పాటిదేసనీయకథా

౧౮౩౦. యో చన్తరఘరం భిక్ఖు, పవిట్ఠాయ తు హత్థతో;

అఞ్ఞాతికాయ యం కిఞ్చి, తస్స భిక్ఖునియా పన.

౧౮౩౧. సహత్థా పటిగ్గణ్హేయ్య, ఖాదనం భోజనమ్పి వా;

గహణే దుక్కటం భోగే, పాటిదేసనియం సియా.

౧౮౩౨. రథికాయపి వా బ్యూహే, సన్ధిసిఙ్ఘాటకేసు వా;

హత్థిసాలాదికే ఠత్వా, గణ్హతోపి అయం నయో.

౧౮౩౩. రథికాయ సచే ఠత్వా, దేతి భిక్ఖుని భోజనం;

ఆపత్తి అన్తరారామే, ఠత్వా గణ్హాతి భిక్ఖు చే.

౧౮౩౪. ఏత్థన్తరఘరం తస్సా, పవిట్ఠాయ హి వాక్యతో;

భిక్ఖుస్స చ ఠితట్ఠానం, నప్పమాణన్తి వణ్ణితం.

౧౮౩౫. తస్మా భిక్ఖునియా ఠత్వా, ఆరామాదీసు దేన్తియా;

వీథియాదీసు చే ఠత్వా, న దోసో పటిగణ్హతో.

౧౮౩౬. యామకాలికసత్తాహ-కాలికం యావజీవికం;

ఆహారత్థాయ గహణే, అజ్ఝోహారే చ దుక్కటం.

౧౮౩౭. ఆమిసేన అసమ్భిన్న-రసం సన్ధాయ భాసితం;

పాటిదేసనియాపత్తి, సమ్భిన్నేకరసే సియా.

౧౮౩౮. ఏకతోఉపసమ్పన్న-హత్థతో పటిగణ్హతో;

కాలికానం చతున్నమ్పి, ఆహారత్థాయ దుక్కటం.

౧౮౩౯. ఞాతికాయపి అఞ్ఞాతి-సఞ్ఞినో విమతిస్స వా;

దుక్కటం ఞాతిసఞ్ఞిస్స, తథా అఞ్ఞాతికాయ వా.

౧౮౪౦. దాపేన్తియా అనాపత్తి, దదమానాయ వా పన;

నిక్ఖిపిత్వాన్తరారామా-దీసు ఠత్వాపి దేన్తియా.

౧౮౪౧. గామతో నీహరిత్వా వా, దేతి చే బహి వట్టతి;

‘‘పచ్చయే సతి భుఞ్జా’’తి, దేతి చే కాలికత్తయం.

౧౮౪౨. హత్థతో సామణేరీనం, సిక్ఖమానాయ వా తథా;

ఇదం ఏళకలోమేన, సముట్ఠానం సమం మతం.

పఠమపాటిదేసనీయకథా.

౧౮౪౩. అవుత్తే ‘‘అపసక్కా’’తి, ఏకేనాపి చ భిక్ఖునా;

సచేజ్ఝోహరణత్థాయ, ఆమిసం పటిగణ్హతి.

౧౮౪౪. గహణే దుక్కటం భోగే, పాటిదేసనియం సియా;

ఏకతోఉపసమ్పన్నం, న వారేన్తస్స దుక్కటం.

౧౮౪౫. తథేవానుపసమ్పన్నా-యుపసమ్పన్నసఞ్ఞినో;

తత్థ వేమతికస్సాపి, హోతి ఆపత్తి దుక్కటం.

౧౮౪౬. అనాపత్తిత్తనో భత్తం, పదాపేతి న దేతి చే;

తథా అఞ్ఞస్స భత్తం వా, న దాపేతి పదేతి చే.

౧౮౪౭. యం న దిన్నం తం దాపేతి, న దిన్నం యత్థ వాపి చ;

తత్థ తమ్పి చ సబ్బేసం, సమం దాపేతి భిక్ఖునీ.

౧౮౪౮. వోసాసన్తీ ఠితా సిక్ఖ-మానా వా సామణేరికా;

భోజనాని చ పఞ్చేవ, వినా, ఉమ్మత్తకాదినో.

౧౮౪౯. కథినేన సముట్ఠానం, సమానన్తి పకాసితం;

క్రియాక్రియమిదం వుత్తం, తిచిత్తఞ్చ తివేదనం.

దుతియపాటిదేసనీయకథా.

౧౮౫౦. సేక్ఖన్తి సమ్మతే భిక్ఖు, లద్ధసమ్ముతికే కులే;

ఘరూపచారోక్కమనా, పుబ్బేవ అనిమన్తితో.

౧౮౫౧. అగిలానో గహేత్వా చే, పరిభుఞ్జేయ్య ఆమిసం;

గహణే దుక్కటం భోగే, పాటిదేసనియం సియా.

౧౮౫౨. యామకాలికసత్తాహ-కాలికే యావజీవికే;

గహణే పరిభోగే చ, హోతి ఆపత్తి దుక్కటం.

౧౮౫౩. అసేక్ఖసమ్మతే సేక్ఖ-సమ్మతన్తి చ సఞ్ఞినో;

తత్థ వేమతికస్సాపి, తథేవ పరిదీపితం.

౧౮౫౪. అనాపత్తి గిలానస్స, గిలానస్సావసేసకే;

నిమన్తితస్స వా భిక్ఖా, అఞ్ఞేసం తత్థ దీయతి.

౧౮౫౫. ఘరతో నీహరిత్వా వా, దేన్తి చే యత్థ కత్థచి;

నిచ్చభత్తాదికే వాపి, తథా ఉమ్మత్తకాదినో.

౧౮౫౬. అనాగతే హి భిక్ఖుమ్హి, ఘరతో పఠమం పన;

నీహరిత్వా సచే ద్వారే, సమ్పత్తే దేన్తి వట్టతి.

౧౮౫౭. భిక్ఖుం పన చ దిస్వావ, నీహరిత్వాన గేహతో;

న వట్టతి సచే దేన్తి, సముట్ఠానేళకూపమం.

తతియపాటిదేసనీయకథా.

౧౮౫౮. గహట్ఠేనాగహట్ఠేన, ఇత్థియా పురిసేన వా;

ఆరామం ఉపచారం వా, పవిసిత్వా సచే పన.

౧౮౫౯. ‘‘ఇత్థన్నామస్స తే భత్తం, యాగు వా ఆహరీయతి’’;

ఏవమారోచితం వుత్తం, పటిసంవిదితన్తి హి.

౧౮౬౦. ఆహరీయతు తం పచ్ఛా, యథారోచితమేవ వా;

తస్స వా పరివారమ్పి, అఞ్ఞం కత్వా బహుం పన.

౧౮౬౧. యాగుయా విదితం కత్వా, పూవం భత్తం హరన్తి చే;

ఇదమ్పి విదితం వుత్తం, వట్టతీతి కురున్దియం.

౧౮౬౨. కులాని పన అఞ్ఞాని, దేయ్యధమ్మం పనత్తనో;

హరన్తి తేన సద్ధిం చే, సబ్బం వట్టతి తమ్పి చ.

౧౮౬౩. అనారోచితమేవం యం, యం ఆరామమనాభతం;

తం అసంవిదితం నామ, సహధమ్మికఞాపితం.

౧౮౬౪. యం అసంవిదితం కత్వా, ఆభతం పన తం బహి;

ఆరామం పన పేసేత్వా, కారాపేత్వా తమాహరే.

౧౮౬౫. గన్త్వా వా అన్తరామగ్గే, గహేతబ్బం తు భిక్ఖునా;

సచే ఏవమకత్వా తం, ఆరామే ఉపచారతో.

౧౮౬౬. గహేత్వాజ్ఝోహరన్తస్స, గహణే దుక్కటం సియా;

అజ్ఝోహారపయోగేసు, పాటిదేసనియం మతం.

౧౮౬౭. పటిసంవిదితేయేవ, అసంవిదితసఞ్ఞినో;

తత్థ వేమతికస్సాపి, హోతి ఆపత్తి దుక్కటం.

౧౮౬౮. పటిసంవిదితే తస్స, గిలానస్సావసేసకే;

బహారామే గహేత్వా వా, అన్తోయేవస్స భుఞ్జతో.

౧౮౬౯. తత్థజాతఫలాదీని, అనాపత్తేవ ఖాదతో;

సముట్ఠానాదయో సబ్బే, కథినేన సమా మతా.

చతుత్థపాటిదేసనీయకథా.

ఇతి వినయవినిచ్ఛయే పాటిదేసనీయకథా నిట్ఠితా.