౫. అబ్భానారహవత్తం

౯౫. తేన ఖో పన సమయేన అబ్భానారహా భిక్ఖూ సాదియన్తి పకతత్తానం భిక్ఖూనం అభివాదనం పచ్చుట్ఠానం…పే… నహానే పిట్ఠిపరికమ్మం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అబ్భానారహా భిక్ఖూ సాదియిస్సన్తి పకతత్తానం భిక్ఖూనం అభివాదనం పచ్చుట్ఠానం…పే… నహానే పిట్ఠిపరికమ్మ’’న్తి! అథ ఖో తే భిక్ఖూ భగవతో ఏతమత్థం ఆరోచేసుం.

అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా భిక్ఖూ పటిపుచ్ఛి – ‘‘సచ్చం కిర, భిక్ఖవే, అబ్భానారహా భిక్ఖూ సాదియన్తి పకతత్తానం భిక్ఖూనం అభివాదనం పచ్చుట్ఠానం…పే… నహానే పిట్ఠిపరికమ్మన్తి? ‘‘సచ్చం భగవా’’తి. విగరహి బుద్ధో భగవా – ‘‘అననుచ్ఛవికం…పే… కథఞ్హి నామ, భిక్ఖవే, అబ్భానారహా భిక్ఖూ సాదియిస్సన్తి పకతత్తానం భిక్ఖూనం అభివాదనం పచ్చుట్ఠానం…పే… నహానే పిట్ఠిపరికమ్మం! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, అబ్భానారహేన భిక్ఖునా సాదితబ్బం పకతత్తానం భిక్ఖూనం అభివాదనం పచ్చుపట్ఠానం…పే… నహానే పిట్ఠిపరికమ్మం. యో సాదియేయ్య, ఆపత్తి దుక్కటస్స. అనుజానామి, భిక్ఖవే, అబ్భానారహానం భిక్ఖూనం మిథు యథావుడ్ఢం అభివాదనం పచ్చుట్ఠానం…పే… నహానే పిట్ఠిపరికమ్మం. అనుజానామి, భిక్ఖవే, అబ్భానారహానం భిక్ఖూనం పఞ్చ యథావుడ్ఢం – ఉపోసథం, పవారణం, వస్సికసాటికం, ఓణోజనం, భత్తం. తేన హి, భిక్ఖవే, అబ్భానారహానం భిక్ఖూనం వత్తం పఞ్ఞాపేస్సామి యథా అబ్భానారహేహి భిక్ఖూహి వత్తితబ్బం.

౯౬. ‘‘అబ్భానారహేన, భిక్ఖవే, భిక్ఖునా సమ్మా వత్తితబ్బం. తత్రాయం సమ్మావత్తనా –

న ఉపసమ్పాదేతబ్బం…పే… (యథా హేట్ఠా, తథా విత్థారేతబ్బం,) న భిక్ఖూహి సమ్పయోజేతబ్బం.

‘‘న, భిక్ఖవే, అబ్భానారహేన భిక్ఖునా పకతత్తస్స భిక్ఖునో పురతో గన్తబ్బం, న పురతో నిసీదితబ్బం. యో హోతి సఙ్ఘస్స ఆసనపరియన్తో సేయ్యాపరియన్తో విహారపరియన్తో సో తస్స పదాతబ్బో. తేన చ సో సాదితబ్బో.

‘‘న, భిక్ఖవే, అబ్భానారహేన భిక్ఖునా పకతత్తేన భిక్ఖునా పురేసమణేన వా పచ్ఛాసమణేన వా కులాని ఉపసఙ్కమితబ్బాని; న ఆరఞ్ఞికఙ్గం సమాదాతబ్బం; న పిణ్డపాతికఙ్గం సమాదాతబ్బం; న చ తప్పచ్చయా పిణ్డపాతో నీహరాపేతబ్బో – మా మం జానింసూతి.

‘‘న, భిక్ఖవే, అబ్భానారహేన భిక్ఖునా సభిక్ఖుకా ఆవాసా అభిక్ఖుకో ఆవాసో గన్తబ్బో, అఞ్ఞత్ర పకతత్తేన, అఞ్ఞత్ర అన్తరాయా.

‘‘న, భిక్ఖవే, అబ్భానారహేన భిక్ఖునా సభిక్ఖుకా ఆవాసా అభిక్ఖుకో అనావాసో గన్తబ్బో, అఞ్ఞత్ర పకతత్తేన, అఞ్ఞత్ర అన్తరాయా…పే…. (యథా హేట్ఠా, తథా విత్థారేతబ్బా.)

‘‘గన్తబ్బో, భిక్ఖవే, అబ్భానారహేన భిక్ఖునా సభిక్ఖుకా ఆవాసా…పే… అనావాసా…పే… ఆవాసా వా అనావాసా వా సభిక్ఖుకో ఆవాసో…పే… సభిక్ఖుకో అనావాసో…పే… సభిక్ఖుకో ఆవాసో వా అనావాసో వా, యత్థస్సు భిక్ఖూ సమానసంవాసకా, యం జఞ్ఞా సక్కోమి అజ్జేవ గన్తున్తి.

‘‘న, భిక్ఖవే, అబ్భానారహేన భిక్ఖునా పకతత్తేన భిక్ఖునా సద్ధిం ఏకచ్ఛన్నే ఆవాసే వత్థబ్బం, న ఏకచ్ఛన్నే అనావాసే వత్థబ్బం, న ఏకచ్ఛన్నే ఆవాసే వా అనావాసే వా వత్థబ్బం; పకతత్తం భిక్ఖుం దిస్వా ఆసనా వుట్ఠాతబ్బం, పకతత్తో భిక్ఖు ఆసనేన నిమన్తేతబ్బో; న పకతత్తేన భిక్ఖునా సద్ధిం ఏకాసనే నిసీదితబ్బం, న నీచే ఆసనే నిసిన్నే ఉచ్చే ఆసనే నిసీదితబ్బం, న ఛమాయం నిసిన్నే ఆసనే నిసీదితబ్బం; న ఏకచఙ్కమే చఙ్కమితబ్బం, న నీచే చఙ్కమే చఙ్కమన్తే ఉచ్చే చఙ్కమే చఙ్కమితబ్బం, న ఛమాయం చఙ్కమన్తే చఙ్కమే చఙ్కమితబ్బం.

‘‘న, భిక్ఖవే, అబ్భానారహేన భిక్ఖునా పారివాసికేన భిక్ఖునా సద్ధిం…పే… మూలాయపటికస్సనారహేన భిక్ఖునా సద్ధిం…పే… మానత్తారహేన భిక్ఖునా సద్ధిం…పే… మానత్తచారికేన భిక్ఖునా సద్ధిం…పే… అబ్భానారహేన వుడ్ఢతరేన భిక్ఖునా సద్ధిం ఏకచ్ఛన్నే ఆవాసే వత్థబ్బం, న ఏకచ్ఛన్నే అనావాసే వత్థబ్బం; న ఏకచ్ఛన్నే ఆవాసే వా అనావాసే వా వత్థబ్బం; న ఏకాసనే నిసీదితబ్బం, న నీచే ఆసనే నిసిన్నే ఉచ్చే ఆసనే నిసీదితబ్బం, న ఛమాయం నిసిన్నే ఆసనే నిసీదితబ్బం; న ఏకచఙ్కమే చఙ్కమితబ్బం, న నీచే చఙ్కమే చఙ్కమన్తే ఉచ్చే చఙ్కమే చఙ్కమితబ్బం, న ఛమాయం చఙ్కమన్తే చఙ్కమే చఙ్కమితబ్బం.

[మహావ. ౩౯౩] ‘‘అబ్భానారహచతుత్థో చే, భిక్ఖవే, పరివాసం దదేయ్య, మూలాయ పటికస్సేయ్య, మానత్తం దదేయ్య, తంవీసో అబ్భేయ్య, అకమ్మం, న చ కరణీయ’’న్తి.

అబ్భానారహవత్తం నిట్ఠితం.

పారివాసికక్ఖన్ధకో దుతియో.

ఇమమ్హి ఖన్ధకే వత్థూ పఞ్చ.

తస్సుద్దానం –

పారివాసికా సాదేన్తి, పకతత్తాన భిక్ఖునం;

అభివాదనం పచ్చుట్ఠానం, అఞ్జలిఞ్చ సామీచియం.

ఆసనం సేయ్యాభిహారం, పాదో పీఠం కథలికం;

పత్తం నహానే పరికమ్మం, ఉజ్ఝాయన్తి చ పేసలా.

దుక్కటం సాదియన్తస్స, మిథు పఞ్చ యథావుడ్ఢం [పునాపరే (క.)];

ఉపోసథం పవారణం, వస్సికోణోజభోజనం.

సమ్మా చ వత్తనా తత్థ, పకతత్తస్స గచ్ఛన్తం;

యో చ హోతి పరియన్తో, పురే పచ్ఛా తథేవ చ [న పురే పచ్ఛాసమణేన (సీ. స్యా.)].

ఆరఞ్ఞపిణ్డనీహారో, ఆగన్తుకే ఉపోసథే;

పవారణాయ దూతేన, గన్తబ్బో చ సభిక్ఖుకో.

ఏకచ్ఛన్నే చ వుట్ఠానం, తథేవ చ నిమన్తయే;

ఆసనే నీచే చఙ్కమే, ఛమాయం చఙ్కమేన చ.

వుడ్ఢతరేన అకమ్మం, రత్తిచ్ఛేదా చ సోధనా;

నిక్ఖిపనం సమాదానం, వత్తంవ పారివాసికే [రత్తి వా పారివాసికే (క.), ఞాతబ్బం పారివాసికా (సీ. స్యా.)].

మూలాయ మానత్తారహా, తథా మానత్తచారికా;

అబ్భానారహే నయో చాపి, సమ్భేదం నయతో [సమ్భేదనయతో (స్యా.)] పున.

పారివాసికేసు తయో, చతు మానత్తచారికే;

న సమేన్తి రత్తిచ్ఛేదేసు [రత్తిచ్ఛేదే (ఇతిపి), రత్తిచ్ఛేదా (స్యా.)], మానత్తేసు చ దేవసి;

ద్వే కమ్మా సదిసా సేసా, తయో కమ్మా సమాసమాతి [సమా మతాతి (సీ.)].

పారివాసికక్ఖన్ధకం నిట్ఠితం.