౧౯౮. అపవిలాయననవకం

౩౨౧. భిక్ఖు అత్థతకథినో దిసంగమికో పక్కమతి చీవరపటివీసం అపవిలాయమానో [అపవినయమానో (సీ.), అపచినయమానో (క.)]. తమేనం దిసఙ్గతం భిక్ఖూ పుచ్ఛన్తి – ‘‘కహం త్వం, ఆవుసో, వస్సంవుట్ఠో, కత్థ చ తే చీవరపటివీసో’’తి? సో ఏవం వదేతి – ‘‘అముకస్మిం ఆవాసే వస్సంవుట్ఠోమ్హి. తత్థ చ మే చీవరపటివీసో’’తి. తే ఏవం వదన్తి – ‘‘గచ్ఛావుసో, తం చీవరం ఆహర, మయం తే ఇధ చీవరం కరిస్సామా’’తి. సో తం ఆవాసం గన్త్వా భిక్ఖూ పుచ్ఛతి – ‘‘కహం మే, ఆవుసో, చీవరపటివీసో’’తి? తే ఏవం వదన్తి – ‘‘అయం తే, ఆవుసో, చీవరపటివీసో; కహం గమిస్ససీ’’తి? సో ఏవం వదేతి – ‘‘అముకం నామ [అముకఞ్చ (క.)] ఆవాసం గమిస్సామి, తత్థ మే భిక్ఖూ చీవరం కరిస్సన్తీ’’తి. తే ఏవం వదన్తి – ‘‘అలం, ఆవుసో, మా అగమాసి. మయం తే ఇధ చీవరం కరిస్సామా’’తి. తస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స భిక్ఖునో నిట్ఠానన్తికో కథినుద్ధారో.

భిక్ఖు అత్థతకథినో దిసంగమికో పక్కమతి…పే… ‘‘నేవిమం చీవరం కారేస్సం, న పచ్చేస్స’’న్తి. తస్స భిక్ఖునో సన్నిట్ఠానన్తికో కథినుద్ధారో.

భిక్ఖు అత్థతకథినో దిసంగమికో పక్కమతి…పే… ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స తం చీవరం కయిరమానం నస్సతి. తస్స భిక్ఖునో నాసనన్తికో కథినుద్ధారో.

౩౨౨. భిక్ఖు అత్థతకథినో దిసంగమికో పక్కమతి చీవరపటివీసం అపవిలాయమానో. తమేనం దిసంగతం భిక్ఖూ పుచ్ఛన్తి – ‘‘కహం త్వం, ఆవుసో, వస్సంవుట్ఠో, కత్థ చ తే చీవరపటివీసో’’తి? సో ఏవం వదేతి – ‘‘అముకస్మిం ఆవాసే వస్సంవుట్ఠోమ్హి, తత్థ చ మే చీవరపటివీసో’’తి. తే ఏవం వదన్తి – ‘‘గచ్ఛావుసో, తం చీవరం ఆహర, మయం తే ఇధ చీవరం కరిస్సామా’’తి. సో తం ఆవాసం గన్త్వా భిక్ఖూ పుచ్ఛతి – ‘‘కహం మే, ఆవుసో, చీవరపటివీసో’’తి? తే ఏవం వదన్తి – ‘‘అయం తే, ఆవుసో, చీవరపటివీసో’’తి. సో తం చీవరం ఆదాయ తం ఆవాసం గచ్ఛతి. తమేనం అన్తరామగ్గే భిక్ఖూ పుచ్ఛన్తి – ‘‘ఆవుసో, కహం గమిస్ససీ’’తి? సో ఏవం వదేతి – ‘‘అముకం నామ ఆవాసం గమిస్సామి, తత్థ మే భిక్ఖూ చీవరం కరిస్సన్తీ’’తి. తే ఏవం వదన్తి – ‘‘అలం, ఆవుసో, మా అగమాసి, మయం తే ఇధ చీవరం కరిస్సామా’’తి. తస్స ఏవం హోతి – ‘‘ఇధేవిమం చీవరం కారేస్సం న పచ్చేస్స’’న్తి. సో తం చీవరం కారేతి. తస్స భిక్ఖునో నిట్ఠానన్తికో కథినుద్ధారో.

భిక్ఖు అత్థతకథినో దిసంగమికో పక్కమతి చీవరపటివీసం అపవిలాయమానో. తమేనం దిసంగతం భిక్ఖూ పుచ్ఛన్తి – ‘‘కహం త్వం, ఆవుసో, వస్సంవుట్ఠో, కత్థ చ తే చీవరపటివీసో’’తి? సో ఏవం వదేతి – ‘‘అముకస్మిం ఆవాసే వస్సంవుట్ఠోమ్హి, తత్థ చ మే చీవరపటివీసో’’తి. తే ఏవం వదన్తి – ‘‘గచ్ఛావుసో, తం చీవరం ఆహర, మయం తే ఇధ చీవరం కరిస్సామా’’తి. సో తం ఆవాసం గన్త్వా భిక్ఖూ పుచ్ఛతి – ‘‘కహం మే, ఆవుసో, చీవరపటివీసో’’తి? తే ఏవం వదన్తి – ‘‘అయం తే, ఆవుసో, చీవరపటివీసో’’తి. సో తం చీవరం ఆదాయ తం ఆవాసం గచ్ఛతి. తమేనం అన్తరామగ్గే భిక్ఖూ పుచ్ఛన్తి – ‘‘ఆవుసో, కహం గమిస్ససీ’’తి? సో ఏవం వదేతి – ‘‘అముకం నామ ఆవాసం గమిస్సామి, తత్థ మే భిక్ఖూ చీవరం కరిస్సన్తీ’’తి. తే ఏవం వదన్తి – ‘‘అలం, ఆవుసో, మా అగమాసి, మయం తే ఇధ చీవరం కరిస్సామా’’తి. తస్స ఏవం హోతి – ‘‘నేవిమం చీవరం కారేస్సం, న పచ్చేస్స’’న్తి. తస్స భిక్ఖునో సన్నిట్ఠానన్తికో కథినుద్ధారో.

౩౨౩. భిక్ఖు అత్థతకథినో దిసంగమికో పక్కమతి చీవరపటివీసం అపవిలాయమానో. తమేనం దిసంగతం భిక్ఖూ పుచ్ఛన్తి – ‘‘కహం త్వం, ఆవుసో, వస్సంవుట్ఠో, కత్థ చ తే చీవరపటివీసో’’తి? సో ఏవం వదేతి – ‘‘అముకస్మిం ఆవాసే వస్సంవుట్ఠోమ్హి, తత్థ చ మే చీవరపటివీసో’’తి. తే ఏవం వదన్తి – ‘‘గచ్ఛావుసో, తం చీవరం ఆహర, మయం తే ఇధ చీవరం కరిస్సామా’’తి. సో తం ఆవాసం గన్త్వా భిక్ఖూ పుచ్ఛతి – ‘‘కహం మే, ఆవుసో, చీవరపటివీసో’’తి? తే ఏవం వదన్తి – ‘‘అయం తే, ఆవుసో, చీవరపటివీసో’’తి. సో తం చీవరం ఆదాయ తం ఆవాసం గచ్ఛతి. తస్స తం ఆవాసం గతస్స ఏవం హోతి – ‘‘ఇధేవిమం చీవరం కారేస్సం, న పచ్చేస్స’’న్తి. సో తం చీవరం కారేతి. తస్స భిక్ఖునో నిట్ఠానన్తికో కథినుద్ధారో.

అపవిలాయననవకం నిట్ఠితం.