํ;

คโต อภิญฺคฺญาสุ จ ปารมึ วสี,

ตหึ สมาปตฺติ สุขํ อวินฺทิ โส.

๑๗. |โอ๐.๐๐๐๗|

สุสชฺชิเต รมฺมปุราธิวาสินา,

มหาชเนน’ตฺตมเนน อญฺชเส;

ปถปฺปเทเส อภิยนฺตมตฺตโน,

อนิฏฺฐิเตเยว สุเมธ ตาปโส.

๑๘. อคาธเญยฺโยทธีปารทสฺสินํ,

ภวนฺตคุํ นิพฺพนถํ วินายกํ;

อเนกขีณาสวลกฺขเสวิตํ,

กทา จิ ทีปงฺกรพุทฺธมทฺทส.

๑๙. ตโต สสงฺฆสฺส ติโลกภตฺตุโน,

ปริจฺจชิตฺวาน ตนุมฺปิ ชีวิตํ;

ปสารยิตฺวาน ชฏาชินาทิกํ,

วิธาย เสตุํ ตนุเมว ปลฺลเล.

๒๐. |โอ๐.๐๐๐๘|

อนกฺกมิตฺวา กลลํ มหาทเย,

สภิกฺขุโก คจฺจตุ ปิฏฺฐิยา อิติ;

อธิฏฺฐหิตฺวาน นิปนฺนโก ตหึ,

อนาถ เมตํ ติภวํ สเมกฺขิย.

๒๑. ทยาย สญฺโจทิตมานโส ชเน,

ภวณฺณวา อุทฺธริตุํ ทุขทฺทิเต;

อกาสิ สมฺโพธิปทสฺส ปตฺติยา,

มหาภินีหารมุทคฺควิกฺกโม.

๒๒. |โอ๐.๐๐๐๙|

อโถ วิทิตฺวา วสิโน ตมาสยํ,

อทาสิ โส วฺยากรณํ มหามุนิ;

ตโต ปุรํ ตมฺหิ ตถาคเต คเต,

สยํวสี สมฺมสิ ปารมิคุเณ.

๒๓. ตโต จ กปฺปานมลีนวิกฺกโม,

อสํขิเย โส จตุโร สลกฺขเก;

ตหึ ตหึ ชาติสุ โพธิปาจเน,

วิสุทฺธสมฺภารคุเณ อปูรยิ;

อถาภิชาโต ตุสิเต มหายโส,

วิสุทฺธสมฺโพธิปโทปลทฺธิยา;

อุทิกฺขมาโน สมยํ ทยาธโน,

จิรํ วิภุตึ อนุโภสิ สพฺพโส.

๒๕. |โอ๐.๐๐๑๐|

สหสฺสสงฺขา ทสจกฺกวาลโต,

สมาคตาเนกสุราธิปาทิหิ;

อุทคฺคุทคฺเคหิ ชินตฺตปตฺติยา,

สคารวํ โส อภิคมฺม ยาจิโต.

๒๖. ตโต จวิตฺวา กปิฬวฺหเย ปุเร,

สทา สโต สกฺยกุเลกเกตุโน;

อโหสิ สุทฺโธทนภุมิภตฺตุโน,

มหาทิมายาย มเหสิยา สุโต.

๒๗. |โอ๐.๐๐๑๑|

วิชาตมตฺโต’ว วสุนฺธราย โส,

ปติฏฺฐหิตฺวาน ทิสา วิโลกยี;

ตทา อเหสุํ วิวฏงฺคนา ทิสา,

อปูชยุํ ตตฺถ จ เทวมานุสา.

๒๘. อาธารยุํ อาตปวารณาทิกํ,

อทิสฺสมานาว นภมฺภิ เทวตา;

ปทานิ โส สตฺต จ อุตฺตรามุโข,

อุเปจฺจ นิจฺฉารยิ วาจมาสภึ.

๒๙. ยถตฺถสิทฺธตฺตกุมารนามโก,

มหพฺพโล โยพฺพนหาริวิคฺคโห;

อุตุตฺตยานุจฺฉวิเกสุ ตีสุ โส,

นุโภสิ ปาสาทวเรสุ สมฺปทํ.

๓๐. |โอ๐.๐๐๑๒|

กทาจิ อุยฺยานปเถ ชราหตํ,

ตถาตุรํ กาลกตญฺจ สํยมึ;

กเมน ทิสฺวาน วิรตฺตมานโส,

ภเวสุ โส ปพฺพชิตุํ อกามยิ.

๓๑. สปุปฺผทีปาทีกเรหิ รตฺติยํ,

ปุรกฺขโต โส ติทิวาธิวาสิหิ;

สฉนฺนโก กนฺตกวาชิยานโต,

ตโต มหาการุณิโก’ภินิกฺขมิ.

๓๒. กเมน ปตฺวาน อโนมมาปคํ,

สุโธตมุตฺตาผลหาริเสกเต;

ปติฏฺฐหิตฺวา วรโมฬิพนฺธนํ,

สิตาสิลูนํ คคเน สมุกฺขิปี.

๓๓. |โอ๐.๐๐๑๓|

ปฏิคฺคเหตฺวา ติทสานมิสฺสโร,

สุวณฺนจงฺโคฏวเรน ตํ ตทา;

ติโยชนํ นีลมณีหิ เจติยํ,

อกาสิ จูฬามณิมตฺตโน ปุเร.

๓๔. ตโต ฆฏีการสโรชโยนินา,

สมาหฏํ ธารยี จีวราทิกํ;

อโถ สกํ วตฺถยุคํ นภตฺถเล,

ปสตฺถเวสคฺคหโณ สมุกฺขิปี.