౪౯. తిరచ్ఛానగతవత్థు

౧౧౧. తేన ఖో పన సమయేన అఞ్ఞతరో నాగో నాగయోనియా అట్టీయతి హరాయతి జిగుచ్ఛతి. అథ ఖో తస్స నాగస్స ఏతదహోసి – ‘‘కేన ను ఖో అహం ఉపాయేన నాగయోనియా చ పరిముచ్చేయ్యం ఖిప్పఞ్చ మనుస్సత్తం పటిలభేయ్య’’న్తి. అథ ఖో తస్స నాగస్స ఏతదహోసి – ‘‘ఇమే ఖో సమణా సక్యపుత్తియా ధమ్మచారినో సమచారినో బ్రహ్మచారినో సచ్చవాదినో సీలవన్తో కల్యాణధమ్మా. సచే ఖో అహం సమణేసు సక్యపుత్తియేసు పబ్బజేయ్యం, ఏవాహం నాగయోనియా చ పరిముచ్చేయ్యం, ఖిప్పఞ్చ మనుస్సత్తం పటిలభేయ్య’’న్తి. అథ ఖో సో నాగో మాణవకవణ్ణేన భిక్ఖూ ఉపసఙ్కమిత్వా పబ్బజ్జం యాచి. తం భిక్ఖూ పబ్బాజేసుం, ఉపసమ్పాదేసుం. తేన ఖో పన సమయేన సో నాగో అఞ్ఞతరేన భిక్ఖునా సద్ధిం పచ్చన్తిమే విహారే పటివసతి. అథ ఖో సో భిక్ఖు రత్తియా పచ్చూససమయం పచ్చుట్ఠాయ అజ్ఝోకాసే చఙ్కమతి. అథ ఖో సో నాగో తస్స భిక్ఖునో నిక్ఖన్తే విస్సట్ఠో నిద్దం ఓక్కమి. సబ్బో విహారో అహినా పుణ్ణో, వాతపానేహి భోగా నిక్ఖన్తా హోన్తి. అథ ఖో సో భిక్ఖు విహారం పవిసిస్సామీతి కవాటం పణామేన్తో అద్దస సబ్బం విహారం అహినా పుణ్ణం, వాతపానేహి భోగే నిక్ఖన్తే, దిస్వాన భీతో విస్సరమకాసి. భిక్ఖూ ఉపధావిత్వా తం భిక్ఖుం ఏతదవోచుం – ‘‘కిస్స త్వం, ఆవుసో, విస్సరమకాసీ’’తి? ‘‘అయం, ఆవుసో, సబ్బో విహారో అహినా పుణ్ణో, వాతపానేహి భోగా నిక్ఖన్తా’’తి. అథ ఖో సో నాగో తేన సద్దేన పటిబుజ్ఝిత్వా సకే ఆసనే నిసీది. భిక్ఖూ ఏవమాహంసు – ‘‘కోసి త్వం, ఆవుసో’’తి? ‘‘అహం, భన్తే, నాగో’’తి. ‘‘కిస్స పన త్వం, ఆవుసో, ఏవరూపం అకాసీ’’తి? అథ ఖో సో నాగో భిక్ఖూనం ఏతమత్థం ఆరోచేసి. భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా తం నాగం ఏతదవోచ – ‘‘తుమ్హే ఖోత్థ నాగా అవిరుళ్హిధమ్మా ఇమస్మిం ధమ్మవినయే. గచ్ఛ త్వం, నాగ, తత్థేవ చాతుద్దసే పన్నరసే అట్ఠమియా చ పక్ఖస్స ఉపోసథం ఉపవస, ఏవం త్వం నాగయోనియా చ పరిముచ్చిస్ససి, ఖిప్పఞ్చ మనుస్సత్తం పటిలభిస్ససీ’’తి. అథ ఖో సో నాగో అవిరుళ్హిధమ్మో కిరాహం ఇమస్మిం ధమ్మవినయేతి దుక్ఖీ దుమ్మనో అస్సూని పవత్తయమానో విస్సరం కత్వా పక్కామి. అథ ఖో భగవా భిక్ఖూ ఆమన్తేసి – ‘‘ద్వేమే, భిక్ఖవే, పచ్చయా నాగస్స సభావపాతుకమ్మాయ. యదా చ సజాతియా మేథునం ధమ్మం పటిసేవతి, యదా చ విస్సట్ఠో నిద్దం ఓక్కమతి – ఇమే ఖో, భిక్ఖవే, ద్వే పచ్చయా నాగస్స సభావపాతుకమ్మాయ. తిరచ్ఛానగతో, భిక్ఖవే, అనుపసమ్పన్నో న ఉపసమ్పాదేతబ్బో, ఉపసమ్పన్నో నాసేతబ్బో’’తి.