౧౩. భవపఞ్హాసుత్తం

౩౨౬. ‘‘‘భవో, భవో’తి, ఆవుసో సారిపుత్త, వుచ్చతి. కతమో ను ఖో, ఆవుసో, భవో’’తి? ‘‘తయో మే, ఆవుసో, భవా. కామభవో, రూపభవో, అరూపభవో – ఇమే ఖో, ఆవుసో, తయో భవా’’తి. ‘‘అత్థి పనావుసో, మగ్గో అత్థి పటిపదా, ఏతేసం భవానం పరిఞ్ఞాయా’’తి? ‘‘అత్థి ఖో, ఆవుసో, మగ్గో అత్థి పటిపదా, ఏతేసం భవానం పరిఞ్ఞాయా’’తి. ‘‘కతమో, పనావుసో, మగ్గో కతమా పటిపదా, ఏతేసం భవానం పరిఞ్ఞాయా’’తి? ‘‘అయమేవ ఖో, ఆవుసో, అరియో అట్ఠఙ్గికో మగ్గో, ఏతేసం భవానం పరిఞ్ఞాయ, సేయ్యథిదం – సమ్మాదిట్ఠి సమ్మాసఙ్కప్పో సమ్మావాచా సమ్మాకమ్మన్తో సమ్మాఆజీవో సమ్మావాయామో సమ్మాసతి సమ్మాసమాధి. అయం ఖో, ఆవుసో, మగ్గో అయం పటిపదా, ఏతేసం భవానం పరిఞ్ఞాయా’’తి. ‘‘భద్దకో, ఆవుసో, మగ్గో భద్దికా పటిపదా, ఏతేసం భవానం పరిఞ్ఞాయ. అలఞ్చ పనావుసో సారిపుత్త, అప్పమాదాయా’’తి. తేరసమం.