౧౩౧. కుక్కుచ్చపకతపన్నరసకం

౨౨౫. ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ సమ్బహులా ఆవాసికా భిక్ఖూ సన్నిపతన్తి, పఞ్చ వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం పవారేతుం, నామ్హాకం న కప్పతీ’’తి కుక్కుచ్చపకతా పవారేన్తి. తేహి పవారియమానే అథఞ్ఞే ఆవాసికా భిక్ఖూ ఆగచ్ఛన్తి బహుతరా. తేహి, భిక్ఖవే, భిక్ఖూహి పున పవారేతబ్బం. పవారితానం ఆపత్తి దుక్కటస్స.

ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ సమ్బహులా ఆవాసికా భిక్ఖూ సన్నిపతన్తి, పఞ్చ వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం పవారేతుం, నామ్హాకం న కప్పతీ’’తి కుక్కుచ్చపకతా పవారేన్తి. తేహి పవారియమానే అథఞ్ఞే ఆవాసికా భిక్ఖూ ఆగచ్ఛన్తి సమసమా. పవారితా సుప్పవారితా, అవసేసేహి పవారేతబ్బం. పవారితానం ఆపత్తి దుక్కటస్స.

ఇధ పన, భిక్ఖవే, అఞ్ఞరస్మిం ఆవాసే తదహు పవారణాయ సమ్బహులా ఆవాసికా భిక్ఖూ సన్నిపతన్తి, పఞ్చ వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం పవారేతుం, నామ్హాకం న కప్పతీ’’తి కుక్కుచ్చపకతా పవారేన్తి. తేహి పవారియమానే అథఞ్ఞే ఆవాసికా భిక్ఖూ ఆగచ్ఛన్తి థోకతరా. పవారితా సుప్పవారితా, అవసేసేహి [అవసేసేహి తేసం సన్తికే (క.)] పవారేతబ్బం. పవారితానం ఆపత్తి దుక్కటస్స.

ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ సమ్బహులా ఆవాసికా భిక్ఖూ సన్నిపతన్తి, పఞ్చ వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం పవారేతుం, నామ్హాకం న కప్పతీ’’తి కుక్కుచ్చపకతా పవారేన్తి. తేహి పవారితమత్తే,…పే… అవుట్ఠితాయ పరిసాయ…పే… ఏకచ్చాయ వుట్ఠితాయ పరిసాయ…పే… సబ్బాయ వుట్ఠితాయ పరిసాయ, అథఞ్ఞే ఆవాసికా భిక్ఖూ ఆగచ్ఛన్తి బహుతరా…పే… సమసమా…పే… థోకతరా. పవారితా సుప్పవారితా, తేసం సన్తికే పవారేతబ్బం. పవారితానం ఆపత్తి దుక్కటస్స.

కుక్కుచ్చపకతపన్నరసకం నిట్ఠితం.