౨౦౦. పలిబోధాపలిబోధకథా

౩౨౫. ద్వేమే, భిక్ఖవే, కథినస్స పలిబోధా, ద్వే అపలిబోధా. కతమే చ, భిక్ఖవే, ద్వే కథినస్స పలిబోధా? ఆవాసపలిబోధో చ చీవరపలిబోధో చ. కథఞ్చ, భిక్ఖవే, ఆవాసపలిబోధో హోతి? ఇధ, భిక్ఖవే, భిక్ఖు వసతి వా తస్మిం ఆవాసే, సాపేక్ఖో వా పక్కమతి ‘‘పచ్చేస్స’’న్తి. ఏవం ఖో, భిక్ఖవే, ఆవాసపలిబోధో హోతి. కథఞ్చ, భిక్ఖవే, చీవరపలిబోధో హోతి? ఇధ, భిక్ఖవే, భిక్ఖునో చీవరం అకతం వా హోతి విప్పకతం వా, చీవరాసా వా అనుపచ్ఛిన్నా. ఏవం ఖో, భిక్ఖవే, చీవరపలిబోధో హోతి. ఇమే ఖో, భిక్ఖవే, ద్వే కథినస్స పలిబోధా.

కతమే చ, భిక్ఖవే, ద్వే కథినస్స అపలిబోధా? ఆవాసఅపలిబోధో చ చీవరఅపలిబోధో చ. కథఞ్చ, భిక్ఖవే, ఆవాసఅపలిబోధో హోతి? ఇధ, భిక్ఖవే, భిక్ఖు పక్కమతి తమ్హా ఆవాసా చత్తేన వన్తేన ముత్తేన అనపేక్ఖో [అనపేక్ఖేన (క.)] ‘‘న పచ్చేస్స’’న్తి. ఏవం ఖో, భిక్ఖవే, ఆవాసఅపలిబోధో హోతి. కథఞ్చ, భిక్ఖవే, చీవరఅపలిబోధో హోతి? ఇధ, భిక్ఖవే, భిక్ఖునో చీవరం కతం వా హోతి, నట్ఠం వా వినట్ఠం వా దడ్ఢం వా, చీవరాసా వా ఉపచ్ఛిన్నా. ఏవం ఖో, భిక్ఖవే, చీవరఅపలిబోధో హోతి. ఇమే ఖో, భిక్ఖవే, ద్వే కథినస్స అపలిబోధాతి.

పలిబోధాపలిబోధకథా నిట్ఠితా.

కథినక్ఖన్ధకో నిట్ఠితో సత్తమో.