౨౫౧. పబ్బాజనీయకమ్మపటిప్పస్సద్ధికథా

౪౨౪. ఇధ పన, భిక్ఖవే, భిక్ఖు సఙ్ఘేన పబ్బాజనీయకమ్మకతో సమ్మా వత్తతి, లోమం పాతేతి, నేత్థారం వత్తతి, పబ్బాజనీయస్స కమ్మస్స పటిప్పస్సద్ధిం యాచతి. తత్ర చే భిక్ఖూనం ఏవం హోతి – ‘‘అయం ఖో, ఆవుసో, భిక్ఖు సఙ్ఘేన పబ్బాజనీయకమ్మకతో సమ్మా వత్తతి, లోమం పాతేతి, నేత్థారం వత్తతి, పబ్బాజనీయస్స కమ్మస్స పటిప్పస్సద్ధిం యాచతి. హన్దస్స మయం పబ్బాజనీయకమ్మం పటిప్పస్సమ్భేమా’’తి. తే తస్స పబ్బాజనీయకమ్మం పటిప్పస్సమ్భేన్తి – అధమ్మేన వగ్గా. సో తమ్హా ఆవాసా అఞ్ఞం ఆవాసం గచ్ఛతి. తత్థపి భిక్ఖూనం ఏవం హోతి – ‘‘ఇమస్స ఖో, ఆవుసో, భిక్ఖునో సఙ్ఘేన పబ్బాజనీయకమ్మం పటిప్పస్సద్ధం అధమ్మేన వగ్గేహి. హన్దస్స మయం పబ్బాజనీయకమ్మం పటిప్పస్సమ్భేమా’’తి. తే తస్స పబ్బాజనీయకమ్మం పటిప్పస్సమ్భేన్తి – అధమ్మేన సమగ్గా…పే… ధమ్మేన వగ్గా… ధమ్మపతిరూపకేన వగ్గా… ధమ్మపతిరూపకేన సమగ్గా…పే….

చక్కం కాతబ్బం.

పబ్బాజనీయకమ్మపటిప్పస్సద్ధికథా నిట్ఠితా.