౨౧. ఏకవీసతిమో పరిచ్ఛేదో
పటిపదాఞాణదస్సనవిసుద్ధినిద్దేసో
౧౨౯౮. అట్ఠఞాణవసేనేవ, సిఖాపక్కా విపస్సనా;
నవమం పటిపదాఞాణ-దస్సనన్తి పవుచ్చతి.
౧౨౯౯. అట్ఠ ఞాణాని నామేత్థ, వేదితబ్బాని విఞ్ఞునా;
ఉపక్లేసవినిముత్తం, ఞాణం సువిసదం పన.
౧౩౦౦. ఉదయబ్బయే చ భఙ్గే చ, భయే ఆదీనవే తథా;
నిబ్బిదాపస్సనాఞాణం, ఞాణం ముచ్చితుకమ్యతా.
౧౩౦౧. పటిసఙ్ఖా చ సఙ్ఖారే, ఉపేక్ఖాఞాణమట్ఠమం;
ఇమాని అట్ఠ ఞాణాని, నవమం సచ్చానులోమకం.
౧౩౦౨. సచ్చానులోమఞాణన్తి, అనులోమం పవుచ్చతి;
తం సమ్పాదేతుకామేన, యోగావచరభిక్ఖునా.
౧౩౦౩. ఉదయబ్బయఞాణం తం, ఆదిం కత్వా పనట్ఠసు;
ఏతేసు పన ఞాణేసు, యోగో కరణియో పన.
౧౩౦౪. యథానుక్కమతో తస్స, తేసు ఞాణేసు అట్ఠసు;
అనిచ్చాదివసేనేవ, యోగం కత్వా ఠితస్స హి.
౧౩౦౫. అనిచ్చం దుక్ఖమనత్తాతి, సఙ్ఖారే అనుపస్సతో;
అట్ఠన్నం పన ఞాణానం, వసేన పన యోగినో.
౧౩౦౬. విపస్సనా సిఖాపత్తా, హోతి వుట్ఠానగామినీ;
సచ్చానులోమఞాణన్తి, అయమేవ పవుచ్చతి.
౧౩౦౭. సఙ్ఖారుపేక్ఖాఞాణం తం, ఆసేవన్తస్స యోగినో;
ఇదాని తస్స మగ్గో చ, సముప్పజ్జిస్సతీతి హి.
౧౩౦౮. సఙ్ఖారుపేక్ఖా సఙ్ఖారే, అనిచ్చా దుక్ఖాతి వా తథా;
సమ్మసిత్వా భవఙ్గం తు, పున వోతరతేవ సా.
౧౩౦౯. భవఙ్గానన్తరం సఙ్ఖారు-పేక్ఖాగతనయేన తు;
అనిచ్చాదివసేనేవ, సఙ్ఖారే పన గోచరం.
౧౩౧౦. కురుమానం మనోద్వారే, జాయతావజ్జనం తతో;
భవఙ్గావట్టనం కత్వా, జాతస్సానన్తరం పన.
౧౩౧౧. సఙ్ఖారే గోచరం కత్వా, పఠమం జవనమానసం;
ఉప్పజ్జతీతి తం చిత్తం, పరికమ్మన్తి వుచ్చతి.
౧౩౧౨. తదనన్తరమేవఞ్ఞం, సఙ్ఖారారమ్మణం పున;
దుతియం జవనం హోతి, ఉపచారన్తి తం మతం.
౧౩౧౩. తదనన్తరం తం హోతి, తథా సఙ్ఖారగోచరం;
తతియం జవనచిత్తం, అనులోమన్తి సఞ్ఞితం.
౧౩౧౪. పురిమానం పనట్ఠన్నం, ఞాణానం అనులోమతో;
బోధిపక్ఖియధమ్మానం, ఉద్ధఞ్చ అనులోమతో.
౧౩౧౫. తేనేవ తం హి సచ్చానులోమఞాణం పవుచ్చతి;
ఇదం హి పన సచ్చాను-లోమఞాణం మహేసినా.
౧౩౧౬. ‘‘వుట్ఠానగామినీయా హి, పరియోసాన’’న్తి భాసితం;
ఞేయ్యం సబ్బపకారేన, పరియోసానన్తి గోత్రభు.
౧౩౧౭. ఇతినేకేహి నామేహి, కిత్తితాయా మహేసినా;
వుట్ఠానగామినీ సన్తా, పరిసుద్ధా విపస్సనా.
౧౩౧౮. వుట్ఠాతుకామో సంసారదుక్ఖపఙ్కా మహబ్భయా;
కరేయ్య సతతం తత్థ, యోగం పణ్డితజాతికో.
ఇతి అభిధమ్మావతారే పటిపదాఞాణదస్సనవిసుద్ధినిద్దేసో నామ
ఏకవీసతిమో పరిచ్ఛేదో.