౯. నవమో పరిచ్ఛేదో
దసానుస్సతివిభాగో
౧౧౦౦. సద్ధాపబ్బజితో యోగీ, భావేన్తోనుస్సతిం పన;
దసానుస్సతిభేదేసు, భావేయ్యఞ్ఞతరం కథం.
౧౧౦౧. అరహం సుగతో లోకే, భగవా లోకపారగూ;
విజ్జాచరణసమ్పన్నో, విముత్తిపరినాయకో.
౧౧౦౨. జేట్ఠో సమ్మాభిసమ్బుద్ధో, సేట్ఠో పురిససారథీ;
సత్థా దేవమనుస్సానం, బుద్ధో అప్పటిపుగ్గలో.
౧౧౦౩. సబ్బలోకహితో బన్ధు, సమత్తరతనాలయో;
సత్తానమనుకమ్పాయ, జాతో నాథో సివంకరో.
౧౧౦౪. చక్ఖుమా తిత్థకుసలో, ధమ్మస్సామీ తథాగతో;
మచ్చుధేయ్యవిమోక్ఖాయ, పటిపాదయి పాణినో.
౧౧౦౫. సత్థవాహో మహాయోగ్గో, మగ్గామగ్గయుధన్ధరో;
సిరిసత్థమధిగ్గయ్హ, విచరిత్థ మహాపథం,
౧౧౦౬. అనోమో అసమో ధీరో,
లోకహీతపరక్కమో;
సబ్బాకారవరోపేతో,
అచ్ఛేరబ్భుతపుగ్గలో.
౧౧౦౭. అత్థభూతో ధమ్మభూతో,
బ్రహ్మభూతో మహాయసో;
ఞాణాలోకపరిచ్ఛిన్న-
ఞేయ్యాసేసపరిగ్గహో.
౧౧౦౮. ఆనుభావవసిప్పత్తో, ఆసభణ్డాననిచ్చలో;
మహన్తమరియాదోయమనన్తగతిగోచరో.
౧౧౦౯. సబ్బా భిఞ్ఞాబలప్పత్తో, వేసారజ్జవిసారదో;
సబ్బసమ్పత్తినిట్ఠానో, గుణపారమిపూరకో.
౧౧౧౦. అప్పమేయ్యో మహానాగో, మహావీరో మహాముని;
మహేసీ మహితాచారో, మహామహో మహిద్ధికో.
౧౧౧౧. సబ్బత్థసిద్ధిసఞ్చారో, మహేసీగణపూజితో;
రాజాధిరాజమహితో, దేవబ్రహ్మాభివన్దితో.
౧౧౧౨. అభిభూయ తయో లోకే, ఆదిచ్చోవ నభన్తరే;
విరోచతి మహాతేజో, అన్ధకారే పభఙ్కరో.
౧౧౧౩. బ్యామప్పభాపరిక్ఖిత్తో, కేతుమాలాహలఙ్కతో;
ద్వత్తింసలక్ఖణాసీతిఅనుబ్యఞ్జనసోభితో.
౧౧౧౪. ఛబ్బణ్ణరంసిలలితో, రతనగ్ఘియసన్నిభో;
సమిద్ధిరూపసోభగ్గో, దస్సనేయ్యంవ పిణ్డితం.
౧౧౧౫. ఫుల్లం పదుమసణ్డంవ, కప్పరుక్ఖోవలఙ్కతో;
నభంవ తారకాకిణ్ణం, ఉత్తమో పటిదిస్సతి.
౧౧౧౬. సత్థుకప్పమహావీరపుత్తేహి పరివారితో;
సబ్బలోకమహిద్ధాయ, ధమ్మరాజా సయంవసీ.
౧౧౧౭. నిద్ధోతమలచన్దోవ, నక్ఖత్తపరివారితో;
ఖత్తసఙ్ఘపరిబ్యుళ్హో, చక్కవత్తీవ సోభతి.
౧౧౧౮. ఇచ్చానన్తగుణాకిణ్ణమసేసమలనిస్సటం;
సబ్బసమ్పత్తిదాతారం, విపత్తివినిబన్ధకం.
౧౧౧౯. దయాపరమహోరత్తం, భగవన్తమనుస్సరం;
భావేతి పఞ్ఞవా యోగీ, బుద్ధానుస్సతిభావనం.
౧౧౨౦. స్వాఖాతో తేన సద్ధమ్మో, సమ్బుద్ధేన సతీమతా;
పచ్చత్తపటివేధేన, పస్సితబ్బో యథారహం.
౧౧౨౧. తణ్హాదలిద్దనాసాయ, మనోరథసమిద్ధియా;
కాలన్తరమనాగమ్మ, పచ్చక్ఖఫలదాయకో.
౧౧౨౨. ఉపనిస్సయవన్తానం, ‘‘ఏహి పస్సా’’తి దస్సియో;
పచ్చత్తమేవ విఞ్ఞూహి, వేదితబ్బో సభావతో.
౧౧౨౩. సబ్బాసవసముగ్ఘాతీ, సుద్ధో సోవత్థికో సివో;
పిహితాపాయకుమ్మగ్గో, మగ్గో నిబ్బానపత్తియా.
౧౧౨౪. క్లేససంకటదుగ్గమ్హా, దుక్ఖక్ఖన్ధమహబ్భయా;
ఖేమన్తభూమిం నియ్యాతి, అచ్చన్తమనుపద్దవం.
౧౧౨౫. పుఞ్ఞతిత్థమిదం నామ, మఙ్గలఞ్చ సివఙ్కరం;
హితోదయసుఖాధాన-మమతాహారముత్తమం.
౧౧౨౬. అవిజ్జాపటలుద్ధారవిజ్జానేత్తోసధం వరం;
పఞ్ఞాధారమిదం సత్థం, క్లేసగణ్డప్పభేదకం.
౧౧౨౭. చతురోఘనిముగ్గానం, సేతుబన్ధో సముగ్గతో;
భవచారకరుద్ధానం, మహాద్వారో అపారుతో.
౧౧౨౮. సోకోపాయాసవిద్ధానం, పరిదేవసమఙ్గినం;
సల్లనీహరణోపాయో, అచ్చన్తసుఖమీరితో.
౧౧౨౯. బ్యసనోపద్దవాపేతో, సంక్లేసమలనిస్సటో;
ఉజుసమ్మత్తనియతో, పటిపత్తివిసుద్ధియా.
౧౧౩౦. సుద్ధసీలపరిక్ఖారో, సమాధిమయపఞ్జరో;
సమ్మాసఙ్కప్పచక్కఙ్గో, సమ్మావాయామవాహనో.
౧౧౩౧. సతిసారథిసంయుత్తో, సమ్మాదిట్ఠిపురేజవో;
ఏస ధమ్మరథో యాతి, యోగక్ఖేమస్స పత్తియా.
౧౧౩౨. విపత్తిపటిబాహాయ, సబ్బసమ్పత్తిసిద్ధియా;
సబ్బఖన్ధవిమోక్ఖాయ, ధమ్మం దేసేసి చక్ఖుమా.
౧౧౩౩. హితేసీ సబ్బపాణీనం, దయాపన్నో మహాముని;
ధమ్మాలోకం పకాసేసి, చక్ఖుమన్తానముత్తమో.
౧౧౩౪. యం ధమ్మం సమ్మదఞ్ఞాయ, ఖేమమగ్గప్పతిట్ఠితా;
పాపకాపగతా ధీరా, పస్సద్ధిదరథాసయా.
౧౧౩౫. భవయోగా వినిముత్తా, పహీనభయభేరవా;
అచ్చన్తసుఖమేధేన్తి, సోత్థిపత్తా మహేసయో.
౧౧౩౬. తమేవముత్తమం ధమ్మం, చిన్తేన్తో పన పణ్డితో;
భావేతీతి పకాసేన్తి, ధమ్మానుస్సతిభావనం.
౧౧౩౭. చత్తారో చ పటిపన్నా, చత్తారో చ ఫలే ఠితా;
ఏస సఙ్ఘో ఉజుభూతో, పఞ్ఞాసీలసమాహితో.
౧౧౩౮. పలాపాపగతో సుద్ధో, పటిపత్తిపతిట్ఠితో;
పరిగ్గహితసద్ధమ్మో, సమిద్ధిగుణసోభితో.
౧౧౩౯. పహీనాపాయగమనో, పాపక్లేసవినిస్సటో;
పరిపన్థసముచ్ఛేదీ, భవచారకభేదకో.
౧౧౪౦. ఉత్తమదమథప్పత్తో, సువినీతో మహేసినా;
విజ్జావిముత్తివోదాతో, ఆజానీయపథే ఠితో.
౧౧౪౧. సుగతోరసి సమ్భూతో, సుచిధమ్మసిరిన్ధరో;
పటిపాదితసమ్పత్తో, ధమ్మసాసనసేవితో.
౧౧౪౨. భయభేరవనిస్సఙ్గో, జినతేజానుపాలితో;
మోనేయ్యపథసఞ్చారో, సుగతోవాదభాజనో.
౧౧౪౩. అప్పమాదపరిత్తాణో, సీలాలఙ్కారభూసితో;
చేతోసమాధిసన్నద్ధో, పఞ్ఞాయుధసముజ్జలో.
౧౧౪౪. ఉజుమగ్గమధిట్ఠాయ, మారకాయప్పదాలనో;
అపరాజితసఙ్గామో, లలితోదాతవిక్కమో.
౧౧౪౫. మచ్చుధేయ్యమతిక్కన్తో, బోధిధమ్మప్పతిట్ఠితో;
ఛళాభిఞ్ఞాబలప్పత్తో, సమారాధితసాసనో.
౧౧౪౬. అనుబోధిమనుప్పత్తో, పభిన్నపటిసమ్భిదో;
సామఞ్ఞపారమిప్పత్తో, తోసేతి జినమానసం.
౧౧౪౭. నేకాకారవరూపేతో, నానాసమ్పత్తిఫుల్లితో;
విపత్తిపథనిత్తిణ్ణో, అభిబుద్ధిపరాయణో.
౧౧౪౮. ఆహునేయ్యో పాహునేయ్యో,
దక్ఖిణేయ్యో సుదుల్లభో;
సదేవకస్స లోకస్స,
పుఞ్ఞక్ఖేత్తమనుత్తరం.
౧౧౪౯. యత్థ సుద్ధిమ్హి నిద్దోసే, సద్ధాబీజం పతిట్ఠితం;
అచ్చన్తం పరిపాచేతి, సమ్పత్తిఫలముత్తమం.
౧౧౫౦. యం ఫలం పరిభుఞ్జన్తా, విముత్తిరససేవనం;
అచ్చన్తసుఖితా ధీరా, భవన్తి అజరామరా.
౧౧౫౧. తం ఫలం పత్థయన్తేన, సఙ్ఘానుస్సతిభావనా;
భావేతబ్బా పనిచ్చేవమితి భాసన్తి పణ్డితా.
౧౧౫౨. పఞ్చసీలం దససీలం, పాతిమోక్ఖముపోసథం;
చాతుపారిసుద్ధిసీలం, ధుతఙ్గపరివారితం.
౧౧౫౩. ఏవమేతేసు యం కిఞ్చి, సమాదాయ రహోగతో;
తమానిసంసం గుణతో, ఫలతో చ విచిన్తయే.
౧౧౫౪. ఆది చేతం పతిట్ఠా చ, ముఖం పముఖముత్తమం;
మూలం కుసలధమ్మానం, పభవం పటిపత్తియా.
౧౧౫౫. సాసనోతరణద్వారం, తిత్థం సద్ధమ్మవాపియా;
పారిసుద్ధిపదట్ఠానం, మగ్గో ఖేమన్తపాపకో.
౧౧౫౬. సాధు సిక్ఖాసమాదానం, బాహుసచ్చవిభూసనం;
అరియాచారచారిత్త-మవణ్ణమలవజ్జనం.
౧౧౫౭. కులపుత్తఅలఙ్కారో, పాపజల్లపవాహనం;
అనపాయి సుగన్ధఞ్చ, మహాపురిససేవితం.
౧౧౫౮. పచ్ఛానుతాపహరణం, పీతిపామోజ్జవడ్ఢనం;
నేక్ఖమ్మభావనోపేతం, పబ్బజ్జావేససోభనం.
౧౧౫౯. సోపానం సగ్గలోకస్స, దళ్హాపాయవిధానకం;
అనుపద్దవసమ్పత్తి, సమత్థగుణసూదనీ.
౧౧౬౦. క్లేసపఞ్జరవిచ్ఛేది, విపత్తిపథవారణం;
సోత్థికమ్మసముట్ఠానం, అసాధారణమఙ్గలం.
౧౧౬౧. ‘‘సులద్ధా వత మే లద్ధా, సద్ధా సుగతసాసనే;
సీలం మే యస్స కల్యాణం, పరిసుద్ధమఖణ్డితం.
౧౧౬౨. ‘‘దుల్లభో వత మే లద్ధో,
మహాలాభో అనప్పకో;
యోహమక్ఖలితాచారో,
ఉపఘాతవివజ్జితో.
౧౧౬౩. ‘‘ధమ్మఙ్కురితసన్తానో, మూలజాతోస్మి సాసనే;
ఉజుమగ్గం సమారుళ్హో, పిహితా సభయా దిసా.
౧౧౬౪. ‘‘అవఞ్చా వత మే జాతి, ఆరద్ధా ఖణసమ్పదా;
పతిట్ఠితోమ్హి సద్ధమ్మే, సఫలం మమ జీవితం’’.
౧౧౬౫. ఇత్థం నానప్పకారేన, చిన్తేన్తో గుణమత్తనో;
సీలక్ఖన్ధస్స భావేతి, సీలానుస్సతిభావనం.
౧౧౬౬. సద్ధాయ సీలవన్తేసు, దత్వా దానం యథారహం;
నిద్ధోతమలమచ్ఛేరో, వివిత్తో తమనుస్సరే.
౧౧౬౭. దానం నిధానమనుగం, అసాధారణముత్తమం;
అవినాససుఖాధానం, అచ్చన్తం సబ్బకామదం.
౧౧౬౮. కోపదాహోపసమనం, మచ్ఛేరమలసోధనం;
పమాదనిద్దావుట్ఠానం, లోభపాసవిమోచనం.
౧౧౬౯. చేతోవికారదమనం, మిచ్ఛామగ్గనివారణం;
విత్తిలాభసుఖస్సాదో, విభవోదయమఙ్గలం.