౨౧. బాలఅబ్యత్తవత్థు

౮౨. తేన ఖో పన సమయేన భిక్ఖూ, దసవస్సమ్హా దసవస్సమ్హాతి, బాలా అబ్యత్తా నిస్సయం దేన్తి. దిస్సన్తి ఆచరియా బాలా, అన్తేవాసికా పణ్డితా. దిస్సన్తి ఆచరియా అబ్యత్తా, అన్తేవాసికా బ్యత్తా. దిస్సన్తి ఆచరియా అప్పస్సుతా, అన్తేవాసికా బహుస్సుతా. దిస్సన్తి ఆచరియా దుప్పఞ్ఞా, అన్తేవాసికా పఞ్ఞవన్తో. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖూ, దసవస్సమ్హా దసవస్సమ్హాతి, బాలా అబ్యత్తా నిస్సయం దస్సన్తి. దిస్సన్తి ఆచరియా బాలా అన్తేవాసికా పణ్డితా, దిస్సన్తి ఆచరియా అబ్యత్తా అన్తేవాసికా బ్యత్తా, దిస్సన్తి ఆచరియా అప్పస్సుతా అన్తేవాసికా బహుస్సుతా, దిస్సన్తి ఆచరియా దుప్పఞ్ఞా అన్తేవాసికా పఞ్ఞవన్తో’’తి. అథ ఖో తే భిక్ఖూ భగవతో ఏతమత్థం ఆరోచేసుం…పే… సచ్చం కిర, భిక్ఖవే, భిక్ఖూ, దసవస్సమ్హా దసవస్సమ్హాతి, బాలా అబ్యత్తా నిస్సయం దేన్తి…పే… సచ్చం, భగవాతి. విగరహి బుద్ధో భగవా…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, బాలేన అబ్యత్తేన నిస్సయో దాతబ్బో. యో దదేయ్య, ఆపత్తి దుక్కటస్స. అనుజానామి, భిక్ఖవే, బ్యత్తేన భిక్ఖునా పటిబలేన దసవస్సేన వా అతిరేకదసవస్సేన వా నిస్సయం దాతు’’న్తి.

బాలఅబ్యత్తవత్థు నిట్ఠితం.