౧౧. భద్దవగ్గియవత్థు

౩౬. అథ ఖో భగవా బారాణసియం యథాభిరన్తం విహరిత్వా యేన ఉరువేలా తేన చారికం పక్కామి. అథ ఖో భగవా మగ్గా ఓక్కమ్మ యేన అఞ్ఞతరో వనసణ్డో తేనుపసఙ్కమి, ఉపసఙ్కమిత్వా తం వనసణ్డం అజ్ఝోగాహేత్వా అఞ్ఞతరస్మిం రుక్ఖమూలే నిసీది. తేన ఖో పన సమయేన తింసమత్తా భద్దవగ్గియా సహాయకా సపజాపతికా తస్మిం వనసణ్డే పరిచారేన్తి. ఏకస్స పజాపతి నాహోసి; తస్స అత్థాయ వేసీ ఆనీతా అహోసి. అథ ఖో సా వేసీ తేసు పమత్తేసు పరిచారేన్తేసు భణ్డం ఆదాయ పలాయిత్థ. అథ ఖో తే సహాయకా సహాయకస్స వేయ్యావచ్చం కరోన్తా, తం ఇత్థిం గవేసన్తా, తం వనసణ్డం ఆహిణ్డన్తా అద్దసంసు భగవన్తం అఞ్ఞతరస్మిం రుక్ఖమూలే నిసిన్నం. దిస్వాన యేన భగవా తేనుపసఙ్కమింసు, ఉపసఙ్కమిత్వా భగవన్తం ఏతదవోచుం – ‘‘అపి, భన్తే, భగవా ఏకం ఇత్థిం పస్సేయ్యా’’తి? ‘‘కిం పన వో, కుమారా, ఇత్థియా’’తి? ‘‘ఇధ మయం, భన్తే, తింసమత్తా భద్దవగ్గియా సహాయకా సపజాపతికా ఇమస్మిం వనసణ్డే పరిచారిమ్హా. ఏకస్స పజాపతి నాహోసి; తస్స అత్థాయ వేసీ ఆనీతా అహోసి. అథ ఖో సా, భన్తే, వేసీ అమ్హేసు పమత్తేసు పరిచారేన్తేసు భణ్డం ఆదాయ పలాయిత్థ. తే మయం, భన్తే, సహాయకా సహాయకస్స వేయ్యావచ్చం కరోన్తా, తం ఇత్థిం గవేసన్తా, ఇమం వనసణ్డం ఆహిణ్డామా’’తి. ‘‘తం కిం మఞ్ఞథ వో, కుమారా, కతమం ను ఖో తుమ్హాకం వరం – యం వా తుమ్హే ఇత్థిం గవేసేయ్యాథ, యం వా అత్తానం గవేసేయ్యాథా’’తి? ‘‘ఏతదేవ, భన్తే, అమ్హాకం వరం యం మయం అత్తానం గవేసేయ్యామా’’తి. ‘‘తేన హి వో, కుమారా, నిసీదథ, ధమ్మం వో దేసేస్సామీ’’తి. ‘‘ఏవం, భన్తే’’తి ఖో తే భద్దవగ్గియా సహాయకా భగవన్తం అభివాదేత్వా ఏకమన్తం నిసీదింసు. తేసం భగవా అనుపుబ్బిం కథం కథేసి, సేయ్యథిదం – దానకథం సీలకథం సగ్గకథం కామానం ఆదీనవం ఓకారం సంకిలేసం నేక్ఖమ్మే ఆనిసంసం పకాసేసి, యదా తే భగవా అఞ్ఞాసి కల్లచిత్తే ముదుచిత్తే వినీవరణచిత్తే ఉదగ్గచిత్తే పసన్నచిత్తే, అథ యా బుద్ధానం సాముక్కంసికా ధమ్మదేసనా, తం పకాసేసి దుక్ఖం సముదయం నిరోధం మగ్గం, సేయ్యథాపి నామ సుద్ధం వత్థం అపగతకాళకం సమ్మదేవ రజనం పటిగ్గణ్హేయ్య, ఏవమేవ తేసం తస్మింయేవ ఆసనే విరజం వీతమలం ధమ్మచక్ఖుం ఉదపాది ‘‘యం కిఞ్చి సముదయధమ్మం, సబ్బం తం నిరోధధమ్మ’’న్తి. తే దిట్ఠధమ్మా పత్తధమ్మా విదితధమ్మా పరియోగాళ్హధమ్మా తిణ్ణవిచికిచ్ఛా విగతకథంకథా వేసారజ్జప్పత్తా అపరప్పచ్చయా సత్థుసాసనే భగవన్తం ఏతదవోచుం – ‘‘లభేయ్యామ మయం, భన్తే, భగవతో సన్తికే పబ్బజ్జం, లభేయ్యామ ఉపసమ్పద’’న్తి. ‘‘ఏథ భిక్ఖవో’’తి భగవా అవోచ – ‘‘స్వాక్ఖాతో ధమ్మో, చరథ బ్రహ్మచరియం సమ్మా దుక్ఖస్స అన్తకిరియాయా’’తి. సావ తేసం ఆయస్మన్తానం ఉపసమ్పదా అహోసి.

భద్దవగ్గియసహాయకానం వత్థు నిట్ఠితం.

దుతియభాణవారో.