౯. పబ్బజ్జూపసమ్పదాకథా

౩౪. తేన ఖో పన సమయేన భిక్ఖూ నానాదిసా నానాజనపదా పబ్బజ్జాపేక్ఖే చ ఉపసమ్పదాపేక్ఖే చ ఆనేన్తి – భగవా నే పబ్బాజేస్సతి ఉపసమ్పాదేస్సతీతి. తత్థ భిక్ఖూ చేవ కిలమన్తి పబ్బజ్జాపేక్ఖా చ ఉపసమ్పదాపేక్ఖా చ. అథ ఖో భగవతో రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘ఏతరహి ఖో భిక్ఖూ నానాదిసా నానాజనపదా పబ్బజ్జాపేక్ఖే చ ఉపసమ్పదాపేక్ఖే చ ఆనేన్తి – భగవా నే పబ్బాజేస్సతి ఉపసమ్పాదేస్సతీతి. తత్థ భిక్ఖూ చేవ కిలమన్తి పబ్బజ్జాపేక్ఖా చ ఉపసమ్పదాపేక్ఖా చ. యంనూనాహం భిక్ఖూనం అనుజానేయ్యం – తుమ్హేవ దాని, భిక్ఖవే, తాసు తాసు దిసాసు తేసు తేసు జనపదేసు పబ్బాజేథ ఉపసమ్పాదేథా’’తి. అథ ఖో భగవా సాయన్హసమయం పటిసల్లానా వుట్ఠితో ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘ఇధ మయ్హం, భిక్ఖవే, రహోగతస్స పటిసల్లీనస్స ఏవం చేతసో పరివితక్కో ఉదపాది – ‘ఏతరహి ఖో భిక్ఖూ నానాదిసా నానాజనపదా పబ్బజ్జాపేక్ఖే చ ఉపసమ్పదాపేక్ఖే చ ఆనేన్తి భగవా నే పబ్బాజేస్సతి ఉపసమ్పాదేస్సతీతి, తత్థ భిక్ఖూ చేవ కిలమన్తి పబ్బజ్జాపేక్ఖా చ ఉపసమ్పదాపేక్ఖా చ, యంనూనాహం భిక్ఖూనం అనుజానేయ్యం తుమ్హేవ దాని, భిక్ఖవే, తాసు తాసు దిసాసు తేసు తేసు జనపదేసు పబ్బాజేథ ఉపసమ్పాదేథా’’’తి, అనుజానామి, భిక్ఖవే, తుమ్హేవ దాని తాసు తాసు దిసాసు తేసు తేసు జనపదేసు పబ్బాజేథ ఉపసమ్పాదేథ. ఏవఞ్చ పన, భిక్ఖవే, పబ్బాజేతబ్బో ఉపసమ్పాదేతబ్బో –

పఠమం కేసమస్సుం ఓహారాపేత్వా [ఓహారేత్వా (క.)], కాసాయాని వత్థాని అచ్ఛాదాపేత్వా, ఏకంసం ఉత్తరాసఙ్గం కారాపేత్వా, భిక్ఖూనం పాదే వన్దాపేత్వా, ఉక్కుటికం నిసీదాపేత్వా, అఞ్జలిం పగ్గణ్హాపేత్వా, ఏవం వదేహీతి వత్తబ్బో – బుద్ధం సరణం గచ్ఛామి, ధమ్మం సరణం గచ్ఛామి, సఙ్ఘం సరణం గచ్ఛామి; దుతియమ్పి బుద్ధం సరణం గచ్ఛామి, దుతియమ్పి ధమ్మం సరణం గచ్ఛామి, దుతియమ్పి సఙ్ఘం సరణం గచ్ఛామి; తతియమ్పి బుద్ధం సరణం గచ్ఛామి, తతియమ్పి ధమ్మం సరణం గచ్ఛామి, తతియమ్పి సఙ్ఘం సరణం గచ్ఛామీ’’తి. ‘‘అనుజానామి, భిక్ఖవే, ఇమేహి తీహి సరణగమనేహి పబ్బజ్జం ఉపసమ్పద’’న్తి.

తీహి సరణగమనేహి ఉపసమ్పదాకథా నిట్ఠితా.