౧౨౬. ఆపత్తిఆవికరణవిధి

౨౨౦. తేన ఖో పన సమయేన అఞ్ఞతరో భిక్ఖు పవారయమానో ఆపత్తిం సరతి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘న సాపత్తికేన పవారేతబ్బ’న్తి. అహఞ్చమ్హి ఆపత్తిం ఆపన్నో. కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం.

ఇధ పన, భిక్ఖవే, భిక్ఖు పవారయమానో ఆపత్తిం సరతి. తేన, భిక్ఖవే, భిక్ఖునా సామన్తో భిక్ఖు ఏవమస్స వచనీయో – ‘‘అహం, ఆవుసో, ఇత్థన్నామం ఆపత్తిం ఆపన్నో. ఇతో వుట్ఠహిత్వా తం ఆపత్తిం పటికరిస్సామీ’’తి వత్వా పవారేతబ్బం; న త్వేవ తప్పచ్చయా పవారణాయ అన్తరాయో కాతబ్బో.

ఇధ పన, భిక్ఖవే, భిక్ఖు పవారయమానో ఆపత్తియా వేమతికో హోతి. తేన, భిక్ఖవే,

భిక్ఖునా సామన్తో భిక్ఖు ఏవమస్స వచనీయో – ‘‘అహం, ఆవుసో, ఇత్థన్నామాయ ఆపత్తియా వేమతికో; యదా నిబ్బేమతికో భవిస్సామి తదా తం ఆపత్తిం పటికరిస్సామీ’’తి వత్వా పవారేతబ్బం; న త్వేవ తప్పచ్చయా పవారణాయ అన్తరాయో కాతబ్బోతి.

ఆపత్తి ఆవికరణవిధి నిట్ఠితా.