చూళసఙ్గామో

౧. అనువిజ్జకస్సపటిపత్తి

౩౬౫. [పరి. ౪౨౧] సఙ్గామావచరే భిక్ఖునా సఙ్ఘం ఉపసఙ్కమన్తేన నీచచిత్తేన సఙ్ఘో ఉపసఙ్కమితబ్బో రజోహరణసమేన చిత్తేన; ఆసనకుసలేన భవితబ్బం నిసజ్జకుసలేన; థేరే భిక్ఖూ అనుపఖజ్జన్తేన, నవే భిక్ఖూ ఆసనేన అప్పటిబాహన్తేన, యథాపతిరూపే ఆసనే నిసీదితబ్బం; అనానాకథికేన భవితబ్బం అతిరచ్ఛానకథికేన; సామం వా ధమ్మో భాసితబ్బో పరో వా అజ్ఝేసితబ్బో అరియో వా తుణ్హీభావో నాతిమఞ్ఞితబ్బో.

సఙ్ఘేన అనుమతేన పుగ్గలేన అనువిజ్జకేన అనువిజ్జితుకామేన న ఉపజ్ఝాయో పుచ్ఛితబ్బో, న ఆచరియో పుచ్ఛితబ్బో, న సద్ధివిహారికో పుచ్ఛితబ్బో, న అన్తేవాసికో పుచ్ఛితబ్బో, న సమానుపజ్ఝాయకో పుచ్ఛితబ్బో, న సమానాచరియకో పుచ్ఛితబ్బో, న జాతి పుచ్ఛితబ్బా, న నామం పుచ్ఛితబ్బం, న గోత్తం పుచ్ఛితబ్బం, న ఆగమో పుచ్ఛితబ్బో, న కులపదేసో పుచ్ఛితబ్బో, న జాతిభూమి పుచ్ఛితబ్బా. తం కిం కారణా? అత్రస్స పేమం వా దోసో వా. పేమే వా సతి దోసే వా, ఛన్దాపి గచ్ఛేయ్య దోసాపి గచ్ఛేయ్య మోహాపి గచ్ఛేయ్య భయాపి గచ్ఛేయ్య.

సఙ్ఘేన అనుమతేన పుగ్గలేన అనువిజ్జకేన అనువిజ్జితుకామేన సఙ్ఘగరుకేన భవితబ్బం నో పుగ్గలగరుకేన, సద్ధమ్మగరుకేన భవితబ్బం నో ఆమిసగరుకేన, అత్థవసికేన భవితబ్బం నో పరిసకప్పికేన, కాలేన అనువిజ్జితబ్బం నో అకాలేన, భూతేన అనువిజ్జితబ్బం నో అభూతేన, సణ్హేన అనువిజ్జితబ్బం నో ఫరుసేన, అత్థసంహితేన అనువిజ్జితబ్బం నో అనత్థసంహితేన, మేత్తాచిత్తేన అనువిజ్జితబ్బం నో దోసన్తరేన, న ఉపకణ్ణకజప్పినా భవితబ్బం, న జిమ్హం పేక్ఖితబ్బం, న అక్ఖి నిఖణితబ్బం, న భముకం ఉక్ఖిపితబ్బం, న సీసం ఉక్ఖిపితబ్బం, న హత్థవికారో కాతబ్బో, న హత్థముద్దా దస్సేతబ్బా.

ఆసనకుసలేన భవితబ్బం నిసజ్జకుసలేన, యుగమత్తం పేక్ఖన్తేన అత్థం అనువిధియన్తేన సకే ఆసనే నిసీదితబ్బం, న చ ఆసనా వుట్ఠాతబ్బం, న వీతిహాతబ్బం, న కుమ్మగ్గో సేవితబ్బో, న బాహావిక్ఖేపకం [న వాచా విక్ఖేపకం (స్యా.)] భణితబ్బం, అతురితేన భవితబ్బం అసాహసికేన, అచణ్డికతేన భవితబ్బం వచనక్ఖమే, మేత్తాచిత్తేన భవితబ్బం హితానుకమ్పినా, కారుణికేన భవితబ్బం హితపరిసక్కినా, అసమ్ఫప్పలాపినా భవితబ్బం పరియన్తభాణినా, అవేరవసికేన భవితబ్బం అనసురుత్తేన, అత్తా పరిగ్గహేతబ్బో, పరో పరిగ్గహేతబ్బో, చోదకో పరిగ్గహేతబ్బో, చుదితకో పరిగ్గహేతబ్బో, అధమ్మచోదకో పరిగ్గహేతబ్బో, అధమ్మచుదితకో పరిగ్గహేతబ్బో, ధమ్మచోదకో పరిగ్గహేతబ్బో, ధమ్మచుదితకో పరిగ్గహేతబ్బో, వుత్తం అహాపేన్తేన అవుత్తం అపకాసేన్తేన ఓతిణ్ణాని పదబ్యఞ్జనాని సాధుకం పరిగ్గహేత్వా పరో పటిపుచ్ఛిత్వా యథా పటిఞ్ఞాయ కారేతబ్బో, మన్దో హాసేతబ్బో [వేపో పహాసేతబ్బో (స్యా.)], భీరూ అస్సాసేతబ్బో, చణ్డో నిసేధేతబ్బో, అసుచి విభావేతబ్బో, ఉజుమద్దవేన న ఛన్దాగతిం గన్తబ్బం, న దోసాగతిం గన్తబ్బం, న మోహాగతిం గన్తబ్బం, న భయాగతిం గన్తబ్బం, మజ్ఝత్తేన భవితబ్బం ధమ్మేసు చ పుగ్గలేసు చ. ఏవఞ్చ పన అనువిజ్జకో అనువిజ్జమానో సత్థు చేవ సాసనకరో హోతి, విఞ్ఞూనఞ్చ సబ్రహ్మచారీనం పియో చ హోతి మనాపో చ గరు చ భావనీయో చ.

౩౬౬. సుత్తం సంసన్దనత్థాయ, ఓపమ్మం నిదస్సనత్థాయ, అత్థో విఞ్ఞాపనత్థాయ, పటిపుచ్ఛా ఠపనత్థాయ, ఓకాసకమ్మం చోదనత్థాయ, చోదనా సారణత్థాయ, సారణా సవచనీయత్థాయ, సవచనీయం పలిబోధత్థాయ, పలిబోధో వినిచ్ఛయత్థాయ, వినిచ్ఛయో సన్తీరణత్థాయ, సన్తీరణం ఠానాఠానగమనత్థాయ, ఠానాఠానగమనం దుమ్మఙ్కూనం పుగ్గలానం నిగ్గహత్థాయ, పేసలానం భిక్ఖూనం సమ్పగ్గహత్థాయ, సఙ్ఘో సమ్పరిగ్గహసమ్పటిచ్ఛనత్థాయ, సఙ్ఘేన అనుమతా పుగ్గలా పచ్చేకట్ఠాయినో అవిసంవాదకట్ఠాయినో.

వినయో సంవరత్థాయ, సంవరో అవిప్పటిసారత్థాయ, అవిప్పటిసారో పాముజ్జత్థాయ, పాముజ్జం పీతత్థాయ, పీతి పస్సద్ధత్థాయ, పస్సద్ధి సుఖత్థాయ, సుఖం సమాధత్థాయ, సమాధి యథాభూతఞాణదస్సనత్థాయ, యథాభూతఞాణదస్సనం నిబ్బిదత్థాయ, నిబ్బిదా విరాగత్థాయ, విరాగో విముత్తత్థాయ, విముత్తి విముత్తిఞాణదస్సనత్థాయ, విముత్తిఞాణదస్సనం అనుపాదాపరినిబ్బానత్థాయ. ఏతదత్థా కథా, ఏతదత్థా మన్తనా, ఏతదత్థా ఉపనిసా, ఏతదత్థం సోతావధానం – యదిదం అనుపాదాచిత్తస్స విమోక్ఖోతి.

౩౬౭. అనుయోగవత్తం నిసామయ, కుసలేన బుద్ధిమతా కతం;

సువుత్తం సిక్ఖాపదానులోమికం, గతిం న నాసేన్తో సమ్పరాయికం.

వత్థుం విపత్తిం ఆపత్తిం, నిదానం ఆకారఅకోవిదో;

పుబ్బాపరం న జానాతి, కతాకతం సమేన చ.

కమ్మఞ్చ అధికరణఞ్చ, సమథే చాపి అకోవిదో;

రత్తో దుట్ఠో చ మూళ్హో చ, భయా మోహా చ గచ్ఛతి.

న చ సఞ్ఞత్తికుసలో, నిజ్ఝత్తియా చ అకోవిదో;

లద్ధపక్ఖో అహిరికో, కణ్హకమ్మో అనాదరో;

స వే [సచే (క.)] తాదిసకో భిక్ఖు, అప్పటిక్ఖోతి వుచ్చతి.

వత్థుం విపత్తిం ఆపత్తిం, నిదానం ఆకారకోవిదో;

పుబ్బాపరఞ్చ జానాతి, కతాకతం సమేన చ.

కమ్మఞ్చ అధికరణఞ్చ, సమథే చాపి కోవిదో;

అరత్తో అదుట్ఠో అమూళ్హో, భయా మోహా న గచ్ఛతి.

సఞ్ఞత్తియా చ కుసలో, నిజ్ఝత్తియా చ కోవిదో;

లద్ధపక్ఖో హిరిమనో, సుక్కకమ్మో సగారవో;

స వే తాదిసకో భిక్ఖు, సప్పటిక్ఖోతి వుచ్చతీతి.

చూళసఙ్గామో నిట్ఠితో.