౩. వస్సూపనాయికక్ఖన్ధకో

౧౦౭. వస్సూపనాయికానుజాననా

౧౮౪. తేన సమయేన బుద్ధో భగవా రాజగహే విహరతి వేళువనే కలన్దకనివాపే. తేన ఖో పన సమయేన భగవతా భిక్ఖూనం వస్సావాసో అపఞ్ఞత్తో హోతి. తేఇధ భిక్ఖూ హేమన్తమ్పి గిమ్హమ్పి వస్సమ్పి చారికం చరన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా హేమన్తమ్పి గిమ్హమ్పి వస్సమ్పి చారికం చరిస్సన్తి, హరితాని తిణాని సమ్మద్దన్తా, ఏకిన్ద్రియం జీవం విహేఠేన్తా, బహూ ఖుద్దకే పాణే సఙ్ఘాతం ఆపాదేన్తా. ఇమే హి నామ అఞ్ఞతిత్థియా దురక్ఖాతధమ్మా వస్సావాసం అల్లీయిస్సన్తి సఙ్కసాయిస్సన్తి. ఇమే హి నామ సకున్తకా రుక్ఖగ్గేసు కులావకాని కరిత్వా వస్సావాసం అల్లీయిస్సన్తి సఙ్కసాయిస్సన్తి [సఙ్కాసయిస్సన్తి (సీ. స్యా.)]. ఇమే పన సమణా సక్యపుత్తియా హేమన్తమ్పి గిమ్హమ్పి వస్సమ్పి చారికం చరన్తి, హరితాని తిణాని సమ్మద్దన్తా, ఏకిన్ద్రియం జీవం విహేఠేన్తా, బహూ ఖుద్దకే పాణే సఙ్ఘాతం ఆపాదేన్తా’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, వస్సం ఉపగన్తు’’న్తి. అథ ఖో భిక్ఖూనం ఏతదహోసి – ‘‘కదా ను ఖో వస్సం ఉపగన్తబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, వస్సానే వస్సం ఉపగన్తున్తి.

అథ ఖో భిక్ఖూనం ఏతదహోసి – ‘‘కతి ను ఖో వస్సూపనాయికా’’తి? భగవతో ఏతమత్థం

ఆరోచేసుం. ద్వేమా, భిక్ఖవే, వస్సూపనాయికా – పురిమికా, పచ్ఛిమికా. అపరజ్జుగతాయ ఆసాళ్హియా పురిమికా ఉపగన్తబ్బా, మాసగతాయ ఆసాళ్హియా పచ్ఛిమికా ఉపగన్తబ్బా – ఇమా ఖో, భిక్ఖవే, ద్వే వస్సూపనాయికాతి.

వస్సూపనాయికానుజాననా నిట్ఠితా.

౧౦౮. వస్సానే చారికాపటిక్ఖేపాది

౧౮౫. తేన ఖో పన సమయేన ఛబ్బగ్గియా భిక్ఖూ వస్సం ఉపగన్త్వా అన్తరావస్సం చారికం చరన్తి. మనుస్సా తథేవ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా హేమన్తమ్పి గిమ్హమ్పి వస్సమ్పి చారికం చరిస్సన్తి, హరితాని తిణాని సమ్మద్దన్తా, ఏకిన్ద్రియం జీవం విహేఠేన్తా, బహూ ఖుద్దకే పాణే సఙ్ఘాతం ఆపాదేన్తా. ఇమే హి నామ అఞ్ఞతిత్థియా దురక్ఖాతధమ్మా వస్సావాసం అల్లీయిస్సన్తి సఙ్కసాయిస్సన్తి. ఇమే హి నామ సకున్తకా రుక్ఖగ్గేసు కులావకాని కరిత్వా వస్సావాసం అల్లీయిస్సన్తి సఙ్కసాయిస్సన్తి. ఇమే పన సమణా సక్యపుత్తియా హేమన్తమ్పి గిమ్హమ్పి వస్సమ్పి చారికం చరన్తి, హరితాని తిణాని సమ్మద్దన్తా, ఏకిన్ద్రియం జీవం విహేఠేన్తా, బహూ ఖుద్దకే పాణే సఙ్ఘాతం ఆపాదేన్తా’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ వస్సం ఉపగన్త్వా అన్తరావస్సం చారికం చరిస్సన్తీ’’తి? అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, వస్సం ఉపగన్త్వా పురిమం వా తేమాసం పచ్ఛిమం వా తేమాసం అవసిత్వా చారికా పక్కమితబ్బా. యో పక్కమేయ్య, ఆపత్తి దుక్కటస్సా’’తి.

౧౮౬. తేన ఖో పన సమయేన ఛబ్బగ్గియా భిక్ఖూ న ఇచ్ఛన్తి వస్సం ఉపగన్తుం. భగవతో ఏతమత్థం ఆరోచేసుం. న, భిక్ఖవే, వస్సం న ఉపగన్తబ్బం. యో న ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ తదహు వస్సూపనాయికాయ వస్సం అనుపగన్తుకామా సఞ్చిచ్చ ఆవాసం అతిక్కమన్తి. భగవతో ఏతమత్థం ఆరోచేసుం. న, భిక్ఖవే, తదహు వస్సూపనాయికాయ వస్సం అనుపగన్తుకామేన సఞ్చిచ్చ ఆవాసో అతిక్కమితబ్బో. యో అతిక్కమేయ్య, ఆపత్తి దుక్కటస్సాతి.

తేన ఖో పన సమయేన రాజా మాగధో సేనియో బిమ్బిసారో వస్సం ఉక్కడ్ఢితుకామో

భిక్ఖూనం సన్తికే దూతం పాహేసి – యది పనాయ్యా ఆగమే జుణ్హే వస్సం ఉపగచ్ఛేయ్యున్తి. భగవతో ఏతమత్థం ఆరోచేసుం. అనుజానామి, భిక్ఖవే, రాజూనం అనువత్తితున్తి.

వస్సానే చారికాపటిక్ఖేపాది నిట్ఠితా.

౧౦౯. సత్తాహకరణీయానుజాననా

౧౮౭. అథ ఖో భగవా రాజగహే యథాభిరన్తం విహరిత్వా యేన సావత్థి తేన చారికం పక్కామి. అనుపుబ్బేన చారికం చరమానో యేన సావత్థి తదవసరి. తత్ర సుదం భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన కోసలేసు జనపదే ఉదేనేన ఉపాసకేన సఙ్ఘం ఉద్దిస్స విహారో కారాపితో హోతి. సో భిక్ఖూనం సన్తికే దూతం పాహేసి – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి. భిక్ఖూ ఏవమాహంసు – ‘‘భగవతా, ఆవుసో, పఞ్ఞత్తం ‘న వస్సం ఉపగన్త్వా పురిమం వా తేమాసం పచ్ఛిమం వా తేమాసం అవసిత్వా చారికా పక్కమితబ్బా’తి. ఆగమేతు ఉదేనో ఉపాసకో, యావ భిక్ఖూ వస్సం వసన్తి. వస్సంవుట్ఠా ఆగమిస్సన్తి. సచే పనస్స అచ్చాయికం కరణీయం, తత్థేవ ఆవాసికానం భిక్ఖూనం సన్తికే విహారం పతిట్ఠాపేతూ’’తి. ఉదేనో ఉపాసకో ఉజ్ఝాయతి ఖియ్యతి విపాచేతి – ‘‘కథఞ్హి నామ భదన్తా మయా పహితే న ఆగచ్ఛిస్సన్తి. అహఞ్హి దాయకో కారకో సఙ్ఘుపట్ఠాకో’’తి. అస్సోసుం ఖో భిక్ఖూ ఉదేనస్స ఉపాసకస్స ఉజ్ఝాయన్తస్స ఖియ్యన్తస్స విపాచేన్తస్స. అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, సత్తన్నం సత్తాహకరణీయేన పహితే గన్తుం, న త్వేవ అప్పహితే. భిక్ఖుస్స, భిక్ఖునియా, సిక్ఖమానాయ, సామణేరస్స, సామణేరియా, ఉపాసకస్స, ఉపాసికాయ – అనుజానామి, భిక్ఖవే, ఇమేసం సత్తన్నం సత్తాహకరణీయేన పహితే గన్తుం, న త్వేవ అప్పహితే. సత్తాహం సన్నివత్తో కాతబ్బో’’.

౧౮౮. ఇధ పన, భిక్ఖవే, ఉపాసకేన సఙ్ఘం ఉద్దిస్స విహారో కారాపితో హోతి. సో చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, ఉపాసకేన సఙ్ఘం ఉద్దిస్స అడ్ఢయోగో కారాపితో హోతి…పే… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… కప్పియకుటి కారాపితా హోతి… వచ్చకుటి కారాపితా హోతి… చఙ్కమో కారాపితో హోతి … చఙ్కమనసాలా కారాపితా హోతి… ఉదపానో కారాపితో హోతి … ఉదపానసాలా కారాపితా హోతి… జన్తాఘరం కారాపితం హోతి… జన్తాఘరసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి. సో చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, ఉపాసకేన సమ్బహులే భిక్ఖూ ఉద్దిస్స…పే… ఏకం భిక్ఖుం ఉద్దిస్స విహారో కారాపితో హోతి… అడ్ఢయోగో కారాపితో హోతి… పాసాదో కారాపితో హోతి … హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… కప్పియకుటి కారాపితా హోతి… వచ్చకుటి కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి… ఉదపానసాలా కారాపితా హోతి… జన్తాఘరం కారాపితం హోతి… జన్తాఘరసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి. సో చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, ఉపాసకేన భిక్ఖునిసఙ్ఘం ఉద్దిస్స…పే… సమ్బహులా భిక్ఖునియో ఉద్దిస్స…పే… ఏకం భిక్ఖునిం ఉద్దిస్స…పే… సమ్బహులా సిక్ఖమానాయో ఉద్దిస్స…పే… ఏకం సిక్ఖమానం ఉద్దిస్స…పే… సమ్బహులే సామణేరే ఉద్దిస్స…పే… ఏకం సామణేరం ఉద్దిస్స…పే… సమ్బహులా సామణేరియో ఉద్దిస్స…పే… ఏకం సామణేరిం ఉద్దిస్స విహారో కారాపితో హోతి…పే… అడ్ఢయోగో కారాపితో హోతి… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి … కప్పియకుటి కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి… ఉదపానసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి. సో చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

౧౮౯. ఇధ పన, భిక్ఖవే, ఉపాసకేన అత్తనో అత్థాయ నివేసనం కారాపితం హోతి…పే… సయనిఘరం కారాపితం హోతి… ఉదోసితో కారాపితో హోతి… అట్టో కారాపితో హోతి… మాళో కారాపితో హోతి… ఆపణో కారాపితో హోతి… ఆపణసాలా కారాపితా హోతి… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… రసవతీ కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి… ఉదపానసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి … ఆరామవత్థు కారాపితం హోతి… పుత్తస్స వా వారేయ్యం హోతి… ధీతుయా వా వారేయ్యం హోతి… గిలానో వా హోతి… అభిఞ్ఞాతం వా సుత్తన్తం భణతి. సో చే భిక్ఖూనం సన్తికే దూతం పహిణేయ్య – ‘ఆగచ్ఛన్తు భదన్తా, ఇమం సుత్తన్తం పరియాపుణిస్సన్తి, పురాయం సుత్తన్తో న పలుజ్జతీ’తి. అఞ్ఞతరం వా పనస్స కిచ్చం హోతి – కరణీయం వా, సో చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు భదన్తా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

౧౯౦. ఇధ పన, భిక్ఖవే, ఉపాసికాయ సఙ్ఘం ఉద్దిస్స విహారో కారాపితో హోతి. సా చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు అయ్యా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, ఉపాసికాయ సఙ్ఘం ఉద్దిస్స అడ్ఢయోగో కారాపితో హోతి…పే… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… కప్పియకుటి కారాపితా హోతి… వచ్చకుటి కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి… ఉదపానసాలా కారాపితా హోతి… జన్తాఘరం కారాపితం హోతి… జన్తాఘరసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి. సా చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు అయ్యా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, ఉపాసికాయ సమ్బహులే భిక్ఖూ ఉద్దిస్స…పే… ఏకం భిక్ఖుం ఉద్దిస్స…పే… భిక్ఖునిసఙ్ఘం ఉద్దిస్స…పే… సమ్బహులా భిక్ఖునియో ఉద్దిస్స…పే… ఏకం భిక్ఖునిం ఉద్దిస్స…పే… సమ్బహులా సిక్ఖమానాయో ఉద్దిస్స…పే… ఏకం సిక్ఖమానం ఉద్దిస్స…పే… సమ్బహులే సామణేరే ఉద్దిస్స…పే… ఏకం సామణేరం ఉద్దిస్స…పే… సమ్బహులా సామణేరియో ఉద్దిస్స…పే… ఏకం సామణేరిం ఉద్దిస్స…పే….

౧౯౧. ఇధ పన, భిక్ఖవే, ఉపాసికాయ అత్తనో అత్థాయ నివేసనం కారాపితం హోతి…పే… సయనిఘరం కారాపితం హోతి… ఉదోసితో కారాపితో హోతి… అట్టో కారాపితో హోతి… మాళో కారాపితో హోతి… ఆపణో కారాపితో హోతి… ఆపణసాలా కారాపితా హోతి… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి… కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… రసవతీ కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి … ఉదపానసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి… పుత్తస్స వా వారేయ్యం హోతి… ధీతుయా వా వారేయ్యం హోతి… గిలానా వా హోతి… అభిఞ్ఞాతం వా సుత్తన్తం భణతి. సా చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు అయ్యా, ఇమం సుత్తన్తం పరియాపుణిస్సన్తి, పురాయం సుత్తన్తో పలుజ్జతీ’’తి. అఞ్ఞతరం వా పనస్సా కిచ్చం హోతి కరణీయం వా, సా చే భిక్ఖూనం సన్తికే దూతం పహిణేయ్య – ‘‘ఆగచ్ఛన్తు అయ్యా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

౧౯౨. ఇధ పన, భిక్ఖవే, భిక్ఖునా సఙ్ఘం ఉద్దిస్స…పే… భిక్ఖునియా సఙ్ఘం ఉద్దిస్స… సిక్ఖమానాయ సఙ్ఘం ఉద్దిస్స… సామణేరేన సఙ్ఘం ఉద్దిస్స… సామణేరియా సఙ్ఘం ఉద్దిస్స … సమ్బహులే భిక్ఖూ ఉద్దిస్స… ఏకం భిక్ఖుం ఉద్దిస్స… భిక్ఖునిసఙ్ఘం ఉద్దిస్స… సమ్బహులా భిక్ఖునియో ఉద్దిస్స… ఏకం భిక్ఖునిం ఉద్దిస్స… సమ్బహులా సిక్ఖమానాయో ఉద్దిస్స… ఏకం సిక్ఖమానం ఉద్దిస్స… సమ్బహులే సామణేరే ఉద్దిస్స… ఏకం సామణేరం ఉద్దిస్స… సమ్బహులా సామణేరియో ఉద్దిస్స… ఏకం సామణేరిం ఉద్దిస్స… అత్తనో అత్థాయ విహారో కారాపితో హోతి…పే… అడ్ఢయోగో కారాపితో హోతి… పాసాదో కారాపితో హోతి… హమ్మియం కారాపితం హోతి… గుహా కారాపితా హోతి… పరివేణం కారాపితం హోతి … కోట్ఠకో కారాపితో హోతి… ఉపట్ఠానసాలా కారాపితా హోతి… అగ్గిసాలా కారాపితా హోతి… కప్పియకుటి కారాపితా హోతి… చఙ్కమో కారాపితో హోతి… చఙ్కమనసాలా కారాపితా హోతి… ఉదపానో కారాపితో హోతి… ఉదపానసాలా కారాపితా హోతి… పోక్ఖరణీ కారాపితా హోతి… మణ్డపో కారాపితో హోతి… ఆరామో కారాపితో హోతి… ఆరామవత్థు కారాపితం హోతి. సా చే భిక్ఖూనం సన్తికే దూతం పహిణేయ్య… ‘‘ఆగచ్ఛన్తు అయ్యా, ఇచ్ఛామి దానఞ్చ దాతుం, ధమ్మఞ్చ సోతుం, భిక్ఖూ చ పస్సితు’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బోతి.

సత్తాహకరణీయానుజానతా నిట్ఠితా.

౧౧౦. పఞ్చన్నం అప్పహితేపి అనుజాననా

౧౯౩. తేన ఖో పన సమయేన అఞ్ఞతరో భిక్ఖు గిలానో హోతి. సో భిక్ఖూనం సన్తికే దూతం పాహేసి – ‘‘అహఞ్హి గిలానో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి. భగవతో ఏతమత్థం ఆరోచేసుం. అనుజానామి, భిక్ఖవే, పఞ్చన్నం సత్తాహకరణీయేన అప్పహితేపి గన్తుం, పగేవ పహితే. భిక్ఖుస్స, భిక్ఖునియా, సిక్ఖమానాయ, సామణేరస్స, సామణేరియా – అనుజానామి, భిక్ఖవే, ఇమేసం పఞ్చన్నం సత్తాహకరణీయేన అప్పహితేపి గన్తుం, పగేవ పహితే. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖు గిలానో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి గిలానో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స అనభిరతి ఉప్పన్నా హోతి. సో చే భిక్ఖూనం సన్తికే దూతం పహిణేయ్య – ‘‘అనభిరతి మే ఉప్పన్నా, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘అనభిరతం వూపకాసేస్సామి వా, వూపకాసాపేస్సామి వా, ధమ్మకథం వాస్స కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స కుక్కుచ్చం ఉప్పన్నం హోతి. సో చే భిక్ఖూనం సన్తికే దూతం పహిణేయ్య – ‘‘కుక్కుచ్చం మే ఉప్పన్నం, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కుక్కుచ్చం వినోదేస్సామి వా, వినోదాపేస్సామి వా, ధమ్మకథం వాస్స కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స దిట్ఠిగతం ఉప్పన్నం హోతి. సో చే భిక్ఖూనం సన్తికే దూతం పహిణేయ్య – ‘‘దిట్ఠిగతం మే ఉప్పన్నం, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘దిట్ఠిగతం వివేచేస్సామి వా, వివేచాపేస్సామి వా, ధమ్మకథం వాస్స కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖు గరుధమ్మం అజ్ఝాపన్నో హోతి పరివాసారహో. సో చే భిక్ఖూనం సన్తికే దూతం పహిణేయ్య – ‘‘అహఞ్హి గరుధమ్మం అజ్ఝాపన్నో పరివాసారహో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘పరివాసదానం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖు మూలాయ పటికస్సనారహో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి మూలాయ పటికస్సనారహో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘మూలాయ పటికస్సనం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖు మానత్తారహో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి మానత్తారహో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘మానత్తదానం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖు అబ్భానారహో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి అబ్భానారహో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘అబ్భానం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స సఙ్ఘో కమ్మం కత్తుకామో హోతి తజ్జనీయం వా, నియస్సం వా, పబ్బాజనీయం వా, పటిసారణీయం వా, ఉక్ఖేపనీయం వా. సో చే భిక్ఖూనం సన్తికే దూతం పహిణేయ్య – ‘‘సఙ్ఘో మే కమ్మం కత్తుకామో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కిన్తి ను ఖో సఙ్ఘో కమ్మం న కరేయ్య, లహుకాయ వా పరిణామేయ్యా’’తి. సత్తాహం సన్నివత్తో కాతబ్బో.

కతం వా పనస్స హోతి సఙ్ఘేన కమ్మం తజ్జనీయం వా నియస్సం వా పబ్బాజనీయం వా పటిసారణీయం వా ఉక్ఖేపనీయం వా. సో చే భిక్ఖూనం సన్తికే దూతం పహిణేయ్య ‘‘సఙ్ఘో మే కమ్మం అకాసి, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కిన్తి ను ఖో సమ్మా వత్తేయ్య, లోమం పాతేయ్య, నేత్థారం వత్తేయ్య, సఙ్ఘో తం కమ్మం పటిప్పస్సమ్భేయ్యా’’తి. సత్తాహం సన్నివత్తో కాతబ్బో.

౧౯౪. ఇధ పన, భిక్ఖవే, భిక్ఖునీ గిలానా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి గిలానా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునియా అనభిరతి ఉప్పన్నా హోతి. సా చే భిక్ఖూనం సన్తికే దూతం పహిణేయ్య – ‘‘అనభిరతి మే ఉప్పన్నా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘అనభిరతం వూపకాసేస్సామి వా, వూపకాసాపేస్సామి వా, ధమ్మకథం వాస్సా కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునియా కుక్కుచ్చం ఉప్పన్నం హోతి. సా చే భిక్ఖూనం సన్తికే దూతం పహిణేయ్య – ‘‘కుక్కుచ్చం మే ఉప్పన్నం, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కుక్కుచ్చం వినోదేస్సామి వా, వినోదాపేస్సామి వా, ధమ్మకథం వాస్సా కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునియా దిట్ఠిగతం ఉప్పన్నం హోతి. సా చే భిక్ఖూనం సన్తికే దూతం పహిణేయ్య – ‘‘దిట్ఠిగతం మే ఉప్పన్నం, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘దిట్ఠిగతం వివేచేస్సామి వా, వివేచాపేస్సామి వా, ధమ్మకథం వాస్సా కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునీ గరుధమ్మం అజ్ఝాపన్నా హోతి మానత్తారహా. సా చే భిక్ఖూనం సన్తికే దూతం పహిణేయ్య – ‘‘అహఞ్హి గరుధమ్మం అజ్ఝాపన్నా మానత్తారహా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘మానత్తదానం ఉస్సుక్కం కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునీ మూలాయ పటికస్సనారహా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి మూలాయ పటికస్సనారహా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘మూలాయ పటికస్సనం ఉస్సుక్కం కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునీ అబ్భానారహా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి అబ్భానారహా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘అబ్భానం ఉస్సుక్కం కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖునియా సఙ్ఘో కమ్మం కత్తుకామో హోతి – తజ్జనీయం వా, నియస్సం వా, పబ్బాజనీయం వా, పటిసారణీయం వా, ఉక్ఖేపనీయం వా. సా చే భిక్ఖూనం సన్తికే దూతం పహిణేయ్య – ‘‘సఙ్ఘో మే కమ్మం కత్తుకామో, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కిన్తి ను ఖో సఙ్ఘో కమ్మం న కరేయ్య, లహుకాయ వా పరిణామేయ్యా’’తి. సత్తాహం సన్నివత్తో కాతబ్బో.

కతం వా పనస్సా హోతి సఙ్ఘేన కమ్మం – తజ్జనీయం వా, నియస్సం వా, పబ్బాజనీయం వా, పటిసారణీయం వా, ఉక్ఖేపనీయం వా. సా చే భిక్ఖూనం సన్తికే దూతం పహిణేయ్య – ‘‘సఙ్ఘో మే కమ్మం అకాసి, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘కిన్తి ను ఖో సమ్మా వత్తేయ్య, లోమం పాతేయ్య, నేత్థారం వత్తేయ్య, సఙ్ఘో తం కమ్మం పటిప్పస్సమ్భేయ్యా’’తి. సత్తాహం సన్నివత్తో కాతబ్బో.

౧౯౫. ఇధ పన, భిక్ఖవే, సిక్ఖమానా గిలానా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి గిలానా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి – గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సిక్ఖమానాయ అనభిరతి ఉప్పన్నా హోతి…పే… సిక్ఖమానాయ కుక్కుచ్చం ఉప్పన్నం హోతి… సిక్ఖమానాయ దిట్ఠిగతం ఉప్పన్నం హోతి… సిక్ఖమానాయ సిక్ఖా కుపితా హోతి. సా చే భిక్ఖూనం సన్తికే దూతం పహిణేయ్య – ‘‘సిక్ఖా మే కుపితా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘సిక్ఖాసమాదానం ఉస్సుక్కం కరిస్సామీ’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సిక్ఖమానా ఉపసమ్పజ్జితుకామా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి ఉపసమ్పజ్జితుకామా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ఉపసమ్పదం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీతి. సత్తాహం సన్నివత్తో కాతబ్బో.

౧౯౬. ఇధ పన, భిక్ఖవే, సామణేరో గిలానో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి గిలానో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సామణేరస్స అనభిరతి ఉప్పన్నా హోతి…పే… సామణేరస్స కుక్కుచ్చం ఉప్పన్నం హోతి… సామణేరస్స దిట్ఠిగతం ఉప్పన్నం హోతి… సామణేరో వస్సం పుచ్ఛితుకామో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి వస్సం పుచ్ఛితుకామో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘పుచ్ఛిస్సామి వా, ఆచిక్ఖిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సామణేరో ఉపసమ్పజ్జితుకామో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి ఉపసమ్పజ్జితుకామో, ఆగచ్ఛన్తు భిక్ఖూ, ఇచ్ఛామి భిక్ఖూనం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘ఉపసమ్పదం ఉస్సుక్కం కరిస్సామి వా, అనుస్సావేస్సామి వా, గణపూరకో వా భవిస్సామీ’’తి. సత్తాహం సన్నివత్తో కాతబ్బో.

౧౯౭. ఇధ పన, భిక్ఖవే, సామణేరీ గిలానా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి గిలానా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సామణేరియా అనభిరతి ఉప్పన్నా హోతి…పే… సామణేరియా కుక్కుచ్చం ఉప్పన్నం హోతి… సామణేరియా దిట్ఠిగతం ఉప్పన్నం హోతి… సామణేరీ వస్సం పుచ్ఛితుకామా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి వస్సం పుచ్ఛితుకామా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘పుచ్ఛిస్సామి వా, ఆచిక్ఖిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, సామణేరీ సిక్ఖం సమాదియితుకామా హోతి. సా చే భిక్ఖూనం సన్తికే దూతం పహిణేయ్య – ‘‘అహఞ్హి సిక్ఖం సమాదియితుకామా, ఆగచ్ఛన్తు అయ్యా, ఇచ్ఛామి అయ్యానం ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘సిక్ఖాసమాదానం ఉస్సుక్కం కరిస్సామీ’’తి. సత్తాహం సన్నివత్తో కాతబ్బోతి.

పఞ్చన్నం అప్పహితేపి అనుజాననా నిట్ఠితా.

౧౧౧. సత్తన్నం అప్పహితేపి అనుజాననా

౧౯౮. తేన ఖో పన సమయేన అఞ్ఞతరస్స భిక్ఖునో మాతా గిలానా హోతి. సా పుత్తస్స సన్తికే దూతం పాహేసి – ‘‘అహఞ్హి గిలానా, ఆగచ్ఛతు మే పుత్తో, ఇచ్ఛామి పుత్తస్స ఆగత’’న్తి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం సత్తన్నం సత్తాహకరణీయేన పహితే గన్తుం, న త్వేవ అప్పహితే; పఞ్చన్నం సత్తాహకరణీయేన అప్పహితేపి గన్తుం, పగేవ పహితేతి. అయఞ్చ మే మాతా గిలానా, సా చ అనుపాసికా, కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, సత్తన్నం సత్తాహకరణీయేన అప్పహితేపి గన్తుం, పగేవ పహితే. భిక్ఖుస్స, భిక్ఖునియా, సిక్ఖమానాయ, సామణేరస్స, సామణేరియా, మాతుయా చ పితుస్స చ – అనుజానామి, భిక్ఖవే, ఇమేసం సత్తన్నం సత్తాహకరణీయేన అప్పహితేపి గన్తుం, పగేవ పహితే. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స మాతా గిలానా హోతి. సా చే పుత్తస్స సన్తికే దూతం పహిణేయ్య – ‘‘అహఞ్హి గిలానా, ఆగచ్ఛతు మే పుత్తో, ఇచ్ఛామి పుత్తస్స ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స పితా గిలానో హోతి. సో చే పుత్తస్స సన్తికే దూతం పహిణేయ్య – ‘‘అహఞ్హి గిలానో, ఆగచ్ఛతు మే పుత్తో, ఇచ్ఛామి పుత్తస్స ఆగత’’న్తి, గన్తబ్బం, భిక్ఖవే, సత్తాహకరణీయేన, అప్పహితేపి, పగేవ పహితే – ‘‘గిలానభత్తం వా పరియేసిస్సామి, గిలానుపట్ఠాకభత్తం వా పరియేసిస్సామి, గిలానభేసజ్జం వా పరియేసిస్సామి, పుచ్ఛిస్సామి వా, ఉపట్ఠహిస్సామి వా’’తి. సత్తాహం సన్నివత్తో కాతబ్బో.

సత్తన్నం అప్పహితేపి అనుజాననా నిట్ఠితా.

౧౧౨. పహితేయేవ అనుజాననా

౧౯౯. ఇధ పన, భిక్ఖవే, భిక్ఖుస్స భాతా గిలానో హోతి. సో చే భాతునో సన్తికే దూతం పహిణేయ్య – ‘‘అహఞ్హి గిలానో, ఆగచ్ఛతు మే భాతా, ఇచ్ఛామి భాతునో ఆగత’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స భగినీ గిలానా హోతి. సా చే భాతునో సన్తికే దూతం పహిణేయ్య – ‘‘అహఞ్హి గిలానా, ఆగచ్ఛతు మే భాతా, ఇచ్ఛామి భాతునో ఆగత’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుస్స ఞాతకో గిలానో హోతి. సో చే భిక్ఖుస్స సన్తికే దూతం పహిణేయ్య – ‘‘అహఞ్హి గిలానో, ఆగచ్ఛతు భదన్తో, ఇచ్ఛామి భదన్తస్స ఆగత’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

ఇధ పన, భిక్ఖవే, భిక్ఖుగతికో గిలానో హోతి. సో చే భిక్ఖూనం సన్తికే దూతం పహిణేయ్య – ‘‘అహఞ్హి గిలానో, ఆగచ్ఛన్తు భదన్తా, ఇచ్ఛామి భదన్తానం ఆగత’’న్తి, గన్తబ్బం, భిక్ఖవే, సత్తాహకరణీయేన, పహితే, న త్వేవ అప్పహితే. సత్తాహం సన్నివత్తో కాతబ్బో.

తేన ఖో పన సమయేన సఙ్ఘస్స విహారో ఉన్ద్రియతి. అఞ్ఞతరేన ఉపాసకేన అరఞ్ఞే భణ్డం ఛేదాపితం హోతి. సో భిక్ఖూనం సన్తికే దూతం పాహేసి – ‘‘సచే భదన్తా తం భణ్డం ఆవహాపేయ్యుం, దజ్జాహం తం భణ్డ’’న్తి. భగవతో ఏతమత్థం ఆరోచేసుం. అనుజానామి, భిక్ఖవే, సఙ్ఘకరణీయేన గన్తుం. సత్తాహం సన్నివత్తో కాతబ్బోతి.

పహితేయేవ అనుజాననా నిట్ఠితా.

వస్సావాసభాణవారో నిట్ఠితో.

౧౧౩. అన్తరాయే అనాపత్తివస్సచ్ఛేదవారో

౨౦౦. తేన ఖో పన సమయేన కోసలేసు జనపదే అఞ్ఞతరస్మిం ఆవాసే వస్సూపగతా భిక్ఖూ వాళేహి ఉబ్బాళ్హా హోన్తి. గణ్హింసుపి పరిపాతింసుపి. భగవతో ఏతమత్థం ఆరోచేసుం.

ఇధ పన, భిక్ఖవే, వస్సూపగతా భిక్ఖూ వాళేహి ఉబ్బాళ్హా హోన్తి. గణ్హన్తిపి పరిపాతేన్తిపి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ సరీసపేహి ఉబ్బాళ్హా హోన్తి. డంసన్తిపి పరిపాతేన్తిపి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ చోరేహి ఉబ్బాళ్హా హోన్తి. విలుమ్పన్తిపి ఆకోటేన్తిపి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ పిసాచేహి ఉబ్బాళ్హా హోన్తి. ఆవిసన్తిపి హనన్తిపి [ఓజమ్పి హరన్తి (సీ.), హరన్తిపి (స్యా.)]. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతానం భిక్ఖూనం గామో అగ్గినా దడ్ఢో హోతి. భిక్ఖూ పిణ్డకేన కిలమన్తి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతానం భిక్ఖూనం సేనాసనం అగ్గినా దడ్ఢం హోతి. భిక్ఖూ సేనాసనేన కిలమన్తి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతానం భిక్ఖూనం గామో ఉదకేన వూళ్హో హోతి. భిక్ఖూ పిణ్డకేన కిలమన్తి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతానం భిక్ఖూనం సేనాసనం ఉదకేన వూళ్హం హోతి. భిక్ఖూ సేనాసనేన కిలమన్తి. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్సాతి.

౨౦౧. తేన ఖో పన సమయేన అఞ్ఞతరస్మిం ఆవాసే వస్సూపగతానం భిక్ఖూనం గామో చోరేహి వుట్ఠాసి. భగవతో ఏతమత్థం ఆరోచేసుం. అనుజానామి, భిక్ఖవే, యేన గామో తేన గన్తున్తి.

గామో ద్వేధా భిజ్జిత్థ. భగవతో ఏతమత్థం ఆరోచేసుం. అనుజానామి, భిక్ఖవే, యేన బహుతరా తేన గన్తున్తి.

బహుతరా అస్సద్ధా హోన్తి అప్పసన్నా. భగవతో ఏతమత్థం ఆరోచేసుం. అనుజానామి, భిక్ఖవే, యేన సద్ధా పసన్నా తేన గన్తున్తి.

తేన ఖో పన సమయేన కోసలేసు జనపదే అఞ్ఞతరస్మిం ఆవాసే వస్సూపగతా భిక్ఖూ న లభింసు లూఖస్స వా పణీతస్స వా భోజనస్స యావదత్థం పారిపూరిం. భగవతో ఏతమత్థం ఆరోచేసుం.

ఇధ పన, భిక్ఖవే, వస్సూపగతా భిక్ఖూ న లభన్తి లూఖస్స వా పణీతస్స వా భోజనస్స యావదత్థం పారిపూరిం. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ లభన్తి లూఖస్స వా పణీతస్స వా భోజనస్స యావదత్థం పారిపూరిం, న లభన్తి సప్పాయాని భోజనాని. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ లభన్తి లూఖస్స వా పణీతస్స వా భోజనస్స యావదత్థం పారిపూరిం, లభన్తి సప్పాయాని భోజనాని, న లభన్తి సప్పాయాని భేసజ్జాని. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతా భిక్ఖూ లభన్తి లూఖస్స వా పణీతస్స వా భోజనస్స యావదత్థం పారిపూరిం, లభన్తి సప్పాయాని భోజనాని, లభన్తి సప్పాయాని భేసజ్జాని, న లభన్తి పతిరూపం ఉపట్ఠాకం. ఏసేవ అన్తరాయోతి పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతం భిక్ఖుం ఇత్థీ నిమన్తేతి – ‘‘ఏహి, భన్తే, హిరఞ్ఞం వా తే దేమి, సువణ్ణం వా తే దేమి, ఖేత్తం వా తే దేమి, వత్థుం వా తే దేమి, గావుం వా తే దేమి, గావిం వా తే దేమి, దాసం వా తే దేమి, దాసిం వా తే దేమి, ధీతరం వా తే దేమి భరియత్థాయ, అహం వా తే భరియా హోమి, అఞ్ఞం వా తే భరియం ఆనేమీ’’తి. తత్ర చే భిక్ఖునో ఏవం హోతి, ‘లహుపరివత్తం ఖో చిత్తం వుత్తం భగవతా, సియాపి మే బ్రహ్మచరియస్స అన్తరాయో’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతం భిక్ఖుం వేసీ నిమన్తేతి…పే… థుల్లకుమారీ నిమన్తేతి… పణ్డకో నిమన్తేతి… ఞాతకా నిమన్తేన్తి… రాజానో నిమన్తేన్తి… చోరా నిమన్తేన్తి… ధుత్తా నిమన్తేన్తి – ‘‘ఏహి, భన్తే, హిరఞ్ఞం వా తే దేమ, సువణ్ణం వా తే దేమ, ఖేత్తం వా తే దేమ, వత్థుం వా తే దేమ, గావుం వా తే దేమ, గావిం వా తే దేమ, దాసం వా తే దేమ, దాసిం వా తే దేమ, ధీతరం వా తే దేమ భరియత్థాయ, అఞ్ఞం వా తే భరియం ఆనేమా’’తి. తత్ర చే భిక్ఖునో ఏవం హోతి, ‘లహుపరివత్తం ఖో చిత్తం వుత్తం భగవతా, సియాపి మే బ్రహ్మచరియస్స అన్తరాయో’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు అస్సామికం నిధిం పస్సతి. తత్ర చే భిక్ఖునో ఏవం హోతి, ‘లహుపరివత్తం ఖో చిత్తం వుత్తం భగవతా, సియాపి మే బ్రహ్మచరియస్స అన్తరాయో’తి, పక్కమితబ్బం. అనాపత్తి వస్సచ్ఛేదస్స.

అన్తరాయే అనాపత్తివస్సచ్ఛేదవారో నిట్ఠితో.

౧౧౪. సఙ్ఘభేదే అనాపత్తివస్సచ్ఛేదవారో

౨౦౨. ఇధ పన, భిక్ఖవే, వస్సూపగతో భిక్ఖు పస్సతి సమ్బహులే భిక్ఖూ సఙ్ఘభేదాయ పరక్కమన్తే. తత్ర చే భిక్ఖునో ఏవం హోతి, ‘గరుకో ఖో సఙ్ఘభేదో వుత్తో భగవతా; మా మయి సమ్ముఖీభూతే సఙ్ఘో భిజ్జీ’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అసుకస్మిం కిర ఆవాసే సమ్బహులా భిక్ఖూ సఙ్ఘభేదాయ పరక్కమన్తీ’’తి. తత్ర చే భిక్ఖునో ఏవం హోతి, ‘గరుకో ఖో సఙ్ఘభేదో వుత్తో భగవతా; మా మయి సమ్ముఖీభూతే సఙ్ఘో భిజ్జీ’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అసుకస్మిం కిర ఆవాసే సమ్బహులా భిక్ఖూ సఙ్ఘభేదాయ పరక్కమన్తీ’’తి. తత్ర చే భిక్ఖునో ఏవం హోతి – ‘‘తే ఖో మే భిక్ఖూ మిత్తా. త్యాహం వక్ఖామి ‘గరుకో ఖో, ఆవుసో, సఙ్ఘభేదో వుత్తో భగవతా; మాయస్మన్తానం సఙ్ఘభేదో రుచ్చిత్థా’తి. కరిస్సన్తి మే వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అసుకస్మిం కిర ఆవాసే సమ్బహులా భిక్ఖూ సఙ్ఘభేదాయ పరక్కమన్తీ’’తి. తత్ర చే భిక్ఖునో ఏవం హోతి – ‘‘తే ఖో మే భిక్ఖూ న మిత్తా; అపి చ యే తేసం మిత్తా, తే మే మిత్తా. త్యాహం వక్ఖామి. తే వుత్తా తే వక్ఖన్తి ‘గరుకో ఖో, ఆవుసో, సఙ్ఘభేదో వుత్తో భగవతా; మాయస్మన్తానం సఙ్ఘభేదో రుచ్చిత్థా’తి. కరిస్సన్తి తేసం వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అసుకస్మిం కిర ఆవాసే సమ్బహులేహి భిక్ఖూహి సఙ్ఘో భిన్నో’’తి. తత్ర చే భిక్ఖునో ఏవం హోతి – ‘‘తే ఖో మే భిక్ఖూ మిత్తా. త్యాహం వక్ఖామి ‘గరుకో ఖో, ఆవుసో, సఙ్ఘభేదో వుత్తో భగవతా; మాయస్మన్తానం సఙ్ఘభేదో రుచ్చిత్థా’తి. కరిస్సన్తి మే వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అసుకస్మిం కిర ఆవాసే సమ్బహులేహి భిక్ఖూహి సఙ్ఘో భిన్నో’’తి. తత్ర చే భిక్ఖునో ఏవం హోతి – ‘‘తే ఖో మే భిక్ఖూ న మిత్తా; అపి చ, యే తేసం మిత్తా తే మే మిత్తా. త్యాహం వక్ఖామి. తే వుత్తా తే వక్ఖన్తి ‘గరుకో ఖో, ఆవుసో, సఙ్ఘభేదో వుత్తో భగవతా; మాయస్మన్తానం సఙ్ఘభేదో రుచ్చిత్థా’తి. కరిస్సన్తి తేసం వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అముకస్మిం కిర ఆవాసే సమ్బహులా భిక్ఖునియో సఙ్ఘభేదాయ పరక్కమన్తీ’’తి. తత్ర చే భిక్ఖునో ఏవం హోతి – ‘‘తా ఖో మే భిక్ఖునియో మిత్తా. తాహం వక్ఖామి ‘గరుకో ఖో, భగినియో, సఙ్ఘభేదో వుత్తో భగవతా; మా భగినీనం సఙ్ఘభేదో రుచ్చిత్థా’తి. కరిస్సన్తి మే వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్స.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అముకస్మిం కిర ఆవాసే సమ్బహులా భిక్ఖునియో సఙ్ఘభేదాయ పరక్కమన్తీ’’తి. తత్ర చే భిక్ఖునో ఏవం హోతి – ‘‘తా ఖో మే భిక్ఖునియో న మిత్తా. అపి చ, యా తాసం మిత్తా, తా మే మిత్తా. తాహం వక్ఖామి. తా వుత్తా తా వక్ఖన్తి ‘గరుకో ఖో, భగినియో, సఙ్ఘభేదో వుత్తో భగవతా. మా భగినీనం సఙ్ఘభేదో రుచ్చిత్థా’తి. కరిస్సన్తి తాసం వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్సతి.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అముకస్మిం కిర ఆవాసే సమ్బహులాహి భిక్ఖునీహి సఙ్ఘో భిన్నో’’తి. తత్ర చే భిక్ఖునో ఏవం హోతి – ‘‘తా ఖో మే భిక్ఖునియో మిత్తా. తాహం వక్ఖామి ‘గరుకో ఖో, భగినియో, సఙ్ఘభేదో వుత్తో భగవతా. మా భగినీనం సఙ్ఘభేదో రుచ్చిత్థా’తి. కరిస్సన్తి మే వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్సతి.

ఇధ పన, భిక్ఖవే, వస్సూపగతో భిక్ఖు సుణాతి – ‘‘అముకస్మిం కిర ఆవాసే సమ్బహులాహి భిక్ఖునీహి సఙ్ఘో భిన్నో’’తి. తత్ర చే భిక్ఖునో ఏవం హోతి – ‘‘తా ఖో మే భిక్ఖునియో న మిత్తా. అపి చ, యా తాసం మిత్తా తా మే మిత్తా. తాహం వక్ఖామి. తా వుత్తా తా వక్ఖన్తి ‘గరుకో ఖో, భగినియో [అయ్యాయో (సీ.)], సఙ్ఘభేదో వుత్తో భగవతా; మా భగినీనం [అయ్యానం (సీ.)] సఙ్ఘభేదో రుచ్చిత్థా’తి. కరిస్సన్తి తాసం వచనం, సుస్సూసిస్సన్తి, సోతం ఓదహిస్సన్తీ’’తి, పక్కమితబ్బం. అనాపత్తి వస్సచ్ఛేదస్సాతి.

సఙ్ఘభేదే అనాపత్తివస్సచ్ఛేదవారో నిట్ఠితో.

౧౧౫. వజాదీసు వస్సూపగమనం

౨౦౩. తేన ఖో పన సమయేన అఞ్ఞతరో భిక్ఖు వజే వస్సం ఉపగన్తుకామో హోతి. భగవతో ఏతమత్థం ఆరోచేసుం. అనుజానామి, భిక్ఖవే, వజే వస్సం ఉపగన్తున్తి. వజో వుట్ఠాసి. భగవతో ఏతమత్థం ఆరోచేసుం. అనుజానామి, భిక్ఖవే, యేన వజో తేన గన్తున్తి.

తేన ఖో పన సమయేన అఞ్ఞతరో భిక్ఖు ఉపకట్ఠాయ వస్సూపనాయికాయ సత్థేన గన్తుకామో హోతి. భగవతో ఏతమత్థం ఆరోచేసుం. అనుజానామి, భిక్ఖవే, సత్థే వస్సం ఉపగన్తున్తి.

తేన ఖో పన సమయేన అఞ్ఞతరో భిక్ఖు ఉపకట్ఠాయ వస్సూపనాయికాయ నావాయ గన్తుకామో హోతి. భగవతో ఏతమత్థం ఆరోచేసుం. అనుజానామి, భిక్ఖవే, నావాయ వస్సం ఉపగన్తున్తి.

వజాదీసు వస్సూపగమనం నిట్ఠితం.

౧౧౬. వస్సం అనుపగన్తబ్బట్ఠానాని

౨౦౪. తేన ఖో పన సమయేన భిక్ఖూ రుక్ఖసుసిరే వస్సం ఉపగచ్ఛన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి పిసాచిల్లికా’’తి. భగవతో ఏతమత్థం ఆరోచేసుం. న, భిక్ఖవే, రుక్ఖసుసిరే వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ రుక్ఖవిటభియా వస్సం ఉపగచ్ఛన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి మిగలుద్దకా’’తి. భగవతో ఏతమత్థం ఆరోచేసుం. న, భిక్ఖవే, రుక్ఖవిటభియా వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ అజ్ఝోకాసే వస్సం ఉపగచ్ఛన్తి. దేవే వస్సన్తే రుక్ఖమూలమ్పి నిబ్బకోసమ్పి ఉపధావన్తి. భగవతో ఏతమత్థం ఆరోచేసుం. న, భిక్ఖవే, అజ్ఝోకాసే వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ అసేనాసనికా వస్సం ఉపగచ్ఛన్తి. సీతేనపి కిలమన్తి, ఉణ్హేనపి కిలమన్తి. భగవతో ఏతమత్థం ఆరోచేసుం. న, భిక్ఖవే, అసేనాసనికేన వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ ఛవకుటికాయ వస్సం ఉపగచ్ఛన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి ఛవడాహకా’’తి. భగవతో ఏతమత్థం ఆరోచేసుం. న, భిక్ఖవే, ఛవకుటికాయ వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ ఛత్తే వస్సం ఉపగచ్ఛన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి గోపాలకా’’తి. భగవతో ఏతమత్థం ఆరోచేసుం. న, భిక్ఖవే, ఛత్తే వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

తేన ఖో పన సమయేన భిక్ఖూ చాటియా వస్సం ఉపగచ్ఛన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘సేయ్యథాపి తిత్థియా’’తి. భగవతో ఏతమత్థం ఆరోచేసుం. న, భిక్ఖవే, చాటియా వస్సం ఉపగన్తబ్బం. యో ఉపగచ్ఛేయ్య, ఆపత్తి దుక్కటస్సాతి.

వస్సం అనుపగన్తబ్బట్ఠానాని నిట్ఠితా.

౧౧౭. అధమ్మికకతికా

౨౦౫. తేన ఖో పన సమయేన సావత్థియా సఙ్ఘేన ఏవరూపా కతికా కతా హోతి – అన్తరావస్సం న పబ్బాజేతబ్బన్తి. విసాఖాయ మిగారమాతుయా నత్తా భిక్ఖూ ఉపసఙ్కమిత్వా పబ్బజ్జం యాచి. భిక్ఖూ ఏవమాహంసు – ‘‘సఙ్ఘేన ఖో, ఆవుసో, ఏవరూపా కతికా కతా ‘అన్తరావస్సం న పబ్బాజేతబ్బ’న్తి. ఆగమేహి, ఆవుసో, యావ భిక్ఖూ వస్సం వసన్తి. వస్సంవుట్ఠా పబ్బాజేస్సన్తీ’’తి. అథ ఖో తే భిక్ఖూ వస్సంవుట్ఠా విసాఖాయ మిగారమాతుయా నత్తారం ఏతదవోచుం – ‘‘ఏహి, దాని, ఆవుసో, పబ్బజాహీ’’తి. సో ఏవమాహ – ‘‘సచాహం, భన్తే, పబ్బజితో అస్సం, అభిరమేయ్యామహం [అభిరమేయ్యం చాహం (సీ.)]. న దానాహం, భన్తే, పబ్బజిస్సామీ’’తి. విసాఖా మిగారమాతా ఉజ్ఝాయతి ఖియ్యతి విపాచేతి – ‘‘కథఞ్హి నామ అయ్యా ఏవరూపం కతికం కరిస్సన్తి ‘న అన్తరావస్సం పబ్బాజేతబ్బ’న్తి. కం కాలం ధమ్మో న చరితబ్బో’’తి? అస్సోసుం ఖో భిక్ఖూ విసాఖాయ మిగారమాతుయా ఉజ్ఝాయన్తియా ఖియ్యన్తియా విపాచేన్తియా. అథ ఖో తే భిక్ఖూ భగవతో ఏతమత్థం ఆరోచేసుం. న, భిక్ఖవే, ఏవరూపా కతికా కాతబ్బా – ‘న అన్తరావస్సం పబ్బాజేతబ్బ’న్తి. యో కరేయ్య, ఆపత్తి దుక్కటస్సాతి.

అధమ్మికకతికా నిట్ఠితా.

౧౧౮. పటిస్సవదుక్కటాపత్తి

౨౦౬. తేన ఖో పన సమయేన ఆయస్మతా ఉపనన్దేన సక్యపుత్తేన రఞ్ఞో పసేనదిస్స కోసలస్స వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో అద్దస అన్తరామగ్గే ద్వే ఆవాసే బహుచీవరకే. తస్స ఏతదహోసి – ‘‘యంనూనాహం ఇమేసు ద్వీసు ఆవాసేసు వస్సం వసేయ్యం. ఏవం మే బహుం చీవరం [బహుచీవరం (క.)] ఉప్పజ్జిస్సతీ’’తి. సో తేసు ద్వీసు ఆవాసేసు వస్సం వసి. రాజా పసేనది కోసలో ఉజ్ఝాయతి ఖియ్యతి విపాచేతి – ‘‘కథఞ్హి నామ అయ్యో ఉపనన్దో సక్యపుత్తో అమ్హాకం వస్సావాసం పటిస్సుణిత్వా విసంవాదేస్సతి. నను భగవతా అనేకపరియాయేన ముసావాదో గరహితో, ముసావాదా వేరమణీ పసత్థా’’తి. అస్సోసుం ఖో భిక్ఖూ రఞ్ఞో పసేనదిస్స కోసలస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో రఞ్ఞో పసేనదిస్స కోసలస్స వస్సావాసం పటిస్సుణిత్వా విసంవాదేస్సతి. నను భగవతా అనేకపరియాయేన ముసావాదో గరహితో, ముసావాదా వేరమణీ పసత్థా’’తి. అథ ఖో తే భిక్ఖూ భగవతో ఏతమత్థం ఆరోచేసుం…పే… అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఆయస్మన్తం ఉపనన్దం సక్యపుత్తం పటిపుచ్ఛి – ‘‘సచ్చం కిర త్వం, ఉపనన్ద, రఞ్ఞో పసేనదిస్స కోసలస్స వస్సావాసం పటిస్సుణిత్వా విసంవాదేసీ’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, రఞ్ఞో పసేనదిస్స కోసలస్స వస్సావాసం పటిస్సుణిత్వా విసంవాదేస్ససి. నను మయా, మోఘపురిస, అనేకపరియాయేన ముసావాదో గరహితో, ముసావాదా వేరమణీ పసత్థా. నేతం, మోఘపురిస, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి –

౨౦౭. ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో పస్సతి అన్తరామగ్గే ద్వే ఆవాసే బహుచీవరకే. తస్స ఏవం హోతి – ‘‘యంనూనాహం ఇమేసు ద్వీసు ఆవాసేసు వస్సం వసేయ్యం. ఏవం మే బహుం చీవరం ఉప్పజ్జిస్సతీ’’తి. సో తేసు ద్వీసు ఆవాసేసు వస్సం వసతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే [పాటిపదేన (క.)] విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ అకరణీయో పక్కమతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ సకరణీయో పక్కమతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా అకరణీయో పక్కమతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సకరణీయో పక్కమతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం బహిద్ధా వీతినామేతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం అన్తో సన్నివత్తం కరోతి. తస్స, భిక్ఖవే, భిక్ఖునో పురిమికా చ పఞ్ఞాయతి, పటిస్సవే చ అనాపత్తి.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో సత్తాహం అనాగతాయ పవారణాయ సకరణీయో పక్కమతి. ఆగచ్ఛేయ్య వా సో, భిక్ఖవే, భిక్ఖు తం ఆవాసం న వా ఆగచ్ఛేయ్య, తస్స, భిక్ఖవే, భిక్ఖునో పురిమికా చ పఞ్ఞాయతి, పటిస్సవే చ అనాపత్తి.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పురిమికాయ. సో తం ఆవాసం గన్త్వా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ సకరణీయో పక్కమతి…పే… సో ద్వీహతీహం వసిత్వా అకరణీయో పక్కమతి…పే… సో ద్వీహతీహం వసిత్వా సకరణీయో పక్కమతి…పే… సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం బహిద్ధా వీతినామేతి. తస్స, భిక్ఖవే, భిక్ఖునో పురిమికా చ న పఞ్ఞాయతి, పటిస్సవే చ ఆపత్తి దుక్కటస్స…పే… సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం అన్తో సన్నివత్తం కరోతి. తస్స, భిక్ఖవే, భిక్ఖునో పురిమికా చ పఞ్ఞాయతి, పటిస్సవే చ అనాపత్తి…పే… సో సత్తాహం అనాగతాయ పవారణాయ సకరణీయో పక్కమతి. ఆగచ్ఛేయ్య వా సో, భిక్ఖవే, భిక్ఖు తం ఆవాసం న వా ఆగచ్ఛేయ్య, తస్స, భిక్ఖవే, భిక్ఖునో పురిమికా చ పఞ్ఞాయతి, పటిస్సవే చ అనాపత్తి.

౨౦౮. ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ అకరణీయో పక్కమతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ సకరణీయో పక్కమతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా అకరణీయో పక్కమతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సకరణీయో పక్కమతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం బహిద్ధా వీతినామేతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం అన్తో సన్నివత్తం కరోతి. తస్స, భిక్ఖవే, భిక్ఖునో పచ్ఛిమికా చ పఞ్ఞాయతి, పటిస్సవే చ అనాపత్తి.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గచ్ఛన్తో బహిద్ధా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో సత్తాహం అనాగతాయ కోముదియా చాతుమాసినియా సకరణీయో పక్కమతి. ఆగచ్ఛేయ్య వా సో, భిక్ఖవే, భిక్ఖు తం ఆవాసం న వా ఆగచ్ఛేయ్య, తస్స, భిక్ఖవే, భిక్ఖునో పచ్ఛిమికా చ పఞ్ఞాయతి, పటిస్సవే చ అనాపత్తి.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గన్త్వా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో తదహేవ సకరణీయో పక్కమతి…పే… సో ద్వీహతీహం వసిత్వా అకరణీయో పక్కమతి …పే… సో ద్వీహతీహం వసిత్వా సకరణీయో పక్కమతి…పే… సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం బహిద్ధా వీతినామేతి. తస్స, భిక్ఖవే, భిక్ఖునో పచ్ఛిమికా చ న పఞ్ఞాయతి, పటిస్సవే చ ఆపత్తి దుక్కటస్స…పే… సో ద్వీహతీహం వసిత్వా సత్తాహకరణీయేన పక్కమతి. సో తం సత్తాహం అన్తో సన్నివత్తం కరోతి. తస్స భిక్ఖవే, భిక్ఖునో పచ్ఛిమికా చ పఞ్ఞాయతి, పటిస్సవే చ అనాపత్తి.

ఇధ పన, భిక్ఖవే, భిక్ఖునా వస్సావాసో పటిస్సుతో హోతి పచ్ఛిమికాయ. సో తం ఆవాసం గన్త్వా ఉపోసథం కరోతి, పాటిపదే విహారం ఉపేతి, సేనాసనం పఞ్ఞపేతి, పానీయం పరిభోజనీయం ఉపట్ఠాపేతి, పరివేణం సమ్మజ్జతి. సో సత్తాహం అనాగతాయ కోముదియా చాతుమాసినియా సకరణీయో పక్కమతి. ఆగచ్ఛేయ్య వా సో, భిక్ఖవే, భిక్ఖు తం ఆవాసం న వా ఆగచ్ఛేయ్య, తస్స, భిక్ఖవే, భిక్ఖునో పచ్ఛిమికా చ పఞ్ఞాయతి, పటిస్సవే చ అనాపత్తీతి.

పటిస్సవదుక్కటాపత్తి నిట్ఠితా.

వస్సూపనాయికక్ఖన్ధకో తతియో.

౧౧౯. తస్సుద్దానం

ఉపగన్తుం కదా చేవ, కతి అన్తరావస్స చ;

న ఇచ్ఛన్తి చ సఞ్చిచ్చ, ఉక్కడ్ఢితుం ఉపాసకో.

గిలానో మాతా చ పితా, భాతా చ అథ ఞాతకో;

భిక్ఖుగతికో విహారో, వాళా చాపి సరీసపా.