౪౩. దణ్డకమ్మవత్థు

౧౦౭. తేన ఖో పన సమయేన సామణేరా భిక్ఖూసు అగారవా అప్పతిస్సా అసభాగవుత్తికా విహరన్తి. భిక్ఖూ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సామణేరా భిక్ఖూసు అగారవా అప్పతిస్సా అసభాగవుత్తికా విహరిస్సన్తీ’’తి. భగవతో ఏతమత్థం ఆరోచేసుం…పే… అనుజానామి, భిక్ఖవే, పఞ్చహఙ్గేహి సమన్నాగతస్స సామణేరస్స దణ్డకమ్మం కాతుం. భిక్ఖూనం అలాభాయ పరిసక్కతి, భిక్ఖూనం అనత్థాయ పరిసక్కతి, భిక్ఖూనం అవాసాయ పరిసక్కతి, భిక్ఖూ అక్కోసతి పరిభాసతి, భిక్ఖూ భిక్ఖూహి భేదేతి – అనుజానామి, భిక్ఖవే, ఇమేహి పఞ్చహఙ్గేహి సమన్నాగతస్స సామణేరస్స దణ్డకమ్మం కాతున్తి.

అథ ఖో భిక్ఖూనం ఏతదహోసి – ‘‘కిం ను ఖో దణ్డకమ్మం కాతబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, ఆవరణం కాతున్తి.

తేన ఖో పన సమయేన భిక్ఖూ సామణేరానం సబ్బం సఙ్ఘారామం ఆవరణం కరోన్తి. సామణేరా ఆరామం పవిసితుం అలభమానా పక్కమన్తిపి, విబ్భమన్తిపి, తిత్థియేసుపి సఙ్కమన్తి. భగవతో ఏతమత్థం ఆరోచేసుం. న, భిక్ఖవే, సబ్బో సఙ్ఘారామో ఆవరణం కాతబ్బో. యో కరేయ్య, ఆపత్తి దుక్కటస్స. అనుజానామి, భిక్ఖవే, యత్థ వా వసతి, యత్థ వా పటిక్కమతి, తత్థ ఆవరణం కాతున్తి.

తేన ఖో పన సమయేన భిక్ఖూ సామణేరానం ముఖద్వారికం ఆహారం ఆవరణం కరోన్తి. మనుస్సా యాగుపానమ్పి సఙ్ఘభత్తమ్పి కరోన్తా సామణేరే ఏవం వదేన్తి – ‘‘ఏథ, భన్తే, యాగుం పివథ; ఏథ, భన్తే, భత్తం భుఞ్జథా’’తి. సామణేరా ఏవం వదేన్తి – ‘‘నావుసో, లబ్భా. భిక్ఖూహి ఆవరణం కత’’న్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భదన్తా సామణేరానం ముఖద్వారికం ఆహారం ఆవరణం కరిస్సన్తీ’’తి. భగవతో ఏతమత్థం ఆరోచేసుం. న, భిక్ఖవే, ముఖద్వారికో ఆహారో ఆవరణం కాతబ్బో. యో కరేయ్య, ఆపత్తి దుక్కటస్సాతి.

దణ్డకమ్మవత్థు నిట్ఠితం.