౯. ఛత్తుపాహనవగ్గో

౨౨౬. ఛత్తుపాహనం ధారేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియా భిక్ఖునియో ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖునియో ఛత్తుపాహనం ధారేసుం, తస్మిం వత్థుస్మిం. ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

యానేన యాయన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియా భిక్ఖునియో ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖునియో యానేన యాయింసు, తస్మిం వత్థుస్మిం. ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

సఙ్ఘాణిం ధారేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? అఞ్ఞతరం భిక్ఖునిం ఆరబ్భ. కిస్మిం వత్థుస్మిన్తి? అఞ్ఞతరా భిక్ఖునీ సఙ్ఘాణిం ధారేసి, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

ఇత్థాలఙ్కారం ధారేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియా భిక్ఖునియో ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖునియో ఇత్థాలఙ్కారం ధారేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

గన్ధవణ్ణకేన నహాయన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియా భిక్ఖునియో ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖునియో గన్ధవణ్ణకేన నహాయింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

వాసితకేన పిఞ్ఞాకేన నహాయన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియా భిక్ఖునియో ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖునియో వాసితకేన పిఞ్ఞాకేన నహాయింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

భిక్ఖునియా ఉమ్మద్దాపేన్తియా పరిమద్దాపేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో భిక్ఖునియా ఉమ్మద్దాపేసుం పరిమద్దాపేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

సిక్ఖమానా ఉమ్మద్దాపేన్తియా పరిమద్దాపేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో సిక్ఖమానాయ ఉమ్మద్దాపేసుం పరిమద్దాపేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

సామణేరియా ఉమ్మద్దాపేన్తియా పరిమద్దాపేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో సామణేరియా ఉమ్మద్దాపేసుం పరిమద్దాపేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

గిహినియా ఉమ్మద్దాపేన్తియా పరిమద్దాపేన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో గిహినియా ఉమ్మద్దాపేసుం పరిమద్దాపేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – ఏళకలోమకే…పే….

భిక్ఖుస్స పురతో అనాపుచ్ఛా ఆసనే నిసీదన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో భిక్ఖుస్స పురతో అనాపుచ్ఛా ఆసనే నిసీదింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – కథినకే…పే….

అనోకాసకతం భిక్ఖుం పఞ్హం పుచ్ఛన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? సమ్బహులా భిక్ఖునియో ఆరబ్భ. కిస్మిం వత్థుస్మిన్తి? సమ్బహులా భిక్ఖునియో అనోకాసకతం భిక్ఖుం పఞ్హం పుచ్ఛింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – పదసోధమ్మే…పే….

అసఙ్కచ్చికాయ [అసఙ్కచ్ఛికాయ (స్యా.)] గామం పవిసన్తియా పాచిత్తియం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? అఞ్ఞతరం భిక్ఖునిం ఆరబ్భ. కిస్మిం వత్థుస్మిన్తి? అఞ్ఞతరా భిక్ఖునీ అసఙ్కచ్చికా గామం పావిసి, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ద్వీహి సముట్ఠానేహి సముట్ఠాతి – సియా కాయతో సముట్ఠాతి, న వాచతో న చిత్తతో; సియా కాయతో చ చిత్తతో చ సముట్ఠాతి, న వాచతో…పే….

ఛత్తుపాహనవగ్గో నవమో.

నవవగ్గఖుద్దకా నిట్ఠితా.

తస్సుద్దానం –

లసుణం సంహరే లోమం, తలమట్ఠఞ్చ సుద్ధికం;

భుఞ్జన్తామకధఞ్ఞానం, ద్వే విఘాసేన దస్సనా.

అన్ధకారే పటిచ్ఛన్నే, అజ్ఝోకాసే రథికాయ చ;

పురే పచ్ఛా వికాలే చ, దుగ్గహి నిరయే వధి.

నగ్గోదకా విసిబ్బేత్వా, పఞ్చాహికం సఙ్కమనీయం;

గణం విభఙ్గసమణం, దుబ్బలం కథినేన చ.

ఏకమఞ్చత్థరణేన, సఞ్చిచ్చ సహజీవినీ;

దత్వా సంసట్ఠఅన్తో చ, తిరోవస్సం న పక్కమే.

రాజా ఆసన్ది సుత్తఞ్చ, గిహి వూపసమేన చ;

దదే చీవరావసథం, పరియాపుణఞ్చ వాచయే.

ఆరామక్కోసచణ్డీ చ, భుఞ్జేయ్య కులమచ్ఛరీ;

వాసే పవారణోవాదం, ద్వే ధమ్మా పసాఖేన చ.

గబ్భీ పాయన్తీ ఛ ధమ్మే, అసమ్మతూనద్వాదస;

పరిపుణ్ణఞ్చ సఙ్ఘేన, సహ వుట్ఠా ఛ పఞ్చ చ.

కుమారీ ద్వే చ సఙ్ఘేన, ద్వాదస సమ్మతేన చ;

అలం సచే చ ద్వేవస్సం, సంసట్ఠా సామికేన చ.

పారివాసికానువస్సం, దువే వుట్ఠాపనేన చ;

ఛత్తయానేన సఙ్ఘాణి, ఇత్థాలఙ్కారవణ్ణకే.

పిఞ్ఞాకభిక్ఖునీ చేవ, సిక్ఖా చ సామణేరికా;

గిహి భిక్ఖుస్స పురతో, అనోకాసం సఙ్కచ్చికాతి.

తేసం వగ్గానం ఉద్దానం –

లసుణన్ధకారా న్హానా, తువట్టా చిత్తగారకా;

ఆరామం గబ్భినీ చేవ, కుమారీ ఛత్తుపాహనాతి.