౨౫. అఞ్ఞతిత్థియపుబ్బకథా

౮౬. తేన ఖో పన సమయేన యో సో అఞ్ఞతిత్థియపుబ్బో [యో సో పసురపరిబ్బాజకో అఞ్ఞతిత్థియపుబ్బో (క.)] పజ్ఝాయేన సహధమ్మికం వుచ్చమానో ఉపజ్ఝాయస్స వాదం ఆరోపేత్వా తంయేవ తిత్థాయతనం సఙ్కమి. సో పున పచ్చాగన్త్వా భిక్ఖూ ఉపసమ్పదం యాచి. భిక్ఖూ భగవతో ఏతమత్థం ఆరోచేసుం. యో సో, భిక్ఖవే, అఞ్ఞతిత్థియపుబ్బో ఉపజ్ఝాయేన సహధమ్మికం వుచ్చమానో ఉపజ్ఝాయస్స వాదం ఆరోపేత్వా తంయేవ తిత్థాయతనం సఙ్కన్తో, సో ఆగతో న ఉపసమ్పాదేతబ్బో. యో సో, భిక్ఖవే, అఞ్ఞోపి అఞ్ఞతిత్థియపుబ్బో ఇమస్మిం ధమ్మవినయే ఆకఙ్ఖతి పబ్బజ్జం, ఆకఙ్ఖతి ఉపసమ్పదం, తస్స చత్తారో మాసే పరివాసో దాతబ్బో. ఏవఞ్చ పన, భిక్ఖవే, దాతబ్బో – పఠమం కేసమస్సుం ఓహారాపేత్వా కాసాయాని వత్థాని అచ్ఛాదాపేత్వా ఏకంసం ఉత్తరాసఙ్గం కారాపేత్వా భిక్ఖూనం పాదే వన్దాపేత్వా ఉక్కుటికం నిసీదాపేత్వా అఞ్జలిం పగ్గణ్హాపేత్వా ఏవం వదేహీతి వత్తబ్బో – ‘‘బుద్ధం సరణం గచ్ఛామి, ధమ్మం సరణం గచ్ఛామి, సఙ్ఘం సరణం గచ్ఛామి; దుతియమ్పి బుద్ధం సరణం గచ్ఛామి, దుతియమ్పి ధమ్మం సరణం గచ్ఛామి, దుతియమ్పి సఙ్ఘం సరణం గచ్ఛామి; తతియమ్పి బుద్ధం సరణం గచ్ఛామి, తతియమ్పి ధమ్మం సరణం గచ్ఛామి, తతియమ్పి సఙ్ఘం సరణం గచ్ఛామీ’’తి.

తేన, భిక్ఖవే, అఞ్ఞతిత్థియపుబ్బేన సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖూనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అహం, భన్తే, అఞ్ఞతిత్థియపుబ్బో ఇమస్మిం ధమ్మవినయే ఆకఙ్ఖామి ఉపసమ్పదం. సోహం, భన్తే, సఙ్ఘం చత్తారో మాసే పరివాసం యాచామీ’’తి. దుతియమ్పి యాచితబ్బో. తతియమ్పి యాచితబ్బో. బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. అయం ఇత్థన్నామో అఞ్ఞతిత్థియపుబ్బో ఇమస్మిం ధమ్మవినయే ఆకఙ్ఖతి ఉపసమ్పదం. సో సఙ్ఘం చత్తారో మాసే పరివాసం యాచతి. యది సఙ్ఘస్స పత్తకల్లం సఙ్ఘో ఇత్థన్నామస్స అఞ్ఞతిత్థియపుబ్బస్స చత్తారో మాసే పరివాసం దదేయ్య. ఏసా ఞత్తి.

‘‘సుణాతు మే, భన్తే, సఙ్ఘో. అయం ఇత్థన్నామో అఞ్ఞతిత్థియపుబ్బో ఇమస్మిం ధమ్మవినయే ఆకఙ్ఖతి ఉపసమ్పదం. సో సఙ్ఘం చత్తారో మాసే పరివాసం యాచతి. సఙ్ఘో ఇత్థన్నామస్స అఞ్ఞతిత్థియపుబ్బస్స చత్తారో మాసే పరివాసం దేతి. యస్సాయస్మతో ఖమతి ఇత్థన్నామస్స అఞ్ఞతిత్థియపుబ్బస్స చత్తారో మాసే పరివాసస్స దానం, సో తుణ్హస్స; యస్స నక్ఖమతి, సో భాసేయ్య.

‘‘దిన్నో సఙ్ఘేన ఇత్థన్నామస్స అఞ్ఞతిత్థియపుబ్బస్స చత్తారో మాసే పరివాసో. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౮౭. ‘‘ఏవం ఖో, భిక్ఖవే, అఞ్ఞతిత్థియపుబ్బో ఆరాధకో హోతి, ఏవం అనారాధకో. కథఞ్చ, భిక్ఖవే, అఞ్ఞతిత్థియపుబ్బో అనారాధకో హోతి? ఇధ, భిక్ఖవే, అఞ్ఞతిత్థియపుబ్బో అతికాలేన గామం పవిసతి, అతిదివా పటిక్కమతి. ఏవమ్పి, భిక్ఖవే, అఞ్ఞతిత్థియపుబ్బో అనారాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో వేసియాగోచరో వా హోతి, విధవాగోచరో వా హోతి, థుల్లకుమారికాగోచరో వా హోతి, పణ్డకగోచరో వా హోతి, భిక్ఖునిగోచరో వా హోతి. ఏవమ్పి, భిక్ఖవే, అఞ్ఞతిత్థియపుబ్బో అనారాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో యాని తాని సబ్రహ్మచారీనం ఉచ్చావచాని కరణీయాని, తత్థ న దక్ఖో హోతి, న అనలసో, న తత్రుపాయాయ వీమంసాయ సమన్నాగతో, న అలం కాతుం, న అలం సంవిధాతుం. ఏవమ్పి, భిక్ఖవే, అఞ్ఞతిత్థియపుబ్బో అనారాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో న తిబ్బచ్ఛన్దో హోతి ఉద్దేసే, పరిపుచ్ఛాయ, అధిసీలే, అధిచిత్తే, అధిపఞ్ఞాయ. ఏవమ్పి, భిక్ఖవే, అఞ్ఞతిత్థియపుబ్బో అనారాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో యస్స తిత్థాయతనా సఙ్కన్తో హోతి, తస్స సత్థునో తస్స దిట్ఠియా తస్స ఖన్తియా తస్స రుచియా తస్స ఆదాయస్స అవణ్ణే భఞ్ఞమానే కుపితో హోతి అనత్తమనో అనభిరద్ధో, బుద్ధస్స వా ధమ్మస్స వా సఙ్ఘస్స వా అవణ్ణే భఞ్ఞమానే అత్తమనో హోతి ఉదగ్గో అభిరద్ధో. యస్స వా పన తిత్థాయతనా సఙ్కన్తో హోతి, తస్స సత్థునో తస్స దిట్ఠియా తస్స ఖన్తియా తస్స రుచియా తస్స ఆదాయస్స వణ్ణే భఞ్ఞమానే అత్తమనో హోతి ఉదగ్గో అభిరద్ధో, బుద్ధస్స వా ధమ్మస్స వా సఙ్ఘస్స వా వణ్ణే భఞ్ఞమానే కుపితో హోతి అనత్తమనో అనభిరద్ధో. ఇదం, భిక్ఖవే, సఙ్ఘాతనికం అఞ్ఞతిత్థియపుబ్బస్స అనారాధనీయస్మిం. ఏవమ్పి ఖో, భిక్ఖవే, అఞ్ఞతిత్థియపుబ్బో అనారాధకో హోతి. ఏవం అనారాధకో ఖో, భిక్ఖవే, అఞ్ఞతిత్థియపుబ్బో ఆగతో న ఉపసమ్పాదేతబ్బో.

‘‘కథఞ్చ, భిక్ఖవే, అఞ్ఞతిత్థియపుబ్బో ఆరాధకో హోతి? ఇధ, భిక్ఖవే, అఞ్ఞతిత్థియపుబ్బో నాతికాలేన గామం పవిసతి నాతిదివా పటిక్కమతి. ఏవమ్పి, భిక్ఖవే, అఞ్ఞతిత్థియపుబ్బో ఆరాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో న వేసియాగోచరో హోతి, న విధవాగోచరో హోతి, న థుల్లకుమారికాగోచరో హోతి, న పణ్డకగోచరో హోతి, న భిక్ఖునిగోచరో హోతి. ఏవమ్పి, భిక్ఖవే, అఞ్ఞతిత్థియపుబ్బో ఆరాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో యాని తాని సబ్రహ్మచారీనం ఉచ్చావచాని కరణీయాని, తత్థ దక్ఖో హోతి, అనలసో, తత్రుపాయాయ వీమంసాయ సమన్నాగతో, అలం కాతుం, అలం సంవిధాతుం. ఏవమ్పి, భిక్ఖవే, అఞ్ఞతిత్థియపుబ్బో ఆరాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో తిబ్బచ్ఛన్దో హోతి ఉద్దేసే, పరిపుచ్ఛాయ, అధిసీలే, అధిచిత్తే, అధిపఞ్ఞాయ. ఏవమ్పి, భిక్ఖవే, అఞ్ఞతిత్థియపుబ్బో ఆరాధకో హోతి.

‘‘పున చపరం, భిక్ఖవే, అఞ్ఞతిత్థియపుబ్బో యస్స తిత్థాయతనా సఙ్కన్తో హోతి, తస్స సత్థునో తస్స దిట్ఠియా తస్స ఖన్తియా తస్స రుచియా తస్స ఆదాయస్స అవణ్ణే భఞ్ఞమానే అత్తమనో హోతి ఉదగ్గో అభిరద్ధో, బుద్ధస్స వా ధమ్మస్స వా సఙ్ఘస్స వా అవణ్ణే భఞ్ఞమానే కుపితో హోతి అనత్తమనో అనభిరద్ధో. యస్స వా పన తిత్థాయతనా సఙ్కన్తో హోతి, తస్స సత్థునో తస్స దిట్ఠియా తస్స ఖన్తియా తస్స రుచియా తస్స ఆదాయస్స వణ్ణే భఞ్ఞమానే కుపితో హోతి అనత్తమనో అనభిరద్ధో, బుద్ధస్స వా ధమ్మస్స వా సఙ్ఘస్స వా వణ్ణే భఞ్ఞమానే అత్తమనో హోతి ఉదగ్గో అభిరద్ధో. ఇదం, భిక్ఖవే, సఙ్ఘాతనికం అఞ్ఞతిత్థియపుబ్బస్స ఆరాధనీయస్మిం. ఏవమ్పి ఖో, భిక్ఖవే, అఞ్ఞతిత్థియపుబ్బో ఆరాధకో హోతి. ఏవం ఆరాధకో ఖో, భిక్ఖవే, అఞ్ఞతిత్థియపుబ్బో ఆగతో ఉపసమ్పాదేతబ్బో.

‘‘సచే, భిక్ఖవే, అఞ్ఞతిత్థియపుబ్బో నగ్గో ఆగచ్ఛతి, ఉపజ్ఝాయమూలకం చీవరం పరియేసితబ్బం. సచే అచ్ఛిన్నకేసో ఆగచ్ఛతి, సఙ్ఘో అపలోకేతబ్బో భణ్డుకమ్మాయ. యే తే, భిక్ఖవే, అగ్గికా జటిలకా, తే ఆగతా ఉపసమ్పాదేతబ్బా, న తేసం పరివాసో దాతబ్బో. తం కిస్స హేతు? కమ్మవాదినో ఏతే, భిక్ఖవే, కిరియవాదినో. సచే, భిక్ఖవే, జాతియా సాకియో అఞ్ఞతిత్థియపుబ్బో ఆగచ్ఛతి, సో ఆగతో ఉపసమ్పాదేతబ్బో, న తస్స పరివాసో దాతబ్బో. ఇమాహం, భిక్ఖవే, ఞాతీనం ఆవేణికం పరిహారం దమ్మీ’’తి.

అఞ్ఞతిత్థియపుబ్బకథా నిట్ఠితా.

సత్తమభాణవారో.