౩౯. ఆహున్దరికవత్థు

౧౦౨. తేన ఖో పన సమయేన భగవా తత్థేవ రాజగహే వస్సం వసి, తత్థ హేమన్తం, తత్థ గిమ్హం. మనుస్సా ఉజ్ఝాయన్తి ఖియ్యన్తి విపాచేన్తి – ‘‘ఆహున్దరికా సమణానం సక్యపుత్తియానం దిసా అన్ధకారా, న ఇమేసం దిసా పక్ఖాయన్తీ’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఆయస్మన్తం ఆనన్దం ఆమన్తేసి – ‘‘గచ్ఛానన్ద, అవాపురణం [అపాపురణం (క.)] ఆదాయ అనుపరివేణియం భిక్ఖూనం ఆరోచేహి – ‘‘ఇచ్ఛతావుసో భగవా దక్ఖిణాగిరిం చారికం పక్కమితుం. యస్సాయస్మతో అత్థో, సో ఆగచ్ఛతూ’’తి. ఏవం, భన్తే, తి ఖో ఆయస్మా ఆనన్దో భగవతో పటిస్సుణిత్వా అవాపురణం ఆదాయ అనుపరివేణియం భిక్ఖూనం ఆరోచేసి – ‘ఇచ్ఛతావుసో భగవా దక్ఖిణాగిరిం చారికం పక్కమితుం. యస్సాయస్మతో అత్థో, సో ఆగచ్ఛతూ’’’తి. భిక్ఖూ ఏవమాహంసు – ‘‘భగవతా, ఆవుసో ఆనన్ద, పఞ్ఞత్తం దసవస్సాని నిస్సాయ వత్థుం, దసవస్సేన నిస్సయం దాతుం. తత్థ చ నో గన్తబ్బం భవిస్సతి, నిస్సయో చ గహేతబ్బో భవిస్సతి, ఇత్తరో చ వాసో భవిస్సతి, పున చ పచ్చాగన్తబ్బం భవిస్సతి, పున చ నిస్సయో గహేతబ్బో భవిస్సతి. సచే అమ్హాకం ఆచరియుపజ్ఝాయా గమిస్సన్తి, మయమ్పి గమిస్సామ; నో చే అమ్హాకం ఆచరియుపజ్ఝాయా గమిస్సన్తి, మయమ్పి న గమిస్సామ. లహుచిత్తకతా నో, ఆవుసో ఆనన్ద, పఞ్ఞాయిస్సతీ’’తి. అథ ఖో భగవా ఓగణేన భిక్ఖుసఙ్ఘేన దక్ఖిణాగిరిం చారికం పక్కామి.

ఆహున్దరికవత్థు నిట్ఠితం.