౨౩౭. చతువగ్గకరణాదికథా

౩౮౮. పఞ్చ సఙ్ఘా – చతువగ్గో భిక్ఖుసఙ్ఘో పఞ్చవగ్గో భిక్ఖుసఙ్ఘో, దసవగ్గో భిక్ఖుసఙ్ఘో, వీసతివగ్గో భిక్ఖుసఙ్ఘో, అతిరేకవీసతివగ్గో భిక్ఖుసఙ్ఘో. తత్ర, భిక్ఖవే, య్వాయం చతువగ్గో భిక్ఖుసఙ్ఘో, ఠపేత్వా తీణి కమ్మాని – ఉపసమ్పదం పవారణం అబ్భానం, ధమ్మేన సమగ్గో సబ్బకమ్మేసు కమ్మప్పత్తో. తత్ర, భిక్ఖవే, య్వాయం పఞ్చవగ్గో భిక్ఖుసఙ్ఘో, ఠపేత్వా ద్వే కమ్మాని – మజ్ఝిమేసు జనపదేసు ఉపసమ్పదం అబ్భానం, ధమ్మేన సమగ్గో సబ్బకమ్మేసు కమ్మప్పత్తో. తత్ర, భిక్ఖవే, య్వాయం దసవగ్గో భిక్ఖుసఙ్ఘో, ఠపేత్వా ఏకం కమ్మం – అబ్భానం, ధమ్మేన సమగ్గో సబ్బకమ్మేసు కమ్మప్పత్తో. తత్ర, భిక్ఖవే, య్వాయం వీసతివగ్గో భిక్ఖుసఙ్ఘో ధమ్మేన సమగ్గో సబ్బకమ్మేసు కమ్మప్పత్తో. తత్ర, భిక్ఖవే, య్వాయం అతిరేకవీసతివగ్గో భిక్ఖుసఙ్ఘో ధమ్మేన సమగ్గో సబ్బకమ్మేసు కమ్మప్పత్తో.

౩౮౯. చతువగ్గకరణఞ్చే, భిక్ఖవే, కమ్మం భిక్ఖునిచతుత్థో కమ్మం కరేయ్య – అకమ్మం న చ కరణీయం. చతువగ్గకరణఞ్చే, భిక్ఖవే, కమ్మం సిక్ఖమానచతుత్థో కమ్మం కరేయ్య… అకమ్మం న చ కరణీయం…పే…. సామణేరచతుత్థో కమ్మం కరేయ్య… అకమ్మం న చ కరణీయం. సామణేరిచతుత్థో కమ్మం కరేయ్య… అకమ్మం న చ కరణీయం. సిక్ఖం పచ్చక్ఖాతకచతుత్థో కమ్మం కరేయ్య… అకమ్మం న చ కరణీయం. అన్తిమవత్థుం అజ్ఝాపన్నకచతుత్థో కమ్మం కరేయ్య… అకమ్మం న చ కరణీయం. ఆపత్తియా అదస్సనే ఉక్ఖిత్తకచతుత్థో కమ్మం కరేయ్య… అకమ్మం న చ కరణీయం. ఆపత్తియా అప్పటికమ్మే ఉక్ఖిత్తకచతుత్థో కమ్మం కరేయ్య… అకమ్మం న చ కరణీయం. పాపికాయ దిట్ఠియా అప్పటినిస్సగ్గే ఉక్ఖిత్తకచతుత్థో కమ్మం కరేయ్య… అకమ్మం న చ కరణీయం. పణ్డకచతుత్థో కమ్మం కరేయ్య… అకమ్మం న చ కరణీయం. థేయ్యసంవాసకచతుత్థో కమ్మం కరేయ్య… అకమ్మం న చ కరణీయం. తిత్థియపక్కన్తకచతుత్థో కమ్మం కరేయ్య… అకమ్మం న చ కరణీయం. తిరచ్ఛానగతచతుత్థో కమ్మం కరేయ్య… అకమ్మం న చ కరణీయం. మాతుఘాతకచతుత్థో కమ్మం కరేయ్య… అకమ్మం న చ కరణీయం. పితుఘాతకచతుత్థో కమ్మం కరేయ్య… అకమ్మం న చ కరణీయం. అరహన్తఘాతకచతుత్థో కమ్మం కరేయ్య… అకమ్మం న చ కరణీయం. భిక్ఖునిదూసకచతుత్థో కమ్మం కరేయ్య… అకమ్మం న చ కరణీయం. సఙ్ఘభేదకచతుత్థో కమ్మం కరేయ్య… అకమ్మం న చ కరణీయం. లోహితుప్పాదకచతుత్థో కమ్మం కరేయ్య… అకమ్మం న చ కరణీయం. ఉభతోబ్యఞ్జనకచతుత్థో కమ్మం కరేయ్య… అకమ్మం న చ కరణీయం. నానాసంవాసకచతుత్థో కమ్మం కరేయ్య… అకమ్మం న చ కరణీయం. నానాసీమాయ ఠితచతుత్థో కమ్మం కరేయ్య… అకమ్మం న చ కరణీయం. ఇద్ధియా వేహాసే ఠితచతుత్థో కమ్మం కరేయ్య… అకమ్మం న చ కరణీయం. యస్స సఙ్ఘో కమ్మం కరోతి, తంచతుత్థో కమ్మం కరేయ్య … అకమ్మం న చ కరణీయం.

చతువరణం.

౩౯౦. పఞ్చవగ్గకరణఞ్చే, భిక్ఖవే, కమ్మం భిక్ఖునిపఞ్చమో కమ్మం కరేయ్య… అకమ్మం న చ కరణీయం. పఞ్చవగ్గకరణఞ్చే, భిక్ఖవే, కమ్మం సిక్ఖమానపఞ్చమో కమ్మం కరేయ్య…పే…. సామణేరపఞ్చమో కమ్మం కరేయ్య… సామణేరిపఞ్చమో కమ్మం కరేయ్య … సిక్ఖం పచ్చక్ఖాతకపఞ్చమో కమ్మం కరేయ్య… అన్తిమవత్థుం అజ్ఝాపన్నకపఞ్చమో కమ్మం కరేయ్య… ఆపత్తియా అదస్సనే ఉక్ఖిత్తకపఞ్చమో కమ్మం కరేయ్య… ఆపత్తియా అప్పటికమ్మే ఉక్ఖిత్తకపఞ్చమో కమ్మం కరేయ్య… పాపికాయ దిట్ఠియా అప్పటినిస్సగ్గే ఉక్ఖిత్తకపఞ్చమో కమ్మం కరేయ్య… పణ్డకపఞ్చమో కమ్మం కరేయ్య… థేయ్యసంవాసకపఞ్చమో కమ్మం కరేయ్య… తిత్థియపక్కన్తకపఞ్చమో కమ్మం కరేయ్య… తిరచ్ఛానగతపఞ్చమో కమ్మం కరేయ్య… మాతుఘాతకపఞ్చమో కమ్మం కరేయ్య… పితుఘాతకపఞ్చమో కమ్మం కరేయ్య… అరహన్తఘాతకపఞ్చమో కమ్మం కరేయ్య… భిక్ఖునిదూసకపఞ్చమో కమ్మం కరేయ్య… సఙ్ఘభేదకపఞ్చమో కమ్మం కరేయ్య… లోహితుప్పాదకపఞ్చమో కమ్మం కరేయ్య… ఉభతోబ్యఞ్జనకపఞ్చమో కమ్మం కరేయ్య… నానాసంవాసకపఞ్చమో కమ్మం కరేయ్య… నానాసీమాయ ఠితపఞ్చమో కమ్మం కరేయ్య… ఇద్ధియా వేహాసే ఠితపఞ్చమో కమ్మం కరేయ్య… యస్స సఙ్ఘో కమ్మం కరోతి, తంపఞ్చమో కమ్మం కరేయ్య – అకమ్మం న చ కరణీయం.

పఞ్చవగ్గకరణం.

౩౯౧. దసవగ్గకరణఞ్చే, భిక్ఖవే, కమ్మం భిక్ఖునిదసమో కమ్మం కరేయ్య, అకమ్మం న చ కరణీయం. దసవగ్గకరణఞ్చే, భిక్ఖవే, కమ్మం సిక్ఖమానదసమో కమ్మం కరేయ్య, అకమ్మం న చ కరణీయం…పే…. దసవగ్గకరణఞ్చే, భిక్ఖవే, కమ్మం యస్స సఙ్ఘో కమ్మం కరోతి, తందసమో కమ్మం కరేయ్య – అకమ్మం న చ కరణీయం.

దసవగ్గకరణం.

౩౯౨. వీసతివగ్గకరణఞ్చే, భిక్ఖవే, కమ్మం భిక్ఖునివీసో కమ్మం కరేయ్య – అకమ్మం న చ కరణీయం. వీసతివగ్గకరణఞ్చే, భిక్ఖవే, కమ్మం సిక్ఖమానవీసో కమ్మం కరేయ్య …పే… సామణేరవీసో కమ్మం కరేయ్య… సామణేరివీసో కమ్మం కరేయ్య… సిక్ఖం పచ్చక్ఖాతకవీసో కమ్మం కరేయ్య… అన్తిమవత్థుం అజ్ఝాపన్నకవీసో కమ్మం కరేయ్య… ఆపత్తియా అదస్సనే ఉక్ఖిత్తకవీసో కమ్మం కరేయ్య… ఆపత్తియా అప్పటికమ్మే ఉక్ఖిత్తకవీసో కమ్మం కరేయ్య… పాపికాయ దిట్ఠియా అప్పటినిస్సగ్గే ఉక్ఖిత్తకవీసో కమ్మం కరేయ్య… పణ్డకవీసో కమ్మం కరేయ్య… థేయ్యసంవాసకవీసో కమ్మం కరేయ్య… తిత్థియపక్కన్తకవీసో కమ్మం కరేయ్య… తిరచ్ఛానగతవీసో కమ్మం కరేయ్య… మాతుఘాతకవీసో కమ్మం కరేయ్య… పితుఘాతకవీసో కమ్మం కరేయ్య… అరహన్తఘాతకవీసో కమ్మం కరేయ్య… భిక్ఖునిదూసకవీసో కమ్మం కరేయ్య… సఙ్ఘభేదకవీసో కమ్మం కరేయ్య… లోహితుప్పాదకవీసో కమ్మం కరేయ్య… ఉభతోబ్యఞ్జనకవీసో కమ్మం కరేయ్య… నానాసంవాసకవీసో కమ్మం కరేయ్య… నానాసీమాయ ఠితవీసో కమ్మం కరేయ్య… ఇద్ధియా వేహాసే ఠితవీసో కమ్మం కరేయ్య… యస్స సఙ్ఘో కమ్మం కరోతి, తంవీసో కమ్మం కరేయ్య – అకమ్మం న చ కరణీయం.

వీసతివగ్గకరణం.

చతువగ్గకరణాదికథా నిట్ఠితా.