౧. చక్ఖుసుత్తం

౩౧౨. సావత్థినిదానం. ‘‘యో ఖో, భిక్ఖవే, చక్ఖుస్స ఉప్పాదో ఠితి అభినిబ్బత్తి పాతుభావో, దుక్ఖస్సేసో ఉప్పాదో, రోగానం ఠితి, జరామరణస్స పాతుభావో. యో సోతస్స ఉప్పాదో ఠితి…పే… యో ఘానస్స ఉప్పాదో ఠితి… యో జివ్హాయ ఉప్పాదో ఠితి… యో కాయస్స ఉప్పాదో ఠితి… యో మనస్స ఉప్పాదో ఠితి అభినిబ్బత్తి పాతుభావో, దుక్ఖస్సేసో ఉప్పాదో, రోగానం ఠితి, జరామరణస్స పాతుభావో. యో చ, భిక్ఖవే, చక్ఖుస్స నిరోధో వూపసమో అత్థఙ్గమో, దుక్ఖస్సేసో నిరోధో, రోగానం వూపసమో, జరామరణస్స అత్థఙ్గమో. యో సోతస్స నిరోధో…పే… యో ఘానస్స నిరోధో… యో జివ్హాయ నిరోధో… యో కాయస్స నిరోధో… యో మనస్స నిరోధో వూపసమో అత్థఙ్గమో, దుక్ఖస్సేసో నిరోధో, రోగానం వూపసమో, జరామరణస్స అత్థఙ్గమో’’తి. పఠమం.